ଭୁବନେଶ୍ୱର,୬ା୭(ବ୍ୟୁରୋ): ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ସରକାରୀ ଅଧିକାରୀଙ୍କ ପର୍ଯ୍ୟନ୍ତ ଯାହାଙ୍କୁ ବି ଚିଠି ଲେଖିଲେ କେହି ବି ଉତ୍ତର ଦେଉନାହାନ୍ତି। ୧୫ ଦିନ ଭିତରେ ଉତ୍ତର ଦେବାକୁ ନିୟମ ରହିଛି। ଖାଲି ସେତିକି ନୁହେଁ ବିଧାନସଭାରେ ମନ୍ତ୍ରୀମାନଙ୍କୁ ପ୍ରଶ୍ନ କଲେ ତଥ୍ୟ ସଂଗ୍ରହ କରାଯାଉଛି ବୋଲି ବାରମ୍ବାର ଉତ୍ତର ଆସୁଛି। ନିକଟରେ ମୁଖ୍ୟ ଶାସନ ସଚିବ ବୁକ୍ ସର୍କୁଲାର କଡ଼ାକଡ଼ି ଭାବେ ପାଳନ କରିବାକୁ ଏକ ବୈଠକ ଡାକି ନିର୍ଦ୍ଦେଶ ଦେଇଛନ୍ତି। ହେଲେ କେହି ଏହାକୁ ମାନୁନାହାନ୍ତି। ବୁକ୍ ସର୍କୁଲାର-୪୭ ବାରମ୍ବାର ଉଲ୍ଲଂଘନ ହେଉଛି। ମଙ୍ଗଳବାର ଶୂନ୍ୟକାଳରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଏହି ପ୍ରସଙ୍ଗ ଉଠାଇ ବାଚସ୍ପତି ରୁଲିଂ ଦେବାକୁ ଦାବି କରିଛନ୍ତି । ବିଲ୍ ଆଲୋଚନା ପୂର୍ବରୁ ବିଧାୟକମାନଙ୍କୁ ସେହି ବିଲ୍ର ଡକ୍ୟୁମେଣ୍ଟ ଦିଆଯାଉନି। ସରକାର ମନଇଚ୍ଛା ବିଲ୍ ଆଣି ସଂଖ୍ୟାବଳ ଥିବାରୁ ପାସ୍ କରାଇ ନେଉଛନ୍ତି। ଯାହାଫଳରେ ବିଧାୟକମାନେ ସମ୍ପୃକ୍ତ ବିଲ୍ ବିଷୟରେ କିଛି ଜାଣିପାରୁନାହାନ୍ତି। ଘରୋଇ ବିଶ୍ୱବିଦ୍ୟାଳୟ ପାଇଁ କ’ଣ ଗାଇଡ୍ଲାଇନ ରହିଛି ନରସିଂହ ମିଶ୍ର ପ୍ରଶ୍ନ କରିଛନ୍ତି । ରାଜ୍ୟରେ ସ୍ବାସ୍ଥ୍ୟ ବିଶ୍ୱବିଦ୍ୟାଳୟ ଥିବାବେଳେ ମେଡିକାଲ କଲେଜ ପାଇଁ ଆଉ ଏକ ବିଶ୍ୱବିଦ୍ୟାଳୟକୁ ଅନୁମତି ଦେବା କ’ଣ ଦରକାର ବୋଲି ସେ କହିଛନ୍ତି। ସରକାର ଏତେ ତରବରିଆ ଭାବେ କାହିଁକି ବିଲ୍କୁ ପାରିତ କରାଇ ନେଲେ, ଯାହା ସାଧାରଣରେ ସନ୍ଦେହ ସୃଷ୍ଟି କରୁଛି। ସରକାର ମେଡିକାଲ କଲେଜ ପ୍ରତିଷ୍ଠା ପାଇଁ ଘରୋଇ ବିଶ୍ୱବିଦ୍ୟାଳୟଗୁଡ଼ିକୁ ଅନୁମତି ଦେବା ଅନୁଚିତ ବୋଲି ନରସିଂହ କହିଛନ୍ତି। ନରସିଂହ ମିଶ୍ରଙ୍କ ଏଭଳି ଉଦ୍ବେଗ ପ୍ରକାଶ ପରେ ବାଚସ୍ପତି ଯେଉଁ ତଥ୍ୟ ସୋମବାର ବିଧାୟକମାନଙ୍କୁ ଦିଆଯାଇନାହିଁ ସେହି ବିଭାଗର ତଥ୍ୟ ଆଣି ବିଧାୟକମାନଙ୍କୁ ଯୋଗାଇ ଦେବା ପାଇଁ ବିଧାନସଭା ସଚିବଙ୍କୁ ନିର୍ଦ୍ଦେଶ ଦେଇଛନ୍ତି। ଅନ୍ୟପଟେ ବୁକ୍ ସର୍କୁଲାର-୪୭ ଉଲ୍ଲଂଘନ ନେଇ ବାଚସ୍ପତି ରୁଲିଂ କରିଛନ୍ତି। ଆସନ୍ତା ସପ୍ତାହକ ମଧ୍ୟରେ ମୁଖ୍ୟ ଶାସନ ସଚିବ ଏବଂ ସଂସଦୀୟ ବ୍ୟାପାର ସଚିବଙ୍କୁ ଡାକି କାହିଁକି ବୁକ୍ ସର୍କୁଲାର-୪୭ ଠିକ୍ ଭାବେ କାର୍ଯ୍ୟକାରୀ ହେଉନି ତାହାର ଅନୁଧ୍ୟାନ କରିବେ ବୋଲି କହିଛନ୍ତି।
