ଯାଜପୁର ଅଫିସ,୨୯।୧୦:ଯେଉଁ ଅଞ୍ଚଳର ଗମନାଗମନ ଯେତେ ସୁରକ୍ଷିତ ଓ ସୁଦୃଢ ସେହି ଅଞ୍ଚଳ ସେତେ ଉନ୍ନତ ବୋଲି ବିଶ୍ୱାସ କରାଯାଏ । କିନ୍ତୁ ଦୁର୍ବଳ ନେତୃତ୍ୱ ତଥା ଠିକାଦାରୀ ରାଜନୀତି ଯାଜପୁର ଜିଲାର ବିକାଶ ଧାରାକୁ ପଛକୁ ଠେଲି ଦେଇଛି। ଗ୍ରାମ୍ୟ ନିର୍ମାଣ ବିଭାଗର ଅର୍ଥକୁ ଲୁଟର ମାଧ୍ୟମ କରାଯାଇଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି । ଯାଜପୁର ଜିଲାର ଅନ୍ୟତମ ବ୍ୟସ୍ତବହୁଳ ଆଙ୍କୁଳା-ପାଣିକୋଇଲି ରାସ୍ତାକୁ ଅବଲୋକନ କଲେ ଏହା ଜଳଜଳ ହୋଇ ଦିଶୁଛି।
ଯାଜପୁର ଜିଲା ଗଠନ ହେବାର ୨୮ ବର୍ଷ ଅତିକ୍ରମ କରିଛି। ଇତିମଧ୍ୟରେ ତିନି ପ୍ରମୁଖ ଦଳର ବରିଷ୍ଠ ନେତାମାନେ ସରକାରଙ୍କ ବିଭିନ୍ନ ମନ୍ତ୍ରୀମଣ୍ଡଳର ଦାୟିତ୍ୱରେ ରହିଛନ୍ତି । ହେଲେ ସେମାନଙ୍କ ଆନ୍ତରିକତା ଅଭାବ ଜିଲାର ବିକାଶରେ ଅନ୍ତରାୟ ସାଜିଥିବା ମତପ୍ରକାଶ ପାଉଛି । ଜିଲାର ପ୍ରାୟ ସମସ୍ତ ନିର୍ବାଚନ ମଣ୍ଡଳୀରେ ସବୁ ସ୍ଥାନକୁ ଏଯାଏ ଗମନାଗମନର ସୁବ୍ୟବସ୍ଥା ହୋଇପାରିନାହିଁ। କୋରେଇ ଓ ଯାଜପୁର ନିର୍ବାଚନ ମଣ୍ଡଳୀର ଖଇରାବାଦ, ନାଥସାହି, ଭୁବନେଶ୍ୱରପୁର, ବେରୁଦା, ମାଳଆନନ୍ଦପୁର, ଚଇନପୁର ଏବଂ ପାଣିକୋଇଲି ପଞ୍ଚାୟତର ଅଧିବାସୀମାନେ ପ୍ରତ୍ୟେକ୍ଷ ଭାବେ ଆଙ୍କୁଳା-ପାଣିକୋଇଲି ରାସ୍ତା ଉପରେ ନିର୍ଭର କରିଥାନ୍ତି। ଏହାବାଦ୍ ଯାଜପୁର, ଦଶରଥପୁର, ବିଂଝାରପୁର ଏବଂ କୋରେଇ ବ୍ଳକର ଦୁଇ ଚକିଆ ଯାନ ଆରୋହୀ ଏହି ରାସ୍ତାରେ ପୂର୍ଣ୍ଣ ଭାବେ ନିର୍ଭରଶୀଳ। ଦୀର୍ଘଦିନର ଜନ ଆନ୍ଦୋଳନ ଫଳରେ ଏ ରାସ୍ତାଟି ଏକ ସବୁଦିନିଆ ରାସ୍ତାରେ ପରିଣତ ହୋଇଥିଲା। ବିିଭିନ୍ନ ସମୟରେ ଉକ୍ତ ରାସ୍ତାର ମରାମତି ନିମନ୍ତେ ଲକ୍ଷାଧିକ ଟଙ୍କା ଅନୁଦାନ ଆସୁଛି। କିନ୍ତୁ ବିଭାଗୀୟ ଯନ୍ତ୍ରୀମାନଙ୍କ ଆନ୍ତରିକତାର ଅଭାବ ଯୋଗୁ ଏହି ରାସ୍ତା ଲୋକଙ୍କୁ ଉପଯୁକ୍ତ ଗମନାଗମନର ସୁବିଧା ପ୍ରଦାନ କରିବାରେ ଅସମର୍ଥ ହେଉଛି।
ବୁଢ଼ାନଦୀର ପଶ୍ଚିମ ପଟରୁ ଏନ୍ଏଚ୍-୧୬ର ସଂଯୋଗ ସ୍ଥାନ ପର୍ଯ୍ୟନ୍ତ ପ୍ରାୟ ୧୦ କିମି ରାସ୍ତାର ଦୂରାବସ୍ଥା ଅବର୍ଣ୍ଣନନୀୟ। ସରକାରୀ ଅର୍ଥ ଆଖିବୁଜା ଖର୍ଚ୍ଚ ହେଉଥିଲେ ବି ମରାମତି କାମ ନିମ୍ନମାନର ହେଉଛି ଏହା ବୁଝିବାକୁ ଯନ୍ତ୍ରୀମାନେ କାହିଁକି ନାରାଜ ତାହା ଅନୁଭବୀମାନଙ୍କୁ ଆଶ୍ଚର୍ଯ୍ୟ କରୁଛି ବୋଲି ମତପ୍ରକାଶ ପାଇଛି। ଏହି ପରିପ୍ରେକ୍ଷୀରେ ପାଣିକୋଇଲି ବରିଷ୍ଠ ନାଗରିକ ମଞ୍ଚର ସାଧାରଣ ସମ୍ପାଦକ ସୁରେନ୍ଦ୍ର କୁମାର ରାୟ ଜିଲାପାଳଙ୍କ ଦୃଷ୍ଟି ଆକର୍ଷଣ କରି ସମସ୍ୟାର ସମାଧାନ କରିବାକୁ ନିବେଦନ କରିଛନ୍ତି। ରାସ୍ତାର ସବୁଠାରୁ ଖରାପ ସ୍ଥିତିରେ ମା’ତାରିଣୀ ବାଳିକା ଉଚ୍ଚ ବିଦ୍ୟାଳୟର ସମ୍ମୁଖ ଅଂଶ, ନମିଟିକିରି ଶିବ ମନ୍ଦିର, ହାଇ ଲେବଲ କେନାଲର ଉଭୟ ପୂର୍ବ ଓ ପଶ୍ଚିମ ଅଂଶ, ଯମୁନା ନଦୀ ପୋଲର ଉଭୟ ପୂର୍ବ ଓ ପଶ୍ଚିମ ଭାଗ, ନୂଆପଡ଼ା ମିନିଷ୍ଟାଡିୟମ ପାର୍ଶ୍ୱବର୍ତ୍ତୀ ଅଞ୍ଚଳ ଏବଂ ପାଣିକୋଇଲି ଏନ୍ଏଚ୍କୁ ସଂଯୋଗୀ ଅଂଶର ଅବସ୍ଥା ଶୋଚନୀୟ ହୋଇପଡିଛି। ଏଥିଯୋଗୁ ପ୍ରତିମୁହୂର୍ତ୍ତରେ ବିପଦର ଆଶଙ୍କା ରହିଛି। ଅଧିକାଂଶ ସମୟରେ ଦୁର୍ଘଟଣା ମଧ୍ୟ ଘଟୁଥିବା ନଜିର ରହିଛି।
