ବାରିପଦା ଅଫିସ,୧୮।୧୧: ମୟୂରଭଞ୍ଜ ଜିଲା ବାରିପଦାଠାରେ ବହୁ ପ୍ରତୀକ୍ଷିତ ଐତିହ୍ୟ ରେଳ ସଂଗ୍ରହାଳୟ ବୁଧବାର ଲୋକାର୍ପିତ ହୋଇଛି। ଦକ୍ଷିଣପୂର୍ବ ରେଲଓ୍ବେ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ କେନ୍ଦ୍ର ଆଦିବାସୀ ବ୍ୟାପାର ଓ ଜଳଶକ୍ତି ମନ୍ତ୍ରୀ ଇଂ.ବିଶ୍ୱେଶ୍ୱର ଟୁଡୁ ମୁଖ୍ୟ ଅତିଥି ଭାବେ ଯୋଗଦେଇ ଏହି ସଂଗ୍ରହାଳୟକୁ ଲୋକାର୍ପଣ କରିଥିଲେ। ଜିଲାରେ ରେଳ ସେବାର ବ୍ୟାପକ ପରିବର୍ତ୍ତନ କରାଯିବା ସହ ଜିଲାବାସୀଙ୍କ ଦାବି ଖୁବ୍ଶୀଘ୍ର ପୂରଣ ହେବ ବୋଲି ମନ୍ତ୍ରୀ ତାଙ୍କ ବକ୍ତବ୍ୟରେ ପ୍ରକାଶ କରିଥିଲେ। ସେହିପରି ସଂଗ୍ରହାଳୟରେ ପିଲାଙ୍କ ଖେଳିବା ପାଇଁ ଏକ ଟୟ ରେଳ ସେବା ସହିତ ଆକର୍ଷଣୀୟ ପାର୍କ ନିର୍ମାଣ, ବାଙ୍ଗିରିପୋଷିରେ ଗୋଦାମ ଗୃହ ନିର୍ମାଣ ଓ ବାଙ୍ଗିରିପୋଷି-ଗୋରୁମହିଷାଣୀ ଦେଇ ଟାଟା ସହିତ ରେଳପଥ ସଂଯୋଗ ପାଇଁ ରେଳମନ୍ତ୍ରୀଙ୍କ ସହ ବିସ୍ତୃତ ଆଲୋଚନା କରିଥିବା ସେ କହିଥିଲେ।
ସ୍ବାଧୀନତା ପୂର୍ବରୁ ୧୯୦୪ରେ ମୟୂରଭଞ୍ଜର ପ୍ରଜା ବତ୍ସଳ ମହାରାଜା ଶ୍ରୀରାମ ଚନ୍ଦ୍ର ଭଞ୍ଜଦେଓ ଜିଲାରେ ରେଳ ଚଳାଚଳ ଆରମ୍ଭ କରିଥିଲେ। ରେଳସେବାର ମୂକସାକ୍ଷୀ କୁହାଯାଉଥିବା ବାଷ୍ପଚାଳିତ ଇଞ୍ଜିନ ଓ ଡବାଗୁଡ଼ିକ ବାରିପଦା ରେଳଷ୍ଟେଶନ ଷ୍ଟକ ୟାର୍ଡ଼ରେ ପରିତ୍ୟକ୍ତ ଅବସ୍ଥାରେ ପଡ଼ି ରହିଥିଲା। ଖଡ଼ଗପୁର ରେଳ ଡିିଭିଜନ ପକ୍ଷରୁ ୧କୋଟି ୫୫ଲକ୍ଷ ଟଙ୍କାରେ ଏହି ସଂଗ୍ରହାଳୟ ପ୍ରତିଷ୍ଠା କରାଯାଇ ସେଗୁଡ଼ିକୁ ନୂତନ ରୂପ ଦିଆଯାଇଛି। ଏହା ସହିତ ୧୧୮ବର୍ଷ ପୂର୍ବେ ପ୍ରଚଳିତ ମୟୂରଭଞ୍ଜ ରେଳସେବାର ଅନେକ ସ୍ମୃତି ଏହି ସଂଗ୍ରହାଳୟରେ ସ୍ଥାନ ପାଇଛି। ଅନ୍ୟମାନଙ୍କ ମଧ୍ୟରେ ବାରିପଦା ବିଧାୟକ ପ୍ରକାଶ ସୋରେନ, ପୂର୍ବତନ ମନ୍ତ୍ରୀ ତଥା ମୟୂରଭଞ୍ଜ ମହାରାଜା ପ୍ରବୀଣ ଚନ୍ଦ୍ର ଭଞ୍ଜଦେଓ, ରେଲଓ୍ବେର ପ୍ରଧାନ ଆର୍ଥିକ ପରାମର୍ଶଦାତା ପ୍ରଶାନ୍ତ ମିଶ୍ର, ଦକ୍ଷିଣପୂର୍ବ ମଣ୍ଡଳ ରେଳ ପ୍ରବନ୍ଧକ ମନୋରଞ୍ଜନ ପ୍ରଧାନ ପ୍ରମୁଖ ଉପସ୍ଥିତ ରହି ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓଙ୍କ ଓଡ଼ିଶା ପ୍ରତି ରହିଥିବା ଅବଦାନ ସମ୍ପର୍କରେ ବକ୍ତବ୍ୟ ରଖିଥିଲେ ା ବ୍ୟବସାୟୀ ରାଜେଶ କୁମାର ଧନ୍ୟବାଦ ଅର୍ପଣ କରିଥିଲେ।
