କଣିହାଁ, ୯ା୭(ଡି.ଏନ.ଏ.) ଅନୁଗୋଳ ଜିଲା କଣିହାଁ ବ୍ଲକ କୁଳୁମା ପଞ୍ଚାୟତର କୁଳୁମା ଗ୍ରାମରେ ଥିବା ଦୁଇଟି କ୍ଷୁଦ୍ର ଜଳସଚନ ପ୍ରକଳ୍ପର ପୁନରୁଦ୍ଧାର ସମ୍ପୂର୍ଣ୍ଣ ହୋଇପାରୁ ନାହିଁ। ୨୦୦୪ରୁ ଏହାର ମୂଳଦୁଆ ପଡିଥିବା ବେଳେ ପୁନରୁଦ୍ଧାର ପାଇଁ ରାଜ୍ୟ ସରକାର ୭୦ ଲକ୍ଷରୁ ଅଧିକ ଟଙ୍କା ପ୍ରଦାନ କରିଛନ୍ତି। ହେଲେ ଅଦ୍ୟାବଧି କାମ ପୂରଣ ହୋଇ ନ ଥିବାରୁ ଏ ନେଇ ଜନ ଅସନ୍ତୋଷ ଦେଖାଦେଇଛି। ବିଶେଷକରି ଉଠାଯାଇଥିବା ମାଟି ଚାଷୀମାନଙ୍କ ଜମିରେ ଗଦା କରାଯାଇଛି। ଜଳ ନିଷ୍କାସନ ସ୍ଥାନକୁ ଠିକ୍ ଭାବେ କଂକ୍ରିଟ୍ କରାଯାଇ ନାହିଁ। କାର୍ଯ୍ୟ ନେଇଥିବା ଠିକାଦାର ଓ ବିଭାଗୀୟ କର୍ତ୍ତୃପକ୍ଷଙ୍କ ଅବହେଳା ଯୋଗୁ ଏଠାକାର ଚାଷୀ ଜମିକୁ ପାଣି ପାଇପାରୁ ନ ଥିବା ଅଭିଯୋଗ ହୋଇଛି। ଏହାର ତଦନ୍ତ ପାଇଁ କୁଳୁମା ଗ୍ରାମର ବରିଷ୍ଠ ନାଗରିକ ଓ ଚାଷୀମାନେ ରାଜ୍ୟ ବିଧାନସଭା ଗୃହ କମିଟି ସଦସ୍ୟ ଅମରନାଥ ଶତପଥୀଙ୍କୁ ଗତ ଜୁନ୍ ୨୩ ତାରିଖରେ ଅଭିଯୋଗ କରିଛନ୍ତି। ଅଭିଯୋଗର ନକଲ ଅନୁଗୋଳ ଜିଲାପାଳ, ଏମ୍ଆଇପି ଡିଭିଜନ ନିର୍ବାହୀ ଯନ୍ତ୍ରୀ, ପାଲଲହଡ଼ା ଓ ତାଳଚେର ବିଧାୟକଙ୍କୁ ପ୍ରଦାନ କରାଯାଇଛି।
ବୁଦ୍ଧିଜୀବୀ ତଥା ଚାଷୀ କୃଷ୍ଣଚନ୍ଦ୍ର ପ୍ରଧାନ, ଭାସ୍କର ସାମଲ, ପ୍ରଶ୍ନ ସାହୁ ପ୍ରମୁଖ ଅଭିଯୋଗ କରିଛନ୍ତି ଯେ, କୁଳୁମା ଗ୍ରାମର ତେଲପଶି ଏମ୍ଆଇପି ପାଇଁ ୩୬ ଲକ୍ଷ ୮୮ ହଜାର ଓ ନୂଆବନ୍ଧ ଏମ୍ଆଇପି ପାଇଁ ୩୫ ଲକ୍ଷ ୮୨ ହଜାର ଟଙ୍କା ଅନୁଦାନ ମିଳିଛି। ଏହି କାର୍ଯ୍ୟ ଏମ୍ଆଇପିର ତାଳଚେର ଉପଖଣ୍ଡ ସହକାରୀ ଯନ୍ତ୍ରୀଙ୍କ ତତ୍ତ୍ୱାବଧାନରେ କରାଯାଉଥିଲା। ଠିକାଦାର ମନଇଚ୍ଛା ମାଟି ଖୋଳି ଗ୍ରାମର ଯାତ୍ରାପଡିଆ ସହ ଅନେକଙ୍କ ଚାଷ ଜମିରେ ଗଦା କରିଛନ୍ତି। ଏହାକୁ ସମତୁଲ କରି ନ ଥିବାବେଳେ ନିମ୍ନମାନର କାମ କରି ଡ୍ରେନ ସଫା କରିନାହାନ୍ତି। ଜଳ ନିଷ୍କାସନ ସ୍ଥାନରେ କଂକ୍ରିଟ କାମ ଠିକ୍ ଭାବେ ହୋଇନାହିଁ। କାମ ନ ସାରି ଠିକାଦାର ବିଲ୍ କରି ଆଉ ଦେଖାଦେଉନାହାନ୍ତି। ଏହାର ତଦନ୍ତ କରାଯିବାକୁ ସେମାନେ ଦାବି କରିଛନ୍ତି। ଅଭିଯୋଗ ସମ୍ପର୍କରେ ଏମ୍ଆଇପି ତାଳଚେର ଉପଖଣ୍ଡ ସହକାରୀ ନିର୍ବାହୀ ଯନ୍ତ୍ରୀ ବୀରେନ୍ଦ୍ର କୁମାର ଜଗତ କହିଛନ୍ତି, ନିମ୍ନମାନର କାମ ହୋଇନାହିଁ। ଗ୍ରାମବାସୀ ଓ ପାଣି ପଞ୍ଚାୟତ କମିଟି ତଦାରଖରେ କାର୍ଯ୍ୟ ହୋଇଛି। ଗଦା ହୋଇଥିବା ମାଟି ବର୍ଷା ଯୋଗୁ ସମତୁଲ ହୋଇପାରି ନାହିଁ। ଶୁଖିଲା ପାଗ ହେବାକ୍ଷଣି ଏହା କରାଯିବ। ପ୍ରକଳ୍ପ କାମ ସରିନାହିଁ। ଚଳିତ ଆର୍ଥିକ ବର୍ଷର ବିଲ୍ ମଧ୍ୟ ଠିକାଦାରଙ୍କୁ ଦିଆଯାଇନାହିଁ। ଦୁର୍ନୀତି ଅଭିଯୋଗ ମିଥ୍ୟା। ତଦନ୍ତକୁ ସ୍ବାଗତ କରାଯିବ ବୋଲି ନିର୍ବାହୀ ଅଧିକାରୀ ପ୍ରକାଶ କରିଛନ୍ତି।
