ଖୋର୍ଦ୍ଧା ଅଫିସ, ୩ା୯:ରାଜୁଆ ଓ ଦୟା ଆଣିଛି ଦୁଃଖ। ଏହି ଦୁଇ ନଦୀରେ ଘାଇ ସୃଷ୍ଟି ହୋଇ ବନ୍ୟାଜଳ ଖୋର୍ଦ୍ଧା ଜିଲାର ଖୋର୍ଦ୍ଧା, ଜଟଣୀ, ବାଲିଅନ୍ତା, ବାଲିପାଟଣା ଓ ବେଗୁନିଆ ବ୍ଲକରେ ପ୍ରବେଶ କରି ବ୍ୟାପକ କ୍ଷତି ଘଟାଇଛି। ଖୋର୍ଦ୍ଧା ବ୍ଲକର ଓରବରସିଂ, ନରଣଗଡ଼ ଓ ବ୍ରଜମୋହନପୁର ପଞ୍ଚାୟତର ଅବସ୍ଥା ଶୋଚନୀୟ ହୋଇପଡ଼ିିଛି। ୩ ପଞ୍ଚାୟତର ୧୫ରୁ ଊର୍ଦ୍ଧ୍ୱ ଗ୍ରାମରେ ୧୦ ହଜାରରୁ ଊର୍ଦ୍ଧ୍ୱ ଗ୍ରାମବାସୀ ପ୍ରଭାବିତ ହୋଇଥିବାବେଳେ ୭ହଜାରରୁ ଊର୍ଦ୍ଧ୍ୱ ହେକ୍ଟର ଚାଷଜମି ଜଳମଗ୍ନ ହୋଇଛି।
ଗାଁ ଦାଣ୍ଡରେ ପାଣି ସୁଅ: ବିଭିନ୍ନ ଗାଁ ଦାଣ୍ଡରେ ଅଣ୍ଟାଏ ଉଚ୍ଚର ପାଣିସୁଅ ଚାଲିଛି। ଡଙ୍ଗା ନ ହେଲେ ଯାତାୟତ କରିବା ଅସମ୍ଭବ ହୋଇପଡ଼ିଛି। ଘରେ ପାଣି ପଶି ଆସବାବପତ୍ର ସବୁ ନଷ୍ଟ ହୋଇଛି।
ଶିଶୁ ଓ ଗର୍ଭବତୀଙ୍କ ସମସ୍ୟା: ଓରବରସିଂ ପଞ୍ଚାୟତର ଓରମି, ହିରିମୂଳ, ଡିହଖଳା, ଧବଳପୁର, ବଳପୁର, ନରଣଗଡ଼ ପଞ୍ଚାୟତର ନରଣଗଡ଼, ମାନପୁର ଏବଂ ବ୍ରଜ ମୋହନପୁର ପଞ୍ଚାୟତର ଶରଧାପୁର ପ୍ରଭୃତି ଅଞ୍ଚଳରେ ଦୁର୍ଦ୍ଦଶା ବଢିବାରେ ଲାଗିଛି। ପିଲା ଛୁଆ, ବୃଦ୍ଧାବୃଦ୍ଧ, ରୋଗୀ ଓ ଗର୍ଭବତୀଙ୍କ ସମସ୍ୟା ଦ୍ୱିଗଣିତ ହୋଇଛି।
ଶୁଖିଲା ଖାଦ୍ୟକୁ ଭରସା: ବିପନ୍ନଙ୍କ ପାଇଁ ରନ୍ଧାଖାଦ୍ୟ ସ୍ବପ୍ନ ପାଲଟିଛି। ଘରେ ପାଣି ପଶି ଡାଲି, ଚାଉଳ ସବୁ ଓଦା ହୋଇଯାଇଥିବାରୁ ରୋଷେଇ ସମ୍ଭବ ହେଉନାହିଁ। ଯେନତେନ ପ୍ରକାରେ ଚୁଡ଼ା, ବିସ୍କୁଟ ଆଦି ଶୁଖିଲା ଖାଦ୍ୟ ଖାଇ କଷ୍ଟେମଷ୍ଟେ ରହିବାକୁ ପଡୁଛି। ରୋଷଇ ଲାଗି କୌଣସି ସାଧନ ନ ଥିବା କେତେଜଣ ମହିଳା କହିଛନ୍ତି।
ପାଣି ପାଇଁ ଡହଳବିକଳ: ପାନୀୟଜଳ ସମସ୍ୟା ବିପନ୍ନଙ୍କ ମୁଣ୍ଡବ୍ୟଥା ବଢାଇଛି। ବିଶୁଦ୍ଧ ପାଣି ମୁନ୍ଦେ ପାଇବା ଲାଗି ସେମାନେ ଏବେ ଡହଳ ବିକଳ ହେଉଛନ୍ତି। ପର୍ଯ୍ୟାପ୍ତ ମାତ୍ରାରେ ପାଣିଟ୍ୟାଙ୍କର ଗ୍ରାମକୁ ଆସୁନାହିଁ। ଲୋକେ ପାଉଚ ପାଣି ପିଇ ଶୋଷ ମେଣ୍ଟାଉଛନ୍ତି। ରିଲିଫ ସାମଗ୍ରୀ ଓ ପାଣି ଲାଗି ଏକପ୍ରକାର ହାହାକାର ପରିସ୍ଥିତି ସୃଷ୍ଟି ହୋଇଛି।
ପ୍ରଶାସନର ଦେଖାନାହିଁ : ଗ୍ରାମର ଏକାଧିକ ଯୁବକ ପାଳି କରି କାହାର କୌଣସି ଅସୁବିଧା ହେଲେ, ସହଯୋଗ ଲାଗି ଗାଁ ଦାଣ୍ଡରେ ଜଗି ରହିଛନ୍ତି। ଜିଲା ପ୍ରଶାସନ ପକ୍ଷରୁ ତୁରନ୍ତ ରନ୍ଧାଖାଦ୍ୟ ଏବଂ ଆବଶ୍ୟକୀୟ ସାମଗ୍ରୀ ପ୍ରଦାନ ଲାଗି ଗ୍ରାମବାସୀ ଦାବି କରିଛନ୍ତି। କିଛି ଚୁଡ଼ା, ଚିନି, ବିସ୍କୁଟ ଧରାଇ ଦେଇ ପ୍ରଶାସନ ଆଉ ଦେଖା ଦେଉନାହିଁ ବୋଲି ଶରଧାପୁର ଗ୍ରାମବାସୀ ଗଣମାଧ୍ୟମ ଆଗରେ ଅଭିଯୋଗ କରିଛନ୍ତି।
ସ୍ବତନ୍ତ୍ର ଦୃଷ୍ଟି ଦିଆଯାଉଛି: ଏ ନେଇ ଜିଲାପାଳ ସନତ ମହାନ୍ତି କହିଛନ୍ତି ବନ୍ୟାଞ୍ଚଳ ଉପରେ ସ୍ବତନ୍ତ୍ର ଦୃଷ୍ଟି ଦିଆଯାଉଛି। ରନ୍ଧା ଓ ଶୁଖିଲା ଖାଦ୍ୟ ଦିଆଯିବା ବ୍ୟବସ୍ଥା କରିବା ସହ ଲୋକଙ୍କ ସ୍ବାସ୍ଥ୍ୟ ପରୀକ୍ଷା ଏବଂ ଗୋରୁଙ୍କ ପ୍ରତିଷେଧକ ଚିକିତ୍ସା ଲାଗି ବ୍ୟବସ୍ଥା କରାଯାଇଛି। ସମସ୍ତ ପ୍ରକାର ସହଯୋଗ ଲାଗି ପ୍ରଶାସନ ପ୍ରସ୍ତୁତ ରହିଛି। ଲୋକଙ୍କ ଯାତାୟତ ଦୃଷ୍ଟରୁ ବୋଟିଂ ବ୍ୟବସ୍ଥା ଏବଂ ଉଦ୍ଧାର କାର୍ଯ୍ୟ ଲାଗି ଅଗ୍ନିଶମ ଟିମ ମୁତୟନ ରହିଛନ୍ତି।
