ଛେଣ୍ଡିପଦା,୧୨।୧୧(ସ୍ବ.ପ୍ର.) ଦୁଗ୍ଧ ଉତ୍ପାଦନ ବଢ଼ାଇବା ଉପରେ ସରକାର ଗୁରୁତ୍ୱ ଦେଉଛନ୍ତି। ସେଥିପାଇଁ ଗ୍ରାମାଞ୍ଚଳର ଦୁଗ୍ଧ ଚାଷୀମାନଙ୍କୁ ଅଧିକରୁ ଅଧିକ ଗୋପାଳନ ପାଇଁ ପ୍ରୋତ୍ସାହିତ କରୁଛନ୍ତି। ବ୍ୟାଙ୍କ ମାଧ୍ୟମରେ ଆବଶ୍ୟକ ଋଣ ଯୋଗାଇ ଦେଉଛନ୍ତି। ହେଲେ ଚାଷୀମାନେ କିପରି ସହଜରେ ଉତ୍ପାଦିତ ଦୁଗ୍ଧ ବ୍ରିକି କରିପାରିବେ ସେ ଦିଗରେ ଯଥେଷ୍ଟ ଧ୍ୟାନ ଦିଆଯାଉ ନାହିଁ। ଏହି କାରଣରୁ ଅନୁଗୋଳ ଜିଲା ଛେଣ୍ଡିପଦା ବ୍ଲକ ଅଞ୍ଚଳର ୨୫ଶହ ଦୁଗ୍ଧ ଚାଷୀ ଅଭାବୀ ବିକ୍ରିର ଶିକାର ହେଉଥିବା ଅଭିଯୋଗ କରିଛନ୍ତି। ଏଠାରେ ଥିବା ଏକମାତ୍ର ଦୁଗ୍ଧ ଶୀତଳୀକରଣ କେନ୍ଦ୍ର କାର୍ଯ୍ୟକ୍ଷମ ହେଉ ନ ଥିବାରୁ ସମ୍ପୃକ୍ତ ଚାଷୀମାନଙ୍କୁ ଉଚିତ ମୂଲ୍ୟ ମିଳୁନାହିଁ।
ଛେଣ୍ଡିପଦା ବ୍ଲକର ଦୁଗ୍ଧ ଚାଷୀମାନଙ୍କଠାରୁ ଦୈନିକ ଦୁଗ୍ଧ କିଣିବା ପାଇଁ ସଦର ମହକୁମାଠାରେ ଓମଫେଡ ପକ୍ଷରୁ ୧ ହଜାର ଲିଟର କ୍ଷମତା ବିଶିଷ୍ଟ ଶୀତଳୀକରଣ କେନ୍ଦ୍ର ଖୋଲାଯାଇଥିଲା। ଏହି କେନ୍ଦ୍ର ଉପରେ ୧୬ଟି ସମବାୟ ସମିତି ବାମନାଳୀ, ବାଗଡ଼ିଆ, ଖମାରବାଣେଶ୍ୱରୀ, ସାପୋଇନାଳୀ, ଟଙ୍ଗିରୀ, ପୁରୁଣାଗଡ, ଗୋଳାଗାଡିଆ, ତୁକୁଡା, ହରିଡାଗୁଡ, ବଣିଆନଟି, ଶୁଭମ ଆଦିର ଚାଷୀ ନିର୍ଭର କରୁଥିଲେ। ଚାଷୀମାନେ ଉତ୍ପାଦିତ ୧୨୦୦ ଲିଟରରୁ ଅଧିକ ଦୁଗ୍ଧକୁ ସମବାୟ ସମିତି ମାଧ୍ୟମରେ ଆଣି ଦୈନିକ ଏହି ଶୀତଳୀକରଣ କେନ୍ଦ୍ରରେ ଦେଉଥିଲେ। ଏ ବାବଦର ଅର୍ଥ ରାଶି ପ୍ରତ୍ୟେକ ୧୦ ଦିନରେ ସମିତି ବ୍ୟାଙ୍କ ଖାତାକୁ ଓମଫେଡ ପକ୍ଷରୁ ପଠାଯାଉଥିଲା। କିନ୍ତୁ ୨ ଲକ୍ଷରୁ ଊର୍ଦ୍ଧ୍ୱ ଟଙ୍କା ବକେୟା ରହିବା ସହିତ ଗାଈଙ୍କ ପାଇଁ ଔଷଧ ନ ଦେଇ ଚାଷୀଙ୍କ ଖାତାରୁ ଟଙ୍କା କଟାଯିବା ଘଟଣାକୁ ନେଇ ଚାଷୀମାନେ ଅସନ୍ତୋଷ ପ୍ରକାଶ କରିଥିଲେ। ଉକ୍ତ ରାଶି ଆଜି ପର୍ଯ୍ୟନ୍ତ ମିଳି ନ ଥିବାବେଳେ ଶୀତଳୀକରଣ କେନ୍ଦ୍ର ମଧ୍ୟ ବର୍ଷେ ତଳୁ ବନ୍ଦ ହୋଇଯାଇଛି। ଏହାର ନବୀକରଣ ପାଇଁ ନିର୍ମାଣ କରାଯାଇଥିବା ନୂତନ ଗୃହ ୩ ମାସ ତଳୁ ଉଦ୍ଘାଟିତ ହୋଇସାରିଛି। ହେଲେ ଶୀତଳୀକରଣ କେନ୍ଦ୍ର କାର୍ଯ୍ୟକ୍ଷମ କରାଯାଉ ନ ଥିବାରୁ ଚାଷୀମାନେ ଦୁଗ୍ଧ ବିକ୍ରି କରିପାରୁ ନାହାନ୍ତି। ଏ ନେଇ ଚାଷୀମାନେ ସମ୍ବଲପୁର ଏମ୍ପି ନୀତେଶ ଗଙ୍ଗଦେବଙ୍କୁ ଭେଟି ଅଭିଯୋଗ କରିଥିଲେ। ଖୁବ୍ଶୀଘ୍ର ଏହା ଖୋଲାଯିବ ବୋଲି ଜିଲାପାଳ କହିଥିବା ଏମ୍ପି ଦୁଗ୍ଧ ଚାଷୀଙ୍କୁ ସୂଚନା ଦେଇଥିଲେ। ମାତ୍ର ଦେଢମାସ ବିତିଯାଇଥିଲେ ମଧ୍ୟ ଶୀତଳୀକରଣ କେନ୍ଦ୍ର କର୍ଯ୍ୟକ୍ଷମ ହୋଇପାରି ନାହିଁ। ଏ ସମ୍ପର୍କରେ ଢେଙ୍କାନାଳସ୍ଥିତ ଓମ୍ଫେଡ୍ ଜିଏମ୍ ଅଜିତ ଖେସଙ୍କୁ ବାରମ୍ବାର ଯୋଗାଯୋଗ (ମୋବାଇଲ୍ ନଂ. ୭୯୭୮୮୦୧୧୬୦) ସତ୍ତ୍ୱେ ମତାମତ ମିଳିପାରି ନାହିଁ।
