ଅନୁଗୋଳ ଅଫିସ, ୧।୨: ସଦର ଥାନା ଖୋଲାଯିବା ପରେ ଅନୁଗୋଳ ଥାନା ଉପରୁ ଚାପ ହ୍ରାସ ପାଇଛି। କିନ୍ତୁ ସେହି ଅନୁସାରେ ଆପରାଧିକ କାର୍ଯ୍ୟକଳାପ କମୁନାହିଁ। ପାଟ୍ରୋଲିଂ କଡ଼ାକଡ଼ି କରାଯାଉ ନ ଥିବାରୁ ସହରର ବିଭିନ୍ନ ସ୍ଥାନରେ ଅସାମାଜିକମାନେ ଆଡ୍ଡା ଜମାଇବା ସହ ଛିନ୍ତାଇ, ଚୋରି ଓ ଡକାୟତି ଘଟଣା ବୃଦ୍ଧି ପାଇବାରେ ଲାଗିଛି। ଏ ନେଇ ଅଭିଯୋଗ ପରେ ପୋଲିସ ମାମଲା ରୁଜୁ ସହ ଅଭିଯୁକ୍ତଙ୍କୁ ଗିରଫ କରି ଚୁପ୍ ବସିଯାଉଥିବାରୁ ସହରବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଥାନା ଅଞ୍ଚଳରେ କିପରି ଅପରାଧ ରୋକାଯାଇପାରିବ ତାହା ଉପରେ ଗୁରୁତ୍ୱ ଦିଆଯାଉ ନ ଥିବାବେଳେ ଗଞ୍ଜେଇ, ବ୍ରାଉନସୁଗାର କାରବାର ବଢ଼ି ବଢ଼ି ଚାଲିଛି।
ପୂର୍ବରୁ ଅନୁଗୋଳ ଥାନା ଅଧୀନରେ ୨୩ଟି ପଞ୍ଚାୟତ ସହ ପାଖାପାଖି ଶହେ ଗାଁ ରହିଥିଲା। ଗତ ଡିସେମ୍ବର ମାସରେ ସଦର ଥାନା ସ୍ଥାପନ ପରେ ୧୮ଟି ପଞ୍ଚାୟତ ଓ ୮୩ଟି ଗ୍ରାମରେ ଆଇନଶୃଙ୍ଖଳା ଦାୟିତ୍ୱ ଏହି ଥାନା ଉପରକୁ ଚାଲିଆସିଛି। ଅବଶିଷ୍ଟ ୫ଟି ପଞ୍ଚାୟତ ସହ ଅନୁଗୋଳ ପୌରପାଳିକା ଅଞ୍ଚଳ ଅନୁଗୋଳ ଥାନା ଅଧୀନରେ ରହିଛି। ସୀମା ସଂକୁଚିତ ହୋଇଥିବାରୁ ଅନୁଗୋଳ ଥାନା ପୋଲିସ ଆପରାଧିକ କାର୍ଯ୍ୟକଳାପ ହ୍ରାସ ଦିଗରେ ସଫଳତା ପାଇବା କଥା। କିନ୍ତୁ ଦିନକୁ ଦିନ ଆଇନଶୃଙ୍ଖଳା ପରିସ୍ଥିତି ବିଗିଡ଼ିବାରେ ଲାଗିଛି। ଡକାୟତ ଗୋଷ୍ଠୀ ସକ୍ରିୟ ରହିଥିବାବେଳେ ନିଶା କାରବାର ବୃଦ୍ଧି ପାଉଛି। ସହର ଓ ଏହା ଉପକଣ୍ଠରେ ଥିବା ବହୁ ନିରୋଳା ସ୍ଥାନରେ ଅପରାଧର ଯୋଜନା ପ୍ରସ୍ତୁତ କରାଯାଉଛି। ଗତ ସପ୍ତାହରେ ନିଶା କାରବାର ସନ୍ଦେହରେ ଅନୁଗୋଳ ଥାନା ଅଧିକାରୀ ୭ରୁ ୮ ଜଣ ଯୁବକଙ୍କୁ ରାତିରେ ଉଠାଇ ଆଣିଥିଲେ। ହେଲେ ରାତି ଅଧରେ ୪ ଜଣଙ୍କୁ ଛାଡ଼ିଦେଇଥିଲେ। ସେହିପରି ଛିନ୍ତାଇ ଗୋଷ୍ଠୀ ଏବେ ସହରରେ ସକ୍ରିୟ ହୋଇପଡ଼ିଛନ୍ତି। ମହିଳାଙ୍କ ବେକ, କାନରୁ ଗହଣା ସହ ବ୍ୟାଙ୍କରୁ ମୋଟା ଅଙ୍କର ଟଙ୍କା ନେଇ ଆସୁଥିବା ଲୋକଙ୍କୁ ଟାର୍ଗେଟ କରୁଛନ୍ତି। କାଲଟାକ୍ସ ଛକରେ ଜଣେ ମହିଳାଙ୍କଠାରୁ ଛିନତାଇ କରାଯାଇଛି। ଗତମାସରେ ଜଣେ ବରିଷ୍ଠ ନାଗରିକଙ୍କ ନିକଟରୁ ବସ୍ଷ୍ଟାଣ୍ଡ ସମ୍ମୁଖରୁ ୨୦ ହଜାର ଟଙ୍କା ଝାମ୍ପି ନିଆଯାଇଛି। ଗତ ୨୧ ତାରିଖରେ ଦିବାଲୋକରେ ବିକାଶନଗର ଗାୟତ୍ରୀ ଭିଲାର ଜଣଙ୍କ ଘରୁ ଟଙ୍କା ଓ ସୁନା ଚୋରି ହୋଇଛି। ୧୧ ତାରିଖରେ ଧର୍ମଶାଳା ନିକଟରେ ଡିକି ଭାଙ୍ଗି ଟଙ୍କା ଲୁଟ୍ ଉଦ୍ୟମ କରାଯାଇଛି। ୧୫ ତାରିଖରେ ଶୁଶୁଡ଼ା ପଞ୍ଚାୟତ ଗୋପୀନାଥପୁରରୁ ଟ୍ରାନ୍ସଫର୍ମର ଚୋରି ହୋଇଥିବାବେଳେ ମିଶ୍ରପଡ଼ା ଛକରେ ଜଣେ ଚିକେନ ଦୋକାନୀଙ୍କୁ ମରଣାନ୍ତକ ଆକ୍ରମଣ ହୋଇଛି। ଦୁଇଦିନ ତଳେ ଶିକ୍ଷକପଡ଼ା ଛକରେ ମଧ୍ୟ ଜଣେ ଯୁବକଙ୍କୁ ଆକ୍ରମଣ ସହ ସୁନା ଚେନ୍ ଓ ୩ ଲକ୍ଷ ଟଙ୍କା ଲୁଟ୍ କରାଯାଇଛି। ରାଣୀଗୁଡ଼ା ଷ୍ଟେଶନ ଛକରେ ସନ୍ଧ୍ୟା ହେଲେ ଅସାମାଜିକଙ୍କ ଆଡ୍ଡା ଜମୁଛି। ଏପରି ଅଭିଯୋଗର ତାଲିକା ଲମ୍ବୁଥିବା ବେଳେ ଅନୁଗୋଳ ଥାନା ପୋଲିସ କେବେ ଆଇନଶୃଙ୍ଖଳାରେ ଉନ୍ନତି ଆଣିପାରିବ ତାହାକୁ ସହରବାସୀ ଅପେକ୍ଷା କରିଛନ୍ତି।
ସହର ଉପକଣ୍ଠକୁ ଗାଡ଼ି ଗଡ଼ୁନି
ଅନୁଗୋଳ ପୋଲିସ ପକ୍ଷରୁ କରାଯାଉଥିବା ପାଟ୍ରୋଲିଂ କେବଳ ସହରରେ ସୀମିତ ରହିଯାଉଛି। ଉପକଣ୍ଠ ଅଞ୍ଚଳ ଯାଏ ଏହି ଗାଡ଼ି ଗଡ଼ୁ ନ ଥିବାରୁ ଏଠାରେ ଅପରାଧ ବଢ଼ୁଛି। ଆବଶ୍ୟକ ବେଳେ ଫୋନ କଲେ ତୁରନ୍ତ ଘଟଣାସ୍ଥଳରେ ପୋଲିସ ପହଞ୍ଚତ୍ ପାରୁନାହିଁ। ଏ ଦିଗରେ ଅଧିକ ଦୃଷ୍ଟି ଦିଆଗଲେ ଲୋକଙ୍କ ଭରସା ଓ ବିଶ୍ୱାସ ଅତୁଟ ରହିପାରିବ।
-ନେତ୍ରାନନ୍ଦ ସାମନ୍ତ, ବୁଦ୍ଧିଜୀବୀ
ଅପରାଧର ମୂଳ ଖୋଜାଯାଉ ନାହିଁ
ଅନୁଗୋଳ ଥାନା ସୀମା ହ୍ରାସପାଇଛି। କିନ୍ତୁ ଗୋଇନ୍ଦା ଦୁର୍ବଳ ଯୋଗୁ ଥାନା ଅଞ୍ଚଳରେ ବିଭିନ୍ନ ଅପରାଧ ବଢ଼ିବାରେ ଲାଗିଛି। ଥାନାରେ ମାମଲା ହେଲେ ଅଭିଯୁକ୍ତଙ୍କୁ ଧରି କୋର୍ଟ ଚାଲାଣ କରିଦେଲେ କାମ ସାରିଦେଉଛି ବୋଲି ପୋଲିସ ଭାବୁଛି। ଅପରାଧର ମୂଳଦୁଆ ଖୋଜାଯାଉ ନାହିଁ। ଫଳରେ ଅପରାଧୀମାନେ ସେମାନଙ୍କ ସାମ୍ରାଜ୍ୟ ବିସ୍ତର କରିଚାଲିଛନ୍ତି।
– ଭୂପେଶ ଚନ୍ଦ୍ର ପ୍ରଧାନ, କାର୍ଯ୍ୟକାରୀ ସଭାପତି, ଅଲଓଡ଼ିଶା ଆଇନଜୀବୀ ପରିଷଦ
ଅସୁରକ୍ଷିତ ହୋଇପଡ଼ିଲେଣି ସହରବାସୀ
ଅନୁଗୋଳ ସହରର ବହୁ ସ୍ଥାନରେ ଅସାମାଜିକମାନେ ଆଡ୍ଡା ଜମାଉଛନ୍ତି। ସୁଯୋଗ ପାଇଲେ ସେମାନେ କେତେବେଳେ ଛିନ୍ତାଇ କରୁଛନ୍ତି ଆଉ କେବେ ଡକାୟତି। ତେଣୁ ସହରବାସୀ ଅସୁରକ୍ଷିତ ହୋଇପଡ଼ିଲେଣି। ଅପରାଧୀଙ୍କୁ ସାବାଡ୍ କରିବା ସହ ଲୋକଙ୍କୁ ସହଯୋଗ କରିବା ମନୋବୃତ୍ତି ନେଇ ପୋଲିସ କାର୍ଯ୍ୟ କରିବା ଆବଶ୍ୟକ।
– ସୋମନାଥ ରାଉତ, ସମ୍ପାଦକ, ଅନୁଗୋଳ ବାର୍ ଆସୋସିଏଶନ୍
ପାଟ୍ରୋଲିଂ କଡ଼ାକଡ଼ି କରାଯିବ
ଅନୁଗୋଳରେ ପାଟ୍ରୋଲିଂ ବ୍ୟବସ୍ଥାକୁ ବଢ଼ାଯିବ। ବ୍ରାଉନସୁଗାର ଓ ଗଞ୍ଜେଇ ବେପାର ଚାଲୁଥିବା ଅଞ୍ଚଳ ଉପରେ ସ୍ବତନ୍ତ୍ର ନଜର ରଖାଯିବ। ପୂର୍ବରୁ ଅନୁଗୋଳ ଥାନାରେ ଯେତିକି ପାଟ୍ରୋଲିଂ ଗାଡ଼ି ଥିଲା, ଏବେ ମଧ୍ୟ ରହିଛି। ବିଜୁ ମଇଦାନ ଓ ବଜାରରେ ଭିଡ଼ ନିୟନ୍ତ୍ରଣ କରିବା ଉପରେ ଅଧିକ ପ୍ରାଧାନ୍ୟ ଦିଆଯାଉଥିଲା। ଏବେ ଗ୍ରାମାଞ୍ଚଳ ସହ ସହରାଞ୍ଚଳରେ ପାଟ୍ରୋଲିଂ ବ୍ୟବସ୍ଥା କଡ଼ାକଡ଼ି କରାଯିବ।
– ଜଗମୋହନ ମୀନା, ଏସ୍ପି, ଅନୁଗୋଳ
