ଯାଜପୁରରୋଡ୍,୫ା୧୦(ପବିତ୍ର ରଞ୍ଜନ ମହାନ୍ତି):ବିଦ୍ୟୁତ୍ ବିଭାଗର ଖାମଖିଆଲି ନୀତି ବହୁ ସମୟରେ ସାଧାରଣ ଲୋକ ଓ ଜୀବଜନ୍ତୁଙ୍କ ଜୀବନ ପ୍ରତି ବିପଦ ସୃଷ୍ଟି କରୁଛି। ବିଦ୍ୟୁତ୍ ଆଘାତରେ ପ୍ରତ୍ୟେକ ଦିନ ବହୁ ଅଘଟଣ ଘଟିବାସହ ଧନଜୀବନ ହାନି ହେଉଛି। ରାଜ୍ୟ ସରାକର ବିଦ୍ୟୁତ୍ ସେବାକୁ ଟାଟା ପାୱାର ହାତରେ ଟେକି ଦେବା ପରେ କମ୍ପାନୀ ସାଧାରଣ ଲୋକଙ୍କ ସୁରକ୍ଷା ପ୍ରତି ଆଖିବୁଜି ଦେଇଥିବା ଅଭିଯୋଗ ହୋଇଛି। ଏହାର ଏକ ଉଦାହରଣ ଦେଖିବାକୁ ମିଳିଛି ଯାଜପୁରରୋଡ୍ ବିଦ୍ୟୁତ୍ ବିଭାଗ ଅଧୀନ ନହକା ଚାନ୍ଦମା ରାସ୍ତାର ଶିବ ମନ୍ଦିର ନିକଟରେ। ଏହି ରାସ୍ତାଟି କୋରେଇ ନିର୍ବାଚନମଣ୍ଡଳୀରୁ ବ୍ୟାସନଗର ସହରକୁ ସଂଯୋଗ କରୁଥିବା ଏକ ପ୍ରମୁଖ ରାସ୍ତା। ତତ୍ସହିତ ପୌର ପରିଷଦର ୩ଟି ୱାର୍ଡର ବାସିନ୍ଦା ଏହି ରାସ୍ତା ଦେଇ ଯାତାୟାତ କରିଥାନ୍ତି। ଫଳରେ ଉକ୍ତ ରାସ୍ତାଟି ସବୁସମୟରେ ବ୍ୟସ୍ତ ରହିଥାଏ। ବିଦ୍ୟୁତ୍ ଟ୍ରାନ୍ସଫର୍ମରଟି ରାସ୍ତା ଉପରକୁ ମାଡ଼ିଆସିଛି। ଉକ୍ତ ଟ୍ରାନ୍ସଫର୍ମରକୁ ଲାଗି ରହିଥିବା ଘରେ ଲୋକେ ବସବାସ କରୁଛନ୍ତି। ବିଦ୍ୟୁତ୍ ଟ୍ରାନ୍ସଫର୍ମରକୁ ମାଡ଼ିଥିବା ଗୁଳ୍ମଲତା ଘରକୁ ମଧ୍ୟ ମାଡ଼ିରହିଛି। ଏହା ବିପଦକୁ ଡାକୁଛି ବୋଲି ଅଭିଯୋଗ ହୋଇଛି। ଟ୍ରାନ୍ସଫର୍ମର ବାଡ଼ ଗୁଳ୍ମଲତାରେ ପରିପୂର୍ଣ୍ଣଥିବାରୁ ଦୁଇଟି ରାସ୍ତାକୁ ସଂଯୋଗ କରୁଥିବା ଉକ୍ତ ଛକରେ ଦିଗ ନିୟନ୍ତ୍ରଣ କରି ନ ପାରି ଗାଡ଼ି ଚାଳକ ଓ ପଥଚାରୀ ଦୁର୍ଘଟଣାର ଶିକାର ହେଉଛନ୍ତି। ତେଣୁ ଟାଟା ପାୱାର କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଦୃଷ୍ଟି ଦେଇ ସମସ୍ୟାର ସମାଧାନ କରିବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ଟାଟା ପାୱାରର ଯାଜପୁରରୋଡ୍ ଉପଖଣ୍ଡ ସହକାରୀ ଯନ୍ତ୍ରୀ ପ୍ରଦ୍ୟୁମ୍ନ କୁମାର ବରାଳଙ୍କୁ ପଚାରିବାରେ ସେ କହିଛନ୍ତି, ଏ ଦିଗରେ ଦୃଷ୍ଟିଦେବାକୁ ସେ ଉଚ୍ଚ ଅଧିକାରୀଙ୍କୁ ଜଣାଇଛନ୍ତି। ଏବେ ଦେଖିବାକୁ ଅପେକ୍ଷା ଉଚ୍ଚ କର୍ତ୍ତୃପକ୍ଷ କେବେ ଏହାର ସମାଧାନ କରୁଛନ୍ତି।
