ନୟାଗଡ଼ ଅଫିସ,୧୧।୪: ଟାଟା ବିଦ୍ୟୁତ୍ ବଣ୍ଟନ ଦାୟିତ୍ୱ ନେବା ପରେ ଗ୍ରାହକଙ୍କ ଉପରେ ଅତ୍ୟଧିକ ବିଦ୍ୟୁତ୍ ବିଲ୍ ଲଦି ଦିଆଯାଉଥିବା ଅଭିଯୋଗ ଆସୁଛି। ଏହି ମନମାନି ବିରୋଧରେ ଅଭିଯୋଗ କଲେ ସୁଫଳ ମିଳୁନି । ଏ ସଂକ୍ରାନ୍ତରେ ଭାପୁର ଅଞ୍ଚଳର ଜଣେ ବିଦ୍ୟୁତ୍ ଗ୍ରାହକ ଅଭିଯୋଗ କରିଛନ୍ତି। ଦୁଇ ମାସରେ ଅତିରିକ୍ତ ୮୫୮ ୟୁନିଟ୍ ବିଲ୍ ଗ୍ରାହକ ଉପରେ ଲଦି ଟଙ୍କା ପଇଠ କରିବାକୁ ବାଧ୍ୟ କରାଯାଉଛି । ଗ୍ରାହକ ବିଲ୍ ସଂଶୋଧନ କରିବାକୁ କହିବାରୁ ବିଦ୍ୟୁତ୍ କାଟି ଦେବାକୁ ଧମକ ମିଳୁଛି । ଗ୍ରାହକ ଓ ଆକାଉଣ୍ଟ ସେକ୍ସନର କର୍ମଚାରୀଙ୍କ କଥୋପକଥନ ସୋସିଆଲ ମିଡିଆରେ ଭାଇରାଲ ହେଉଛି । ଯେଉଁଥିରେ ବିଦ୍ୟୁତ୍ ବିଭାଗର କର୍ମଚାରୀଙ୍କ କଟୁ କଥା ଶୁଣିଲେ ବିଦ୍ୟୁତ୍ ବିଭାଗ ବିରୋଧରେ ଆନ୍ଦୋଳନ କରିବାକୁ ଖୋରାକ ଯୋଗାଉଛି ।
ଅଭିଯୋଗ ଅନୁସାରେ ଭାପୁର ଅଞ୍ଚଳର ମଧୁସୂଦନ ପରିଡ଼ା ପ୍ରାୟ ୧ବର୍ଷ ତଳେ ଏକ ନୂଆ ମିଟର ଲଗାଇଲେ। ମିଟରରେ ତାଙ୍କର ପ୍ରତି ମାସରେ ୫୦ରୁ ୧୦୦ ୟୁନିଟ୍ ଭିତରେ ବିଲ୍ ଆସେ। ହେଲେ ୨୦୨୧ ମେ’ମାସରେ ମଧୁସୂଦନଙ୍କ ୩୩୩, ଜୁନ୍ ରେ ୫୨୫ ଏପରି ମୋଟରେ ୮୫୮ ୟୁନିଟ୍ ବିଲ୍ ଆସିଥିଲା। ସେ କିନ୍ତୁ ୮୫୮ ୟୁନିଟ୍ ବ୍ୟବହାର କରି ନ ଥିବା ଅଭିଯୋଗ କରିଥିଲେ । ମିଟର ରିଡିଂର ତ୍ରୁଟି ନେଇ ଅଭିଯୋଗ ପରେ ତ୍ରୁଟି ସଂଶୋଧନ ହେବ ବୋଲି କୁହାଯାଇଥିଲା। ହେଲେ ୧୦ ମାସ ଧରି ଅଭିଯୋଗ କରି ଆସୁଥିଲେ ମଧ୍ୟ ଏହାର ପ୍ରତିକାର କରାଯାଉ ନ ଥିଲା । ବରଂ ପ୍ରତି ମାସରେ ତାଙ୍କୁ ବିଲ ପଇଠ କରିବାକୁ ଚାପ ପଡୁ ଥିଲା। ଏପରି କି ବିଦ୍ୟୁତ୍ କାଟି ଦେବାକୁ ପରୋକ୍ଷରେ ଧମକ ଶୁଣିବାକୁ ପଡୁଥିଲା। ମଧୁସୂଦନଙ୍କ ପୁଅ ଅଜୟ ଏନେଇ ଭାପୁର ଟିପିସିଓଡିଏଲ କାର୍ଯ୍ୟାଳୟର ଆକାଉଣ୍ଟାଣ୍ଟ ଅମିତ୍ ନିଶକଙ୍କୁ ଭେଟିଥିଲେ। ବିଦ୍ୟୁତ୍ ବିଲ୍ ସଂଶୋଧନ କାହିଁକି ହେଉ ନାହିଁ ପଚାରିବାରୁ ବାକି ଟଙ୍କା ପରିଶୋଧ କରିବାକୁ କହିଥିଲେ। ଏପରି କି ଲାଇନ କାଟି ଦେବାକୁ ବିରକ୍ତି ହୋଇ କହିଥିଲେ । ଏନେଇ ମଧୁସୂଦନ କୁହନ୍ତି, ମୁଁ ଯେତିକି ବିଦ୍ୟୁତ୍ ବ୍ୟବହାର କରିବି ସେହି ଅନୁସାରେ ବିଲ୍ ପଇଠ କରିବି । ତେବେ ମୋତେ ଅଧିକ ୟୁନିଟ୍ ବିଲ ଦେଲେ କ’ଣ ବିଦ୍ୟୁତ୍ ବ୍ୟବହାର ନ କରି ବିଲ୍ ପଇଠ କରିବି । ମୋତେ ପୁଣି ଲାଇନ କାଟିବାର ଧମକ ମିଳୁଛି । ବିଦ୍ୟୁତ୍ ବିଭାଗର ଜୋର ଜୁଲମ ଠିକ୍ ନୁହେଁ ବୋଲି କହିଛନ୍ତି। ଭାପୁର ଟିପିସିଓଡିଏଲ କାର୍ଯ୍ୟାଳୟର ଆକାଉଣ୍ଟାଣ୍ଟ ଅମିତ୍ ନିଶକ କୁହନ୍ତି, ମୁଁ ଖରାପ ବ୍ୟବହାର ଦେଖାଇ ନାହିଁ । ଲାଇନ କାଟିବାକୁ କହି ନାହିଁ। ନୟାଗଡ଼ ଡିଭିଜନ ଅଫିସରେ ଯାଇ ତ୍ରୁଟି ସଂଶୋଧନ କରିବାକୁ କହିଥିଲି । ମୋତେ ଅଯଥାରେ ହଇରାଣ ହରକତ ନ କରିବାକୁ ସେ କହିଛନ୍ତି ।
ଅଘୋଷିତ ବିଦ୍ୟୁତ୍ କାଟ୍ :ଗ୍ରୀଷ୍ମର ପ୍ରକୋପରେ ଗୁଳୁଗୁଳି ବଢ଼ି ଚାଲିଛି। ଏଭଳି ସ୍ଥଳେ ନୟାଗଡ଼ ଜିଲାରେ ଅଘୋଷିତ ବିଦ୍ୟୁତ୍ କାଟ ଜନଜୀବନକୁ ଦୁର୍ବିସହ କରିଛି। ନୟାଗଡ଼ ଜିଲା ସଦର ମହକୁମାରେ ରବିବାର ସାଢ଼େ ୨ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ବିଦ୍ୟୁତ୍ କାଟ ହୋଇଥିଲା । ସେହିପରି ଜିଲାରେ ମନଇଛା ବିଦ୍ୟୁତ୍ କାଟ ଚାଲିଛି। ଅନ୍ୟପକ୍ଷେ ଏୟାର କଣ୍ଡିଶନର ଅଧିକ ସଂଖ୍ୟାରେ ବ୍ୟବହାର ଯୋଗୁ ବିଦ୍ୟୁତ୍ କାଟ ମଧ୍ୟ ହେଉଥିବା ଜଣାପଡିଛି।
ତାର ଛିଣ୍ଡିବାରୁ ରାସ୍ତାରୋକୋ: ଗଣିଆ ବ୍ଲକ ପୂର୍ଣ୍ଣଚନ୍ଦ୍ରପୁର ଗଁାରେ ବିଦ୍ୟୁତ୍ ତାର ଛିଣ୍ଡିବାକୁ ନେଇ ରବିବାର ଚାପା ଉତ୍ତେଜନା ଦେଖା ଦେଇଥିଲା । ଅଭିଯୋଗ ଓ ପ୍ରତିବାଦ ହୋଇଥିଲେ ମଧ୍ୟ ବିଦ୍ୟୁତ୍ କର୍ମଚାରୀ ଘଟଣାସ୍ଥଳକୁ ଆସି ଛିଣ୍ଡି ଯାଇଥିବା ବିଦ୍ୟତ୍ ତାର ମରାମତି କରି ନ ଥିଲେ । ଏଣୁ ସ୍ଥାନୀୟ ଅଞ୍ଚଳରେ ଉତ୍ତେଜନା ବଢ଼ି ରାସ୍ତାରୋକୋ ହୋଇଥିଲା । ପ୍ରକାଶ ଯେ, ରବିବାର ଅପରାହ୍ନ ୩ଟାରେ ଗଣିଆ ଭୁବନେଶ୍ୱର ରାସ୍ତାର ପୂର୍ଣ୍ଣଚନ୍ଦ୍ରପୁରଠାରେ ରାସ୍ତାରେ ବିଦ୍ୟୁତ୍ ତାର ଛିଣ୍ଡି ପଡ଼ିଥିଲା । ବର୍ଷା ପବନ ନ ଥାଇ ତାର ଛିଣ୍ଡିବା ବେଳେ କାହାରି କିଛି କ୍ଷତି ହୋଇ ନ ଥିଲା। ଗଣିଆ ଭୁବନେଶ୍ୱର ରାସ୍ତା ଅବରୋଧ ହୋଇଥିଲା। ପରେ ମରାମତି କାର୍ଯ୍ୟ କରିବା ପରେ ୧ଘଣ୍ଟା ପରେ ରାସ୍ତାରୋକୋ ହଟିଥିଲା ।
