ଚଣ୍ଡିଗଡ,୧୩।୩: ହରିୟାଣାର ନୟାବ ସିଂ ସାଇନି ସରକାର ଗୃହରେ ସଂଖ୍ୟାଗରିଷ୍ଠତା ହାସଲ କରିଛନ୍ତି। ବୁଧବାର ଉପସ୍ଥାପିତ ହୋଇଥିବା ଅନାସ୍ଥା ପ୍ରସ୍ତାବ ଧ୍ୱନିମତ ଦ୍ୱାରା ପାରିତ ହୋଇଛି। ମୁଖ୍ୟମନ୍ତ୍ରୀ ଅନାସ୍ଥା ପ୍ରସ୍ତାବ ଉପସ୍ଥାପନ କରିଥିଲେ। ଏହା ପରେ ପ୍ରସ୍ତାବ ଉପରେ ଆଲୋଚନା ହୋଇଥିଲା।
ହରିଆଣା ବିଧାନସଭାରେ ସଂଖ୍ୟାଗରିଷ୍ଠତା ପାଇଁ ୪୬ ବିଧାୟକଙ୍କ ସମର୍ଥନ ଆବଶ୍ୟକ ଥିବାବେଳେ ଭାଜପାକୁ ୪୮ ବିଧାୟକଙ୍କ ସମର୍ଥନ ମିଳିଛି। ଏଥିମଧ୍ୟରୁ ଭାଜପାର ୪୧ ଜଣ ବିଧାୟକ ଥିବା ବେଳେ ୬ ଜଣ ସ୍ବାଧୀନ ବିଧାୟକ ଓ ହରିଆଣାର ଲୋକହିତ ପାର୍ଟିର ଏକମାତ୍ର ବିଧାୟକ ଗୋପାଳ କାଣ୍ଡଙ୍କ ସମର୍ଥନ ମିଳିଛି।
ହରିୟାଣା ମୁଖ୍ୟମନ୍ତ୍ରୀ ମନୋହରଲାଲ୍ ଖଟ୍ଟାର ଓ ତାଙ୍କ ମନ୍ତ୍ରିମଣ୍ଡଳ ମଙ୍ଗଳବାର ଇସ୍ତଫା ଦେବାର କିଛି ସମୟ ପରେ ଭାଜପା ନେତା ନାୟବ ସିଂ ସୈନି ନୂଆ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ତାଙ୍କ ସମେତ ନୂଆ ମନ୍ତ୍ରୀ ପରିଷଦର ୫ ଜଣ ସଦସ୍ୟ ଶପଥ ନେଇଥିଲେ। ସେମାନେ ହେଲେ ଭାଜପା ବିଧାୟକ କନଓ୍ବର ପାଲ୍, ମୂଲ୍ଚାନ୍ଦ ଶର୍ମା, ଜୟପ୍ରକାଶ ଦଲାଲ, ବନଓ୍ବାରିଲାଲ୍ ଏବଂ ସ୍ବାଧୀନ ବିଧାୟକ ରଣଜିତ ସିଂ ଚୌତାଲା। ସୈନି ଶପଥ ନେବା ପରେ ଖଟ୍ଟାରଙ୍କ ନିକଟରେ ମୁଣ୍ଡ ନୁଆଁଇ ଆଶୀର୍ବାଦ ନେଇଥିଲେ।
ଲୋକ ସଭା ନିର୍ବାଚନ ଆଉ କିଛି ସପ୍ତାହ ବାକି ଥିବାବେଳେ ଅକ୍ଟୋବରରେ ହରିୟାଣା ବିଧାନସଭା ନିର୍ବାଚନ ହେବ। ଏହା ପୂର୍ବରୁ ଭାଜପା ରାଜ୍ୟ ନେତୃତ୍ୱରେ ପରିବର୍ତ୍ତନ କରିଛି। ସରକାର ବିରୋଧୀ ହାଓ୍ବାକୁ ଏଡ଼ାଇବା ପାଇଁ ଏଭଳି ପରିବର୍ତ୍ତନ କରାଯାଇଥିବା କୁହାଯାଉଛି। ପୂର୍ବରୁ ଗୁଜରାଟ ଓ ଉତ୍ତରାଖଣ୍ଡରେ ମଧ୍ୟ ଦଳ ଅନୁରୂପ ପଦକ୍ଷେପ ନେଇ ବିପୁଳ ବ୍ୟବଧାନରେ ବିଜୟୀ ହୋଇଥିଲା। ସୈନିଙ୍କୁ ନୂଆ ମୁଖ୍ୟମନ୍ତ୍ରୀ ଭାବେ ଚୟନ କରି ଭାଜପା ସାଧାରଣ ନିର୍ବାଚନ ପୂର୍ବରୁ ଜାତି ଏବଂ ଓବିସି ସମୀକରଣକୁ ଗୁରୁତ୍ୱ ଦେଇଛି।
ଲୋକ ସଭା ନିର୍ବାଚନରେ ଆସନ ବୁଝାମଣାକୁ ନେଇ ସହଯୋଗୀ ଦଳ ଜନନାୟକ ଜନତା ପାର୍ଟି (ଜେଜେପି) ସହ ଭାଜପା ମତଭେଦ ପରେ ମେଣ୍ଟ ସରକାର ଭାଙ୍ଗିବା ଆଶଙ୍କା କରାଯାଉଥିଲା। ହରିୟାଣାର ୧୦ ଆସନ ମଧ୍ୟରୁ ଜେଜେପି ପାଇଁ ଏହାର ନେତା ଦୁଷ୍ୟନ୍ତ ଚୌତାଲା ୨ଟି ଆସନ ମାଗିଥିବାବେଳେ ଭାଜପା ଗୋଟିଏ ଆସନ ଛାଡ଼ିବାକୁ ପ୍ରସ୍ତୁତ ଥିଲା। ୨୦୧୯ ନିର୍ବାଚନରେ ଭାଜପା ୧୦ଟି ଆସନରେ ଜିତିଥିଲା। ମେଣ୍ଟ ଭାଙ୍ଗିବା ପରେ ଜେଜେପି ସମସ୍ତ ୧୦ ଆସନରେ ଲଢ଼ିବ ବୋଲି କହିଛି।
