ଓ୍ବାଶିଂଟନ୍,୧୭।୧: ଆମେରିକାରୁ ଆସୁଛି ବଡ଼ ଖବର। ପୂର୍ବତନ ରାଷ୍ଟ୍ରପତିଙ୍କ ହୋଇପାରେ ଛାଡପତ୍ର! ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମା ଏବଂ ତାଙ୍କ ସ୍ତ୍ରୀ ମିଶେଲ ଓବାମାଙ୍କ ମଧ୍ୟରେ ଛାଡପତ୍ର ନେଇ ଜୋରଦାର ଚର୍ଚ୍ଚା ହେଉଛି। ଏପରିକି ଉଭୟଙ୍କ ମଧ୍ୟରେ ସମ୍ପର୍କ ଭଲ ନାହିଁ, ଫଳରେ ଦୁହେଁ ଛାଡପତ୍ର ନେଉଥିବା ନେଇ ସୋସିଆଲ ମିଡିଆରେ ଭାଇରାଲ ହେଉଛି।
ସୂଚନା ଅନୁଯାୟୀ, ବାରାକ ଏବଂ ମିଶେଲ ଓବାମାଙ୍କ କାର୍ଯ୍ୟାଳୟ ପକ୍ଷରୁ ଜାରି ଏକ ବିବୃତ୍ତିରେ କୁହାଯାଇଛି ଯେ ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ଉତ୍ସବରେ ପୂର୍ବତନ ରାଷ୍ଟ୍ରପତି ଯୋଗଦେବେ। ଯଦିଓ ମିଶେଲ ଓବାମା ଏହି କାର୍ଯ୍ୟକ୍ରମରେ ଯୋଗ ଦେବେ ନାହିଁ ବୋଲି ସ୍ପଷ୍ଟ କରାଯାଇଛି। ଏହା କେବଳ ଗୋଟିଏ ଘଟଣା ନୁହେଁ ପୂର୍ବରୁ ପୂର୍ବତନ ଆମେରିକୀୟ ରାଷ୍ଟ୍ରପତି ଜିମି କାର୍ଟରଙ୍କ ଅନ୍ତିମ ସଂସ୍କାରରେ ବାରାକ ଓବାମାଙ୍କୁ ମଧ୍ୟ ଏକୁଟିଆ ଦେଖିବାକୁ ମିଳିଥିଲା। ଅପରପକ୍ଷରେ ଟ୍ରମ୍ପଙ୍କ ଶପଥ ଗ୍ରହଣ ସମାରୋହରେ ସାଧାରଣତଃ ପୂର୍ବତନ ରାଷ୍ଟ୍ରପତି ଏବଂ ତାଙ୍କ ସ୍ତ୍ରୀ ଯୋଗ ଦେଇଥାନ୍ତି। କିନ୍ତୁ ଏହି ସମାରୋହରେ ଓବାମାଙ୍କ ସହ ତାଙ୍କ ସ୍ତ୍ରୀ ନଜର ନ ଆସିବା ନେଇ କିଛି ଅଲଗା ସନ୍ଦେହ କରାଯାଉଛି।
ଏହି ଖବର ଜଣାପଡିବା ପରେ ସୋସିଆଲ ମିଡିଆରେ ଦୁହିଁଙ୍କ ଛାଡପତ୍ର ବିଷୟରେ ଆଲୋଚନା ଆରମ୍ଭ ହୋଇଯାଇଛି। ତେବେ ଏନେଇ ଓବାମା ପରିବାର ପକ୍ଷରୁ କୌଣସି ସ୍ପଷ୍ଟୀକରଣ ଆସିନାହିଁ। ପ୍ରକୃତ କଥା ହେଉଛି, ବାରାକ ଏବଂ ମିଶେଲ ଓବାମା ଉଭୟ ସେମାନଙ୍କ ସମ୍ପର୍କରେ ଥିବା ଚ୍ୟାଲେଞ୍ଜଗୁଡ଼ିକ ବିଷୟରେ ଖୋଲାଖୋଲି ଭାବରେ କହିଛନ୍ତି। ତାଙ୍କ ସଂସ୍କରଣ “ଏ ପ୍ରମିଜ୍ଡ ଲ୍ୟାଣ୍ଡ”ରେ, ବାରାକ ତାଙ୍କ ରାଷ୍ଟ୍ରପତିତ୍ୱ ସମୟରେ ଦୁହିଁଙ୍କ ମଧ୍ୟରେ ହୋଇଥିବା ବିବାଦକୁ ସ୍ବୀକାର କରିଛନ୍ତି। ସେହିପରି ବାରାକଙ୍କ ସ୍ତ୍ରୀ ଏକ ପୋଡକାଷ୍ଟରେ କହିଥିଲେ ଯେ, ଏପରି ସମୟ ଥିଲା ଯେତେବେଳେ ମୁଁ ବାରାକଙ୍କୁ ଝରକା ବାହାରକୁ ଠେଲି ଦେବାକୁ ଚାହୁଁଥିଲି।
କହି ରଖୁଛୁ ଯେ ବିଶ୍ୱର ସବୁଠାରୁ ଶକ୍ତିଶାଳୀ ଦେଶର ପ୍ରଥମ କୃଷ୍ଣକାୟ ରାଷ୍ଟ୍ରପତି ବାରାକ ଓବାମା ଏବଂ ତାଙ୍କ ସ୍ତ୍ରୀ ମିଶେଲଙ୍କ ୧୯୮୯ରେ ଏକ ଆଇନ ଫାର୍ମରେ ସାକ୍ଷାତ କଇଥିଲେ। ଏହିଠାରୁ ଉଭୟ ଡେଟିଂ ଆରମ୍ଭ କରିଥିଲେ ଏବଂ ୧୯୯୨ରେ ବିବାହ କରିଥିଲେ। ବାରାକ ଏବଂ ମିଶେଲଙ୍କ ଦୁଇଟି ଝିଅ, ମାଲେଆ ଏବଂ ସାଶା ଓବାମା ଅଛନ୍ତି।
