କେନ୍ଦ୍ରାପଡ଼ା ଅଫିସ, ୧୪ା୪: କେନ୍ଦ୍ରାପଡ଼ା ସହରର ଶାମଗୁଡିଆସ୍ଥିତ ନବନିର୍ମିତ ଜିଲା ମୁଖ୍ୟ ଚିକିତ୍ସାଳୟର ଛାତରୁ ଗୁରୁବାର ପ୍ଲାଷ୍ଟର ଖସିଛି। ନ୍ୟୁଟ୍ରେଶନ ରିହାବିଲିଟେଶନ ସେଣ୍ଟରରେ ଥିବା ୧୨ ଶିଶୁ ରୋଗୀ ଓ ସହାୟକମାନେ ଏହି ଦୁର୍ଘଟଣାରୁ ଅଳ୍ପକେ ବର୍ତ୍ତିଛନ୍ତି। ଶିଶୁଙ୍କୁ ଅନ୍ୟ ଏକ ରୁମ୍କୁ ସ୍ଥାନାନ୍ତର କରାଯାଇଛି। ପ୍ଲାଷ୍ଟର ଖସିବା କାରଣ ସମ୍ପର୍କରେ ପୂର୍ତ୍ତ ବିଭାଗ ପକ୍ଷରୁ ତନଖି ଆରମ୍ଭ ହୋଇଛି। ସନ୍ଧ୍ୟା ପ୍ରାୟ ୬ଟାରେ ଚିକିକିତ୍ସାଳୟର ଏହି ସେଣ୍ଟରରେ ୧୨ ଶିଶୁଙ୍କ ସହ ସହାୟକମାନେ ଥିଲେ। ଏହ ସମୟରେ ଛାତରୁ ପ୍ରାୟ ୩ ଫୁଟ ଆକାରର ପ୍ଲାଷ୍ଟର ସେଣ୍ଟର ଗୃହର ମଝିରେ ଖସି ପଡିଥିଲା। ଏଥିରେ କେହି ଆହତ ହୋଇ ନ ଥିଲେ ମଧ୍ୟ ଗୃହ ମଧ୍ୟରେ ଆତଙ୍କ ଖେଳି ଯାଇଥିଲା। ଏ ସମ୍ପର୍କରେ ଏଡିଏମ୍ଓ ଡା. ସଚ୍ଚିଦାନନ୍ଦ ମିଶ୍ର କହିଛନ୍ତି, ଘଟଣା ଅତି ସ୍ପର୍ଶକାତର। ଏ ନେଇ ଯାଞ୍ଚ କରାଯିବା ପାଇଁ ପୂର୍ତ୍ତ ବିଭାଗକୁ ଅନୁରୋଧ ପରେ ତନଖି ଆରମ୍ଭ ହୋଇଛି। ଅପରପକ୍ଷରେ ପ୍ରକଳ୍ପ କାର୍ଯ୍ୟ ନିମ୍ନମାନର ହୋଇଥିବାରୁ ଏପରି ଦୁର୍ଘଟଣା ବାରମ୍ବାର ଦେଖାଯାଉଛି ବୋଲି ସ୍ଥାନୀୟ ସହରରେ ଆଲୋଚନା ହେଉଛି। ଗତ ମାର୍ଚ୍ଚ ୧୫ ତାରିଖରେ ସହରର ଦ୍ୱିତୀୟ ପାଇପାସ ରୋଡର ନିର୍ମାଣାଧୀନ ସେତୁ ଗାର୍ଡ ୱାଲ ଭୁଶୁଡି ପଡିଥିଲା। ଏହାକୁ ନେଇ ଆଲୋଚନା ସରି ନ ଥିବା ବେଳେ ଜିଲା ମୁଖ୍ୟ ଚିକିତ୍ସାଳୟରୁ ପ୍ଲାଷ୍ଟର ଖସିବା ଏକ ଉଦ୍ବେଗଜନକ ପରିସ୍ଥିତି ସୃଷ୍ଟି କରିଛି। ସୂଚନାଯୋଗ୍ୟ ଯେ, ଏହି ୨ ପ୍ରକଳ୍ପ କାର୍ଯ୍ୟ ପୂର୍ତ୍ତ ବିଭାଗ ଅଧୀନରେ ହୋଇଥିଲା।
