ରସୁଲପୁର,୨୨ା୧୧(ଡି.ଏନ.ଏ.): ରସୁଲପୁର ବ୍ଲକ କୃଷି କାର୍ଯ୍ୟାଳୟରେ ଥିବା ୨ଟି ଯାକ ସହକାରୀ କୃଷି ଅଧିକାରୀ ପଦବୀ ଖାଲିପଡ଼ିଛି। ତେଣୁ ରବି ଫସଲ ଯୋଜନା ପ୍ରସ୍ତୁତି ଓ ତା’ର କାର୍ଯ୍ୟକାରିତାରେ ବାଧାସୃଷ୍ଟି ହେଉଛି। କାର୍ଯ୍ୟାଳୟରେ ନୂଆକରି ବ୍ଲକ କୃଷି ଅଧିକାରୀ ବିଶ୍ୱଜୟୀ ମିଶ୍ର ଯୋଗ ଦେଇଛନ୍ତି। ହେଲେ ସହକାରୀ କୃଷି ଅଧିକାରୀ ପଦବୀ ପୂରଣରେ ବିଳମ୍ବ ହେଉଥିବାରୁ କୃଷି ଉନ୍ନୟନ କାର୍ଯ୍ୟ ଆଗେଇ ପାରୁନାହିଁ। ବିଶେଷକରି କ୍ଷେତ୍ରରେ କୃଷି ଓ କୃଷକଙ୍କ ପାଇଁ ଉଦ୍ଦିଷ୍ଟ କାର୍ଯ୍ୟ ତ୍ୱରାନ୍ବିତ କରିବା। ବିଭିନ୍ନ ଯୋଜନା ପାଇଁ ତାଲିକା ପ୍ରସ୍ତୁତ, ଚକୱାରି ଚାଷ ପାଇଁ ଜମି ଚିହ୍ନଟ, କେଉଁ ପଞ୍ଚାୟତରୁ କେତେ ଚାଷୀ ରବି ଫସଲ କରୁଛନ୍ତି ତାହାକୁ ଚିହ୍ନଟ କରିବା, ଚିହ୍ନଟ ଚାଷୀଙ୍କୁ ସରକାରୀ ସହାୟତା ଯୋଗାଇ ଦେବା ଭଳି ଅନେକ କାର୍ଯ୍ୟ ଠପ୍ ହୋଇଛି। କାର୍ଯ୍ୟାଳୟରେ ୨ମାସରୁ ଊର୍ଦ୍ଧ୍ୱକାଳ ଏହି ସମସ୍ୟା ଲାଗି ରହିଛି। ତେଣୁ କୃଷି ଅଧିକାରୀ ପଦବୀ ୨ଟିକୁ ତୁରନ୍ତ ପୂରଣ କରିବା ପାଇଁ ବିଭିନ୍ନ ମହଲରେ ଦାବି ହେଉଛି।
ସୂଚନା ମୁତବାକ, ବ୍ଲକ କୃଷି କାର୍ଯ୍ୟାଳୟ ଅଧୀନରେ ୨୮ ପଞ୍ଚାୟତ ରହିଛି। ଏସବୁ ପଞ୍ଚାୟତରେ ୩୦ ହଜାରରୁ ଊର୍ଦ୍ଧ୍ୱ କୃଷକ ପରିବାର ରହିଛନ୍ତି। ମାତ୍ର ୨ ଅଧିକାରୀ ନ ଥିବାରୁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ପ୍ରଣିତ ଯୋଜନା ଗୁଡ଼ିକ ସଫଳ ରୂପାୟନ ହୋଇପାରୁ ନାହିଁ। ଚାଷୀ ସରକାରୀ ଯୋଜନାର ଫାଇଦା ପାଇବାରୁ ବଞ୍ଚତ୍ତ ହେଉଛନ୍ତି। ସେହିପରି ୨୮ ଗ୍ରାମ୍ୟ କୃଷି କର୍ମଚାରୀ ଆବଶ୍ୟକତା ରହିଥିବା ବେଳେ ଅଛନ୍ତି ମାତ୍ର ୫ଜଣ। କାର୍ଯ୍ୟଳୟରେ କିରାଣି ଓ ପିଅନ ନାହାନ୍ତି। ସହକାରୀ କୃଷି ଅଧିକାରୀ ଭାଗ୍ୟଧର ସାହୁ ବ୍ଲକ କୃଷି ଅଧିକାରୀ ଦାୟିତ୍ୱରେ ଥିଲେ। ତାଙ୍କର ଅନ୍ୟତ୍ର ବଦଳି ପରେ ଦୀର୍ଘବର୍ଷ ଖାଲିପଡ଼ିଥିବା ବ୍ଲକ କୃଷି ଅଧିକାରୀଙ୍କ ପଦବୀ ପୂରଣ ହୋଇଛି। ମାତ୍ର ସହକାରୀ କୃଷି ଅଧିକାରୀ ନ ଥିବାରୁ ବିଦାୟୀ ସହକାରୀ କୃଷି ଅଧିକାରୀ ଦାୟିତ୍ୱ ହସ୍ତାନ୍ତର କରିପାରୁ ନାହାନ୍ତି। ଏ ସମ୍ପର୍କରେ ବ୍ଲକ କୃଷି ଅଧିକାରୀ ମିଶ୍ର କହିଛନ୍ତି, ସହକାରୀ କୃଷି ଅଧିକାରୀ ପଦବୀ ପୂରଣ ନ ହେବା ପର୍ଯ୍ୟନ୍ତ ସମସ୍ୟା ଲାଗି ରହିବ। ବଦଳି ହୋଇଥିବା ସହକାରୀ କୃଷି ଅଧିକାରୀଙ୍କଠାରୁ ସେ ଦାୟିତ୍ୱ ଗ୍ରହଣ କରିପାରିବେ ନାହିଁ। ଦାୟିତ୍ୱ ହସ୍ତାନ୍ତର କାର୍ଯ୍ୟ ଯେ ପର୍ଯ୍ୟନ୍ତ ବିଳମ୍ବ ହେଉଥିବ, କୃଷି ଓ କୃଷକ ଉନ୍ନୟନ କାର୍ଯ୍ୟ ନିଷ୍ପତ୍ତି ନେବାରେ ଅସୁବିଧା ହେବ।
