ଚାନ୍ଦବାଲି,୧୧ା୭(ଡି.ଏନ.ଏ.)-ରାସ୍ତା ଖରାପ ଯୋଗୁ ଜଣେ ମହିଳା ଗୋଗୀଙ୍କୁ ତାଙ୍କ ପରିବାର ଲୋକେ ଖଟିଆରେ ବୋହି ପ୍ରାୟ ୩ କି.ମି ଦୂର ମୁଖ୍ୟ ରାସ୍ତାକୁ ଆଣି ସେଠାରୁ ଘରୋଇ ଗାଡ଼ିରେ ଡାକ୍ତରଖାନାକୁ ନେବା ଚର୍ଚ୍ଚାର ବିଷୟ ହୋଇଛି। ଭଦ୍ରକ ଜିଲା ଚାନ୍ଦବାଲି ବ୍ଲକ ନଳଗୋହୀରା ପଞ୍ଚାୟତ ଅନ୍ତର୍ଗତ ନୂଆଗାଁ ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି। ପକ୍ଷାଘାତ ରୋଗରେ ପୀଡ଼ିତ ଏହି ମହିଳାଜଣଙ୍କ ହେଲେ ନବଘନ ରାଉତଙ୍କ ସ୍ତ୍ରୀ ଶାନ୍ତିଲତା।
ସୂଚନା ଅନୁଯାୟୀ, ମତୋ-ଚୌଧୁରୀ ଘାଟ ଗ୍ରାମ ସଡ଼କରୁ ନୂଆଗାଁକୁ ଏକ ପକ୍କା ରାସ୍ତା ଦୀର୍ଘଦିନ ହେବ ତିଆରି ହୋଇଛି। ଏହା ଅଣ ଓସାରିଆ। ଆବଶ୍ୟକ ମରାମତି ଅଭାବରୁ ଏହି ରାସ୍ତା ଅତ୍ୟନ୍ତ ଖରାପ ହେବା ସହିତ ଯାତାୟାତ ଅନୁପଯୁକ୍ତ ହୋଇଛି । ରାସ୍ତା ଉପରେ ବର୍ଷାପାଣି ଜମି ରହୁଛି। ଫଳରେ ଗାଁକୁ ଆମ୍ବୁଲାନ୍ସ କିମ୍ବା ଦମକଳ ମଧ୍ୟ ପଶି ପାରୁନାହିଁ ା ଗୁରୁବାର ରାତି ପ୍ରାୟ ୯ଟା ବେଳେ ଶାନ୍ତିଲତା ଅସୁସ୍ଥ ହୋଇ ପଡ଼ିଥିଲେ ା ଆମ୍ବୁଲାନ୍ସ ଓ ଘରୋଇ ଗାଡ଼ିକୁ ଫୋନ କଲେ ମଧ୍ୟ ଖରାପ ରାସ୍ତା କାରଣରୁ କେହି ଗାଁକୁ ଆସିବାକୁ ରାଜି ହେଲେନାହିଁ ା ଶେଷରେ ଶାନ୍ତିଲତାଙ୍କ ପରିବାର ଲୋକେ ଓ ଗାଁର କେତେଜଣ ଯୁବକ ତାଙ୍କୁ ଖଟିଆରେ ଶୁଆଇ ମୁଖ୍ୟ ରାସ୍ତାକୁ ଆଣିଥିଲେ। ସେଠାରୁ ଘରୋଇ ଗାଡିରେ ନେଇ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ପରେ ତାଙ୍କୁ ଭଦ୍ରକ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
