ନୂଆଦିଲ୍ଲୀ, ୨୧ା୭ (ପି.ଟି.)- ଚଳିତ ବର୍ଷର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଆୟୋଜନ ସମ୍ଭାବନା ଅଧିକ ବୋଲି କହିଛନ୍ତି ଏହି ଟି୨୦ ଟୁର୍ନାମେଣ୍ଟର ଗଭର୍ନିଂ କାଉନ୍ସିଲ ଚେୟାରମ୍ୟାନ ବ୍ରିଜେଶ ପଟେଲ। ଏକ ସପ୍ତାହରୁ ୧୦ ଦିନ ମଧ୍ୟରେ ଗଭର୍ନିଂ କାଉନ୍ସିଲ ବୈଠକ ବସିବ। ଏଥିରେ ଆଇପିଏଲ ପାଇଁ ଯୋଜନା ପ୍ରସ୍ତୁତ କରାଯିବ। କୋଭିଡ୍-୧୯ ମହାମାରୀ ଯୋଗୁ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ସୋମବାର ଅଷ୍ଟ୍ରେଲିଆରେ ଅକ୍ଟୋବର-ନଭେମ୍ବରରେ ହେବାକୁଥିବା ଟି୨୦ ବିଶ୍ୱକପ୍କୁ ସ୍ଥଗିତ ରଖିବା ଲାଗି ନିଷ୍ପତ୍ତି ନେଇଛି। ପଟେଲ କହିଛନ୍ତି, ବର୍ତ୍ତମାନ ଯାହା ଯୋଜନା ରହିଛି ୬୦ଟି ଗେମ୍ ସହ ଆଇପିଏଲ ପୂରାମାତ୍ରାରେ ଆୟୋଜନ କାର୍ଯ୍ୟକ୍ରମ ରହିଛି। ସାକ୍ଷାତ୍କାର ବେଳେ ସେ କହିଛନ୍ତି, ବର୍ତ୍ତମାନ ପରିସ୍ଥିତିରେ କୌଣସି ଇଭେଣ୍ଟ ଆୟୋଜନ କରିବା ନିହାତି ଏକ ବଡ଼ ଚ୍ୟାଲେଞ୍ଜ। ହେଲେ ନିଜ ଦେଶ ହେଉ ଅବା ବିଦେଶରେ ବିନା ଦର୍ଶକରେ ଟୁର୍ନାମେଣ୍ଟ ଆୟୋଜନ କରିବା ସେତେଟା ସମସ୍ୟା ରହିବ ନାହିଁ। ଏପରିକି ଆଇସିସିର ଘୋଷଣା ପୂର୍ବରୁ ଫ୍ରାଞ୍ଚାଇଜ୍ଗୁଡ଼ିକ ଆଇପିଏଲ ପାଇଁ ସେମାନଙ୍କ ଯୋଜନା ଅନୁସାରେ କାର୍ଯ୍ୟ ଆରମ୍ଭ କରିସାରିଛନ୍ତି। ମହାମାରୀ ଯୋଗୁ ଅଧିକାଂଶ ଭାରତୀୟ ଖେଳାଳି ପଡ଼ିଆର ସୁବିଧା ପାଉ ନାହାଁନ୍ତି। ମ୍ୟାଚ୍ ଲାଗି ପ୍ରସ୍ତୁତି ସକାଶେ ସେମାନଙ୍କୁ ଅତି କମ୍ରେ ୩ରୁ ୪ ସପ୍ତାହ ସମୟ ଦରକାର। ବିଦେଶୀ ଖେଳାଳିମାନେ ସେମାନଙ୍କ ଦେଶରୁ ସିଧାସଳଖ ଯାଇ ୟୁଏଇରେ ପହଞ୍ଚତ୍ବେ। ବିସିସିଆଇ ତାରିଖ ଧାର୍ଯ୍ୟ କରିବା ପରେ ଆମେ ଆମର ସମସ୍ତ ଯୋଜନା ଚୂଡ଼ାନ୍ତ କରିବୁ ବୋଲି ପଟେଲ କହିଛନ୍ତି। ଅନ୍ୟପକ୍ଷରେ ଆଇପିଏଲ ପରେ ୪ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବା ଲାଗି ଅଷ୍ଟ୍ରେଲିଆ ଟୁର୍ରେ ଯିବ ଭାରତ। ଏଥିପାଇଁ ଟେଷ୍ଟ ଖେଳାଳିଙ୍କ ଟ୍ରେନିଂ ମଧ୍ୟ ଗୁରୁତ୍ୱପୂର୍ଣ୍ଣ। ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ଓ ହନୁମା ବିହାରୀଙ୍କ ଭଳି ଖେଳାଳି ଆଇପିଏଲ୍ରେ ଭାଗ ନେବେ ନାହିଁ। ଆଇପିଏଲ୍ ବେଳେ ସିରିଜ ପାଇଁ ସେମାନେ ନବୀକରଣ କରାଯାଇଥିବା ଅହମ୍ମଦାବାଦର ମୋଟେରା ଷ୍ଟାଡିୟମରେ ଜୈବ ସୁରକ୍ଷିତ ପରିବେଶ ମଧ୍ୟରେ ଟ୍ରେନିଂ ନେବେ। ଭାରତୀୟ ଟିମ୍ର ସପୋର୍ଟ ଷ୍ଟାଫ୍ଙ୍କ ସହ ଆଇ କେତେଜଣ ଖେଳାଳି ମୋଟେରାରେ ସେମାନଙ୍କ ସହିତ ଟ୍ରେନିଂ ନେବେ।
