ଜଗତ୍ସିଂହପୁର ଅଫିସ, ୨୩ା୫: ଜାତୀୟ ରାଜପଥ କଡ, ପାରାଦୀପ ଓ ଜଗତ୍ସିଂହପୁର ପୌରାଞ୍ଚଳରେ ଲାଗିଥିବା ହୋଡିଂଗୁଡିକୁ ମେ ୨୫ ତାରିଖ ସୁଦ୍ଧା କଢାଯିବ। ଏନେଇ ରବିବାର ବତ୍ୟା ମୁକାବିଲା ପାଇଁ ଅନୁଷ୍ଠିତ ଭର୍ଚୁଆଲ ସମୀକ୍ଷା ବୈଠକରେ ଜିଲାପାଳ ସଂଗ୍ରାମ କେଶରୀ ମହାପାତ୍ର କହିଛନ୍ତି।
ସମ୍ଭାବ୍ୟ ବାତ୍ୟାର ମୁକାବିଲା ନିମନ୍ତେ ଜିଲା ପ୍ରଶାସନ ପକ୍ଷରୁ ପ୍ରସ୍ତୁତି ଶେଷ ହୋଇଛି। ସମସ୍ତ ମତ୍ସ୍ୟଜିବୀ ସମୁଦ୍ରରୁ ଫେରି ଆସିଛନ୍ତି। ୨୪ ତାରିଖରେ ଓଡ୍ରାଫ ଦଳଗୁଡିକ ପାରାଦୀପ, ଏରସମା, କୁଜଙ୍ଗ, ବାଲିକୁଦା ଓ ତିର୍ତ୍ତୋଲ ଅଞ୍ଚଳକୁ ସ୍ଥାନାନ୍ତରିତ ହେବେ । ୪୨ଟି ବହୁମୁଖୀ ଆଶ୍ରୟସ୍ଥଳୀ ଓ ୧୮୧ଟି ବିକଳ୍ପ ବାତ୍ୟା ଆଶ୍ରୟସ୍ଥଳୀ ଚିହ୍ନଟ କରାଯାଇଛି । ପ୍ରତ୍ୟେକ ଆଶ୍ରୟସ୍ଥଳୀରେ ୩ ଜଣ ଅଧିକାରୀ ନିୟୋଜିତ ହୋଇଛନ୍ତି । ସେମାନେ ସ୍ଥାନାନ୍ତରିତ ଲୋକଙ୍କ ଖାଇବା, ପିଇବା ଓ ସ୍ବାସ୍ଥ୍ୟ ଅବସ୍ଥା ବୁଝିବେ । ଜିଲାରେ ୨୬ଟି ପାୱାର ବୋଟ୍ ଓ ୨୦ଟି ଜେସିବି ପ୍ରସ୍ତୁତ ରଖାଯାଇଛି । ୬୦୦୦ ପଲିଥିନ୍ ସିଟ୍, ୫୧,୧୧୦ କ୍ବିଣ୍ଟାଲ ଚାଉଳ ଓ ୧୪,୦୦୦ ଲିଟରରୁ ଅଧିକ କିରୋସିନ ମହଜୁତ ରହିଛି । ପାରାଦୀପ କୋଭିଡ୍ ହସ୍ପିଟାଲ ଓ କୋଭିଡ୍ କେୟାର ସେଣ୍ଟର ପାଇଁ ୩୨୧ଟି ଅମ୍ଳଜାନ ସିଲିଣ୍ଡର, ୯୫ଟି କନ୍ସେଣ୍ଟ୍ରେଟର ମହଜୁତ ରଖାଯାଇଛି। ଆଶ୍ରୟସ୍ଥଳୀରେ ସ୍ଥାନାନ୍ତରିତ ଲୋକଙ୍କୁ ସଂଶୋଧିତ ଦର ଅନୁଯାୟୀ ବୟସ୍କଙ୍କୁ ୧୦୦ ଟଙ୍କା ଓ ଛୋଟ ପିଲାଙ୍କୁ ୬୦ ଟଙ୍କା ହିସାବରେ ଖାଦ୍ୟ ଯୋଗାଇ ଦିଆଯିବ। ଜିଲାରେ ବିଦ୍ୟୁତ ଖୁଣ୍ଟ ଓ କେବୁଲ ଯଥେଷ୍ଟ ପରିମାଣରେ ମହଜୁତ ଅଛି । ୫୬ଟି ମୋବାଇଲ ଭ୍ୟାନ୍, ୧୩୨ଟି ଓଭରହେଡ୍ ଟାଙ୍କି ଓ ହ୍ୟାଣ୍ଡ ପମ୍ପ ମାଧ୍ୟମରେ ପାନୀୟ ଜଳ ଯୋଗାଇ ଦିଆଯିବ। ଯେଉଁମାନଙ୍କ ଥଣ୍ଡା, କାଶ, ଛିଙ୍କ, ଜ୍ୱରର ଲକ୍ଷଣ ଦେଖାଯିବ ସେମାନଙ୍କର ଆଣ୍ଟିଜେନ୍ ଟେଷ୍ଟ କରାଯାଇ ସଂକ୍ରମିତଙ୍କୁ କ୍ଲଷ୍ଟର ଟିଏମ୍ସକୁ ସ୍ଥାନାନ୍ତରିତ କରାଯିବ । ତଳିଆ ଅଞ୍ଚଳରେ ବର୍ଷା ପାଣି ଜମିବାର ସମ୍ଭାବନା ଥିବାରୁ ଜଳସମ୍ପଦ ବିଭାଗ ପ୍ରସ୍ତୁତ ରହିଛି ବୋଲି ଜିଲାପାଳ କହିଛନ୍ତି। ବୈଠକରେ ଏସ୍ପି ପ୍ରକାଶ ଆର୍, ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ, ଚିନ୍ମୟୀ ବିଶ୍ୱାଳ, କାହ୍ନୁଚରଣ ଧୀର, ଡିଆର୍ଡିଏ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତିଙ୍କ ସମେତ ବିଭିନ୍ନ ବ୍ଲକର ବିଡିଓ, ତହସିଲଦାର, ଜିଲା ଯୋଗାଣ ଅଧିକାରୀ, ମତ୍ସ୍ୟ, ପ୍ରାଣୀ ସମ୍ପଦ ଅଧିକାରୀ ପ୍ରମୁଖ ଅଂଶ ଗ୍ରହଣ କରିଥିଲେ ।
