ରାସୋଳ, ୬।୪(ଡି.ଏନ୍.ଏ.) – ବିଦ୍ୟୁତ୍ ଭିତ୍ତିଭୂମି ନିର୍ମାଣ ଦାୟିତ୍ୱରେ ଥିବା କମ୍ପାନୀ ଦିନବେଳା ଯେଉଁ ସବୁ ଖୁଣ୍ଟ ପୋତୁଥିଲା, ସେସବୁକୁ ରାତିରେ ଯୋଜନାବଦ୍ଧ ଭାବେ ଗ୍ୟାସ୍ କଟରରେ ଖଣ୍ଡ ଖଣ୍ଡ କରି କାଟି ନେଉଥିଲେ ଅଭିଯୁକ୍ତ। କେବଳ ଖୁଣ୍ଟ ଉପରେ ନଜର ଥିଲା ତାହା ନୁହେଁ, ବିଦ୍ୟୁତ୍ କେବୁଲ, ଷ୍ଟେ-ଓ୍ବାୟର ମଧ୍ୟ ସେମାନଙ୍କ ଲୋଲୁପ ଦୃଷ୍ଟିରୁ ବାଦ୍ ପଡୁ ନ ଥିଲା। ଢେଙ୍କାନାଳ ଜିଲା ରାସୋଳ ପୋଲିସ ହାତରେ ପଡ଼ିଛନ୍ତି ଏଭଳି ଏକ ଚୋରି ଗ୍ୟାଙ୍ଗ୍ର ୬ଜଣ ସଦସ୍ୟ। ଗିରଫ ଅଭିଯୁକ୍ତ ହେଲେ ଓଡ଼ାପଡ଼ା ବ୍ଲକ କଣ୍ଟାବଣିଆ ଥାନା ଅଞ୍ଚଳର ପ୍ରତାପ ନାୟକ, ଅମି ନାୟକ, ଶ୍ରୀକାନ୍ତ ନାୟକ, ଟିକେଶ୍ୱର ନାୟକ, ସୁମନ୍ତ ନାୟକ ଏବଂ ଦିଲୀପ ନାୟକ। ସେମାନଙ୍କ ନିକଟରୁ ଏକ କାର୍ (ନଂ. ଓଆର୍ ୦୧ଏଲ୍ ୪୫୪୫), କଟାଯାଇଥିବା ବିଦ୍ୟୁତ୍ ତାର ଏବଂ ଖୁଣ୍ଟ ବୋଝେଇ ପିକ୍ଅପ୍ ଭ୍ୟାନ୍ (ନଂ. ଓଡି ୧୯ ଏନ୍ ୬୭୧୭), ଗ୍ୟାସ୍ କଟର, ସିଲିଣ୍ଡର ଜବତ କରାଯାଇଛି। ଏହି ଘଟଣା ପଛରେ କେତେଜଣ ମାଷ୍ଟରମାଇଣ୍ଡ୍ ଅଛନ୍ତି। ସେମାନଙ୍କୁ ଧରିବା ଲାଗି ପୋଲିସ ଉଦ୍ୟମ ଆରମ୍ଭ କରିଛି।
ପୋଲିସ ସୂଚନା ଅନୁଯାୟୀ, ଗୁପ୍ତା ପାଓ୍ବାର ଇନ୍ଫ୍ରାଷ୍ଟ୍ରକ୍ଚର ନାମକ ଏକ ଠିକାସଂସ୍ଥା ଓପିଟିସିଏଲ୍ ବିଦ୍ୟୁତ୍ ଭିତ୍ତିଭୂମି ନିର୍ମାଣ ଦାୟିତ୍ୱ ନେଇଛି। ଉକ୍ତ କମ୍ପାନୀ ହିନ୍ଦୋଳ ବ୍ଲକର ବାବନ୍ଧରୁ ହିନ୍ଦୋଳ ରୋଡ୍ ପର୍ଯ୍ୟନ୍ତ ବିଦ୍ୟୁତ୍ ସଂଯୋଗୀକରଣ କାର୍ଯ୍ୟ କରୁଛି। ଗତ ସୋମବାର ବିଳମ୍ବିତ ରାତିରେ କେତେଜଣ ଅଭିଯୁକ୍ତ ଗ୍ୟାସ୍ କଟର ସହାୟତାରେ ଲୁହା ଖୁଣ୍ଟ କାଟୁଥିବା କମ୍ପାନୀର କେତେଜଣ କର୍ମଚାରୀ ଦେଖି ପ୍ରତିବାଦ କରିଥିଲେ। ତେବେ ଅଭିଯୁକ୍ତମାନେ ସେମାନଙ୍କୁ ଭୟଭୀତ କରାଇ ଫେରାର ହୋଇଯିବାରେ ସକ୍ଷମ ହୋଇଥିଲେ। ସମ୍ପୃକ୍ତ କର୍ମଚାରୀ ଉପସ୍ଥିତ ବୁଦ୍ଧି ଖଟାଇ ଘଟଣା ସମ୍ପର୍କରେ ରାସୋଳ ଥାନାକୁ ସୂଚନା ଦେଇଥିଲେ। ଥାନାଧିକାରୀ ବିଜୟ କୁମାର ହାଇବ୍ରୁଙ୍କ ନିର୍ଦ୍ଦେଶରେ ସବ୍ଇନ୍ସପେକ୍ଟର ପି.ଏ. ଖାନ୍ ସଦଳବଳ ଘଟଣାସ୍ଥଳରେ ପହଞ୍ଚତ୍ଥିଲେ। ଅଭିଯୁକ୍ତଙ୍କୁ ଧରିବା ଲାଗି ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଇଥିବାବେଳେ ମୋଟଙ୍ଗା ଥାନା ଏବଂ ହିନ୍ଦୋଳ ରୋଡ୍ ଫାଣ୍ଡି ପୋଲିସକୁ ବିଭିନ୍ନ ସ୍ଥାନରେ ନାକାବନ୍ଦୀ କରିବାକୁ କୁହାଯାଇଥିଲା। ରାସ୍ତାରେ ଜଗିଥିବା ପୋଲିସ ଅଧିକାରୀଙ୍କୁ ଦେଖି ଗାଡ଼ିରେ ଆସୁଥିବା ଅଭିଯୁକ୍ତ ହଡ଼ବଡ଼େଇ ଯାଇଥିଲେ। ଫଳରେ ବହଣ୍ଡେଇ ନିକଟରେ ପିକ୍ଅପ୍ ଭ୍ୟାନ୍ ଭାରସାମ୍ୟ ହରାଇ ରାସ୍ତା କଡ଼କୁ ଖସିପଡ଼ିଥିଲା। ଅଭିଯୁକ୍ତମାନେ ଜଙ୍ଗଲିଆ ରାସ୍ତାରେ ଚମ୍ପଟ ମାରିବାକୁ ଉଦ୍ୟମ କରୁଥିବାବେଳେ ପୋଲିସ ଗୋଡ଼ାଇ ଗୋଡ଼ାଇ ସେମାନଙ୍କୁ କାବୁ କରିଥିଲା। ତେବେ ଏଭଳି ର଼୍ୟାକେଟ୍ ପଛରେ କେବଳ ଯେ ବାହାର ଲୋକଙ୍କ ସମ୍ପୃକ୍ତି ରହିଛି, ତାହାକୁ ସାଧାରଣ ଲୋକେ ସହଜରେ ଗ୍ରହଣ କରିପାରୁନାହାନ୍ତି। କମ୍ପାନୀର କେତେଜଣ କ୍ଷେତ୍ରସ୍ତରୀୟ କର୍ମଚାରୀଙ୍କ ଏଥିରେ ହାତ ଥିବା ସେମାନେ ଅନୁମାନ କରୁଛନ୍ତି। କମ୍ପାନୀ ଏବଂ ପୋଲିସ ପକ୍ଷରୁ ମିଳିତ ତଦନ୍ତ କରାଗଲେ ପ୍ରକୃତ ରହସ୍ୟ ଉନ୍ମୋଚିତ ହେବ ବୋଲି ବୁଦ୍ଧିଜୀବୀମାନେ କହିଛନ୍ତି।
ଏ ସଂକ୍ରାନ୍ତରେ ଥାନାଧିକାରୀ କୁହନ୍ତି, ଧରାପଡ଼ିଥିବା ଅଭିଯୁକ୍ତମାନେ ଶ୍ରମିକ ଶ୍ରେଣୀର। ଏମାନଙ୍କ ପଛରେ କେହି ଜଣେ ମାଷ୍ଟରମାଇଣ୍ଡ୍ ରହିଥିବା ଅନୁମାନ କରାଯାଉଛି। ଅଭିଯୁକ୍ତଙ୍କୁ ଜେରା କରାଯାଉଛି। ସେମାନଙ୍କୁ କୋର୍ଟ ଚାଲାଣ କରାଯିବ। ପଚରାଉଚରା ପରେ ର଼୍ୟାକେଟ୍ ସମ୍ପର୍କରେ ଅନେକ ତଥ୍ୟ ପଦାକୁ ଆସିବାର ସମ୍ଭାବନା ରହିଛି ବୋଲି ଥାନାଧିକାରୀ କହିଛନ୍ତି।
