ନୂଆଦିଲ୍ଲୀ, ୧୪।୩: ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ପରିସ୍ଥିତିକୁ ଦୃଷ୍ଟିରେ ରଖି ଦେଶରେ ଗ୍ୟାସ ଯୋଗାଣକୁ ନେଇ ସାଧାରଣ ଜନତାଙ୍କ ମଧ୍ୟରେ ଚିନ୍ତା ବଢ଼ିବାରେ ଲାଗିଛି। ଏହି ପରିପ୍ରେକ୍ଷୀରେ କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଶନିବାର ଏକ ବଡ଼ ଘୋଷଣା କରିଛି। ସରକାର ଏବେ ସେହି ଗ୍ରାହକମାନଙ୍କୁ LPG ସିଲିଣ୍ଡର ବ୍ୟବହାର କରିବା କିମ୍ବା ନୂଆ କନେକ୍ସନ ନେବା ଉପରେ ରୋକ ଲଗାଇଛନ୍ତି, ଯେଉଁମାନଙ୍କ ଘରେ ପୂର୍ବରୁ ପାଇପ ଯୋଗେ ପ୍ରାକୃତିକ ଗ୍ୟାସ (PNG) ସୁବିଧା ଉପଲବ୍ଧ ଅଛି।
ସରକାରଙ୍କ ସଂଶୋଧିତ ନିର୍ଦ୍ଦେଶ ଅନୁଯାୟୀ, ସରକାରୀ ତୈଳ କମ୍ପାନୀଗୁଡ଼ିକୁ ସ୍ପଷ୍ଟ କରାଯାଇଛି ଯେ, ଯେଉଁ ଗ୍ରାହକଙ୍କ ପାଖରେ PNG କନେକ୍ସନରହିଛି, ସେମାନଙ୍କୁ ନୂଆ LPG କନେକ୍ସନ ଦିଆଯିବ ନାହିଁ। ସେହି ଗ୍ରାହକମାନେ ନିଜର ପୁରୁଣା ସିଲିଣ୍ଡର ମଧ୍ୟ ରିଫିଲ (Refill)କରିପାରିବେ ନାହିଁ। ଘରୋଇ ଗ୍ୟାସ ଯୋଗାଣକୁ ସନ୍ତୁଳିତ ରଖିବା ଏବଂ ସମ୍ବଳର ସଠିକ ବ୍ୟବହାର ପାଇଁ ସରକାର ଏହି ପଦକ୍ଷେପ ନେଇଛନ୍ତି।
ଶୁକ୍ରବାର ଏକ ମିଳିତ ଖବରଦାତା ସମ୍ମିଳନୀରେ ସରକାର ଦେଶରେ କଞ୍ଚା ତେଲ ଏବଂ ଗ୍ୟାସର ସ୍ଥିତି ସମ୍ପର୍କରେ ସୂଚନା ଦେଇଛନ୍ତି। ପେଟ୍ରୋଲିୟମ ମନ୍ତ୍ରଣାଳୟର ଯୁଗ୍ମ ସଚିବ ସୁଜାତା ଶର୍ମା କହିଛନ୍ତି, ଭାରତ ନିଜର ମୋଟ ଆବଶ୍ୟକତାର ପ୍ରାୟ ୬୦ ପ୍ରତିଶତ LPG ବିଦେଶରୁ ଆମଦାନୀ କରିଥାଏ। ଏହି ଆମଦାନୀର ୯୦ ପ୍ରତିଶତ ସପ୍ଲାଏ ’ଷ୍ଟ୍ରେଟ ଅଫ ହର୍ମୁଜ’ ଦେଇ ଆସିଥାଏ, ଯାହା ବର୍ତ୍ତମାନ ଯୁଦ୍ଧ ଯୋଗୁ ପ୍ରଭାବିତ ହେବାର ଆଶଙ୍କା ରହିଛି। ଦେଶରେ ପ୍ରତିଦିନ ପ୍ରାୟ ୫୦ ଲକ୍ଷ LPG ସିଲିଣ୍ଡର ଡେଲିଭରି କରାଯାଉଛି।
ତେବେ ସରକାର ସ୍ପଷ୍ଟ କରିଛନ୍ତି ଯେ ଦେଶରେ ପେଟ୍ରୋଲ, ଡିଜେଲ ଏବଂ LPG ର ସ୍ଥିତି ସନ୍ତୋଷଜନକ ରହିଛି। ଗତ ମାର୍ଚ୍ଚ ୯ ତାରିଖରେ ସରକାର ’Essential Commodities Act’ ଲାଗୁ କରି ସମସ୍ତ ରିଫାଇନାରୀକୁ LPG ଉତ୍ପାଦନ ବୃଦ୍ଧି କରିବାକୁ ନିର୍ଦ୍ଦେଶ ଦେଇଥିଲେ। ଫଳରେ ଘରୋଇ ଉତ୍ପାଦନ ୨୫ ପ୍ରତିଶତରୁ ବଢ଼ି ୨୮ ପ୍ରତିଶତରେ ପହଞ୍ଚିଛି। ଦେଶର କୌଣସି ପେଟ୍ରୋଲ ପମ୍ପରେ ଇନ୍ଧନ ଶେଷ ହେବାର ସ୍ଥିତି ନାହିଁ ବୋଲି ମନ୍ତ୍ରଣାଳୟ ଆଶ୍ୱାସନା ଦେଇଛି।
