ଅନୁଗୋଳ ଅଫିସ, ୧୯।୧୨: ଅନୁଗୋଳ ଜିଲାରେ ଚାଷୀଙ୍କଠାରୁ ଧାନ କିଣିବାକୁ ଗତବର୍ଷ ଅପେକ୍ଷା ଚଳିତବର୍ଷ ଅଧିକ ମଣ୍ଡି କରାଯାଇଛି। ହେଲେ ୫ ଦଫା ଦାବିନେଇ ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ) ସମ୍ପାଦକମାନେ କିଛିଦିନ ହେଲା ଆନ୍ଦୋଳନ ଚଳାଇଥିବାରୁ ପୂର୍ବ ନିର୍ଦ୍ଧାରିତ ତାରିଖ ଡିସେମ୍ବର ୨୨ରେ ଜିଲାରେ ଧାନକିଣା ଆରମ୍ଭ ହୋଇପାରିବ ନାହିଁ। ଏ ନେଇ ଜିଲା ପ୍ରଶାସନ ଚିନ୍ତାରେ ଥିବାବେଳେ ଶୁକ୍ରବାର ରାଜ୍ୟ ସରକାରଙ୍କ ବିଭିନ୍ନ ଅଧିକାରୀଙ୍କ ସହ ବୈଠକ ପରେ ଧାନ କିଣା ତାରିଖ ଡିସେମ୍ବର ୩୧କୁ ଘୁଞ୍ଚାଇ ଦିଆଯାଇଛି।
ଚାଷ ଆରମ୍ଭରୁ ଅନିୟମିତ ବର୍ଷା କାରଣରୁ ଚଳିତବର୍ଷ ଅନୁଗୋଳ ଜିଲାର ଧାନ ଚାଷ ଲକ୍ଷ୍ୟଧାର୍ଯ୍ୟ ଛୁଇଁପାରି ନାହିଁ। ଅଧା ବ୍ଲକରେ ମରୁଡ଼ି ଭଳି ସ୍ଥିତି ଧାନ ଚାଷରେ ବାଧକ ସାଜିଥିଲା। ବିଳମ୍ବରେ ଲଘୁଚାପ ଜନିତ ବର୍ଷା ଯୋଗୁ ଚାଷ କାର୍ଯ୍ୟ କିଛିଟା ଆଗେଇଥିଲା। ହେଲେ ଧାନ ପାଚିଲା ବେଳକୁ ବାତ୍ୟା ଜଓ୍ବାଦ ଜନିତ ବର୍ଷାରେ ବହୁ ଫସଲ ନଷ୍ଟ ହୋଇଯାଇଛି। ଯାହାକିଛି ଚାଷୀ ଅମଳ କରୁଛନ୍ତି, ତାହାକୁ କିପରି ବିକ୍ରି କରାଯିବ ସେ ନେଇ ସରକାର ବିଚାରବିମର୍ଶ ଚଳାଇଥିବା ବେଳେ ପ୍ୟାକ୍ସ ସମ୍ପାଦକମାନଙ୍କ ଆନ୍ଦୋଳନ ସମସ୍ୟା ବଢ଼ାଇ ଦେଇଛି। ଏବେ ପୁଣି ସ୍ବୟଂ ସହାୟକ ଗୋଷ୍ଠୀଙ୍କୁ ନେଇ ଧାନ ମଣ୍ଡି କରିବାକୁ ସରକାରୀସ୍ତରରେ ଆଲୋଚନା କରାଯାଉଛି। ପୂର୍ବପ୍ରସ୍ତୁତି କରାଯାଇ ନ ଥିବାରୁ ସ୍ବୟଂ ସହାୟକ ଗୋଷ୍ଠୀକୁ ଦାୟିତ୍ୱ ଦିଆଗଲେ ଚାଷୀମାନେ ଆହୁରି ସମସ୍ୟା ଭୋଗିପାରନ୍ତି ବୋଲି ଆଲୋଚନା ହେଉଛି। ଏ ସମ୍ପର୍କରେ ଅନୁଗୋଳ ଯୋଗାଣ ବିଭାଗ ଅଧିକାରୀ ସ୍ମିତା ନାୟକ କହିଛନ୍ତି, ଜିଲାରେ ଗତବର୍ଷ ୯୨ଟି ଧାନ ମଣ୍ଡି ଖୋଲାଯାଇଥିଲା। ଚଳିତବର୍ଷ ଏହାକୁ ୯୪କୁ ବୃଦ୍ଧି କରାଯାଇଛି। ତେବେ ପ୍ୟାକ୍ସ ସମ୍ପାଦକମାନେ ଆନ୍ଦୋଳନ କରୁଥିବାରୁ ଧାନ ମଣ୍ଡି ଖୋଲିବା ତାରିଖ ୩୧କୁ ଧାର୍ଯ୍ୟ କରାଯାଇଛି। ଶୁକ୍ରବାର କୋଅପରେଟିଭ ସୋସାଇଟି ରେଜିଷ୍ଟର ଓ ରାଜ୍ୟ ସରକାରଙ୍କ ଅଧିକାରୀମାନେ ଭିଡିଓ କନଫରେନ୍ସିଂ ଯୋଗେ ଆଲୋଚନା କରିଥିଲେ। ଏ ନେଇ ଜିଲାପାଳଙ୍କୁ ଅବଗତ କରାଯାଇଛି। ସୋମବାର ମୁଖ୍ୟ ଶାସନ ସଚିବ ଭିଡିଓ କନଫରେନ୍ସିଂ ମାଧ୍ୟମରେ ଆଲୋଚନା କରିବା ପରେ ମଣ୍ଡି ଖୋଲାଯିବା ସମ୍ପର୍କିତ ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ଯୋଗାଣ ଅଧିକାରୀ ସୂଚନା ଦେଇଛନ୍ତି।
