ଟୋକିଓ ଅଲିମ୍ପିକ୍ସରେ ସ୍ବର୍ଣ୍ଣପଦକ ଜିତି ଇତିହାସ ରଚିଥିବା ଜାଭେଲିନ୍ ଥ୍ରୋଓର ନୀରଜ ଚୋପ୍ରା ଏବେ ଅଜବ ପ୍ରଶ୍ନସବୁର ସାମ୍ନା କରୁଛନ୍ତି। ଭାରତ ଫେରିବା ପରେ ନୀରଜଙ୍କ ଉପରେ ଖାଲି ପ୍ରଶ୍ନ ବର୍ଷା। ସବୁଠୁ ଆଶ୍ଚର୍ଯ୍ୟର କଥା ଏଥର ଯେଉଁ ପ୍ରଶ୍ନ ପଚରାଯାଇଛି ତାହା କୌଣସି ଖେଳ କିମ୍ବା ତାଲିମକୁ ନେଇ ନୁହେଁ। ତାଙ୍କର ବ୍ୟକ୍ତିଗତ ଜୀବନକୁ ନେଇ । ଏହି ପ୍ରଶ୍ନ ଶୁଣି ନୀରଜଙ୍କ ପ୍ରଶଂସକମାନେ ମଧ୍ୟ ଚିହିଁକି ଉଠିଛନ୍ତି।
ଏକ ରେଡିଓ କାର୍ଯ୍ୟକ୍ରମରେ ନିଆଯାଇଥିବା ନୀରଜଙ୍କ ସାକ୍ଷାତକାର ଭିଡିଓ କ୍ଲିପ୍ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଏହି ସାକ୍ଷାତକାରରେ ନୀରଜ ଏମିତି ପ୍ରଶ୍ନକୁ ଅଣଦେଖା କରିବା ସହ ସରି କହିଛନ୍ତି। ଏହି ସାକ୍ଷାତକାରରେ ଜଣାଶୁଣା ଡିଜାଇନର ତଥା ଉପସ୍ଥାପକ ରାଜୀବ ସେଠୀ ନୀରଜଙ୍କୁ ପଚାରୁଛନ୍ତି, ତୁମେ ଖେଳ ଏବଂ ସେକ୍ସ ଲାଇଫ୍ରେ କେମିତି ବାଲାନ୍ସ କର। ରାଜୀବଙ୍କଠାରୁ ଏପରି ପ୍ରଶ୍ନ ଶୁଣି ନୀରଜ ବାରମ୍ବାର ସରି କହୁଥିବା ନଜର ଆସିଛନ୍ତି। ତଥାପି ରାଜୀବ ନୀରଜଙ୍କୁ ସେହି ପ୍ରଶ୍ନ ଦୋହରାଉଛନ୍ତି। ଏହା ପରେ ନୀରଜ କହିଛନ୍ତି, ମୁଁ ସରି କହିବା ପରେ ଆପଣ ଏଥିରୁ କ’ଣ କିଛି ବୁଝିପାରିଲେନି। ପ୍ଲିଜ୍ ମୋତେ ଏ ପ୍ରଶ୍ନ ପଚାରନ୍ତୁ ନାହିଁ। ଏହା ପରେ ରାଜୀବ କହୁଛନ୍ତି, ମୁଁ ଜାଣିଛି ଏ ପ୍ରଶ୍ନ ଆପଣଙ୍କୁ ଅଖାଡୁଆ ଲାଗିବ ତଥାପି ଏହା ପଛରେ ଏକ କାରଣ ଲୁଚି ରହିଛି। ଏ ପ୍ରଶ୍ନର ଉତ୍ତର ନୀରଜଙ୍କ ପାଖରେ ନ ଥିଲା। ରାଜୀବ କହିଛନ୍ତି, ମୁଁ ଜାଣିଛି ଏ ପ୍ରଶ୍ନର ଉତ୍ତର ନୀରଜ ଦେଇପାରିବେ ନାହିଁ।
ଅନ୍ୟପକ୍ଷରେ ନୀରଜଙ୍କୁ ଏପରି ପ୍ରଶ୍ନ ପଚାରିବା ରାଜୀବଙ୍କୁ ଭାରି ପଡ଼ିଛି। ଜଣେ ୟୁଜର ଲେଖିଛନ୍ତି, ରାଜୀବ ସେଠୀ କରଣ ଜୋହରଙ୍କ ପରି ନୀରଜଙ୍କୁ ସେକ୍ସ ଲାଇଫ୍ ବିଷୟରେ ପଚାରୁଛନ୍ତି। ମାତ୍ର ନୀରଜ ହାର୍ଦ୍ଦିକ ପାଣ୍ଡ୍ୟାଙ୍କ ପରି ପ୍ରଶ୍ନର ଉତ୍ତର ନ ଦେଇ ତାଙ୍କୁ ନିରାଶ କରିଦେଇଛନ୍ତି। ସେହିପରି ଆଉ ଜଣେ ୟୁଜର କହିଛନ୍ତି, ଯଦି ଜଣେ ଝିଅକୁ ଏହି ପ୍ରଶ୍ନ ପଚରାଯାଇଥାନ୍ତା ତେବେ ଏହାକୁ ଯୌନ ଶୋଷଷ କୁହାଯାଇଥାନ୍ତା।
