ନୟାଗଡ଼ ଅଫିସ,୧।୨: ଭିକ୍ଟିଂ କମ୍ପେନସେସନ୍ ଆକ୍ଟ ଜରିଆରେ ପରୀ ପରିବାରକୁ ଦୁଇ ପର୍ଯ୍ୟାୟରେ ମିଳିବ ୯ ଲକ୍ଷ ଟଙ୍କା । ଏନେଇ ରାଜ୍ୟ ଆଇନ ସେବା ପ୍ରାଧିକରଣ ପକ୍ଷରୁ ସ୍ବୀକୃତି ମିଳିଛି। ସୋମବାର ନୟାଗଡ଼ ଜିଲା ଜଜ୍ ଓ ଦୌରାଜଜ୍ଙ୍କ ସମ୍ମିଳନୀ କକ୍ଷରେ ଜିଲା ଆଇନ ସେବା ପ୍ରାଧିକରଣ କମିଟିର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଜିଲା ଜଜ୍ ଓ ଦୌରାଜଜ୍ ରୂପଶ୍ରୀ ଚୌଧୁରୀ ଏଥିରେ ଅଧ୍ୟକ୍ଷତା କରିଥିଲେ। ବୈଠକରେ ଜିଲାପାଳ ପୋମା ଟୁଡୁ, ଏସ୍ପି ସିଦ୍ଧାର୍ଥ କଟାରିଆ, ସିଡିଏମ୍ଓ ଶକ୍ତି ପ୍ରସାଦ ମିଶ୍ର, ସରକାରୀ ଓକିଲ ବିଷ୍ଣୁ ପ୍ରସନ୍ନ ମହାପାତ୍ର ଓ ଜିଲା ଆଇନ ସେବା ପ୍ରାଧିକରଣ କମିଟିର ସମ୍ପାଦକ ଯୋଗ ଦେଇଥିଲେ । ପରୀ ହତ୍ୟାକାଣ୍ଡ ସମ୍ପର୍କରେ ଆଲୋଚନା ଓ ପର୍ଯ୍ୟାଲୋଚନା ପରେ ୯ ଲକ୍ଷ ଟଙ୍କା କ୍ଷତିପୂରଣ ଦେବା ପାଇଁ ପ୍ରସ୍ତାବ ଗୃହୀତ ହୋଇଥିଲା। ଆଇନ ସେବା ପ୍ରାଧିକରଣ କମିଟି ତା’ର ସୁପାରିସକୁ ରାଜ୍ୟ ଆଇନ ସେବା ପ୍ରାଧିକରଣ କମିଟିକୁ ପଠାଇଥିଲେ। କୌଣସି ସ୍ଥାନରେ ହତ୍ୟାକାଣ୍ଡ ଘଟିଲେ ମୃତକଙ୍କ ପରିବାରବର୍ଗକୁ ଅତିବେଶୀରେ ୧୦ ଲକ୍ଷ ଟଙ୍କା ଭିକ୍ଟିଂ କମ୍ପେନସେସନ୍ ଆକ୍ଟରେ ଦିଆଯିବାର ନିୟମ ରହିଛି।
ସୂଚନାଯୋଗ୍ୟ, ଗାଁ ଦାଣ୍ଡରେ ଖେଳୁଥିବାବେଳେ ଯଦୁପୁର ଗାଁ ଅଶୋକ ସାହୁଙ୍କ ୬ ବର୍ଷୀୟା ଝିଅ ପରୀ ୨୦୨୦ ଜୁଲାଇ ୧୪ରେ ନିଖୋଜ ହୋଇଯାଇଥିଲେ। ନିଖୋଜର ୧୦ଦିନ ଅର୍ଥାତ୍ ଜୁଲାଇ ୨୩ରେ ପରୀର ୧୨ ଖଣ୍ଡ ହାଡ଼, ଖପୁରି ଓ ଶାର୍ଟ ଅଖାବସ୍ତା ଭିତରୁ ତାଙ୍କ ବାରିପଟ ପୋଖରୀ ହଡ଼ାରୁ ଜବତ କରାଯାଇଥିଲା । ପୋଲିସ ୯୮/୨୦ରେ ହତ୍ୟା ମାମଲା ରୁଜୁ କରି ତଦନ୍ତ କରିଥିଲା । ହତ୍ୟାକାରୀଙ୍କ ଟେର ନ ପାଇବାରୁ ୨୦୨୦ ଅଗଷ୍ଟ ୧୨ରେ ପୋଲିସ ଉପରୁ ଆସ୍ଥା ହରାଇ ପରିବାର ଲୋକଙ୍କ ସମେତ ଯଦୁପୁର ଗଁା ଲୋକେ ସିବିଆଇ ଅଥବା କ୍ରାଇମ୍ବ୍ରାଞ୍ଚ ତଦନ୍ତ ଦାବିରେ ନୟାଗଡ-ଖଣ୍ଡପଡା ରାସ୍ତାର ଯଦୁପୁର ଠାରେ ରାସ୍ତାରୋକୋ କରିଥିଲେ । ନ୍ୟାୟ ନ ପାଇବାରୁ ନଭେମ୍ବର ୨୪ରେ ପୋଲିସ, ଜିଲା ପ୍ରଶାସନ ଓ ନୟାଗଡର ମନ୍ତ୍ରୀ ତଥା ବିଧାୟକଙ୍କ ଉପରେ ଅସନ୍ତୋଷ ବ୍ୟକ୍ତ କରି ପରୀର ମା’ବାପା ଭୁବନେଶ୍ୱର ବିଧାନସଭା ସମ୍ମୁଖରେ ଡିଜେଲ ଓ କିରୋସିନ ଢାଳି ଆତ୍ମହୁତି ଉଦ୍ୟମ କରିଥିଲେ । ପରେ ଏସ୍ଆଇଟି ତଦନ୍ତ କରି ଜଣେ କଲେଜ ଛାତ୍ରଙ୍କୁ କୋର୍ଟରେ ହାଜର କରାଯାଇଥିଲା, ଯାହାର ବିଚାର ଚିଲ୍ଡ୍ରେନ କୋର୍ଟରେ ଚାଲିଛି ।
