ବ୍ରହ୍ମପୁର ଅଫିସ,୨୧।୨: ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ବର୍ତ୍ତମାନ ସ୍ମାର୍ଟ ରାସ୍ତା ନିର୍ମାଣ କାର୍ଯ୍ୟ ଚାଲୁରହିଛି। ଏହି ସ୍ମାର୍ଟ ରାସ୍ତା ନିର୍ମାଣ ସମୟରେ କେତେବେଳେ ଟ୍ରାଫିକ ସମସ୍ୟା ଉପୁଜୁଛି ତ ଆଉ କେତେବେଳେ ଯାତାୟାତରେ ବାଧା ସୃଷ୍ଟି ହେଉଛି। ଏଭଳି ଭାବେ ବିଏମ୍ସି ପକ୍ଷରୁ ଷ୍ଟେଟ ବ୍ୟାଙ୍କ ମୁଖ୍ୟ ଶାଖାଠାରୁ ସେଣ୍ଟ୍ ଭିନସେଣ୍ଟ୍ କନ୍ଭେଣ୍ଟ୍ ସ୍କୁଲ ରାସ୍ତା ନିର୍ମିିତ ହେଉଥିବା ବେଳେ ଏହି ରାସ୍ତା ବର୍ତ୍ତମାନ ଯାତାୟାତ ସମୟରେ ସମସ୍ୟା ହେଉଛି। ଏପରିକି ରାସ୍ତା ନିର୍ମାଣ ବେଳେ ଏଠାରେ ଥିବା ଏକ ଚିଠି ବାକ୍ସକୁ ରାସ୍ତାର ଏକ ପାର୍ଶ୍ୱରେ ଅଲୋଡା ଭାବେ ପକାଯାଇଥିବା ନେଇ ସହରବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଅନ୍ୟପଟେ ରାସ୍ତା ନିର୍ମାଣ ହେଉଥିବା ବେଳେ କୌଣସି ସୂଚନା ଫଳକ ନ ଥିବା ଦେଖିବାକୁ ମିଳିଛି। ଏଥିସହ ରାସ୍ତା ୨ ପାର୍ଶ୍ୱରେ ଡ୍ରେନ୍ ଖୋଳାଯାଇଥିବାରୁ ସମ୍ପୂର୍ଣ୍ଣ କାଦୁଅ ହୋଇ ରହିଛି। ଫଳରେ ସର୍ବସାଧାରଣ ଏହି କାଦୁଅ ରାସ୍ତା ଦେଇ ଯିବା ଆସିବା ସମୟରେ ଦୁର୍ଘଟଣାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ଏପରିକି ନିର୍ମାଣାଧୀନ ରାସ୍ତା ପାର୍ଶ୍ୱରେ ଥିବା ବହୁ ଠେଲା ବ୍ୟବସାୟୀ ହଇରାଣ ହେଉଥିବା କହିଛନ୍ତି। ଏଣୁ ରାସ୍ତା ନିର୍ମାଣ ସମ୍ପୂର୍ଣ୍ଣ ହେବା ଯାଏ ଯାତାୟାତ ବାରଣ ପାଇଁ ସୂଚନା ଦେବା ନିମନ୍ତେ ଦାବି ହୋଇଛି। ତେବେ ରାସ୍ତା ନିର୍ମାଣ ସମୟରେ ସେଣ୍ଟ ଭିନ୍ସେଣ୍ଟ୍ ସ୍କୁଲ ପାର୍ଶ୍ୱରେ ଥିବା ଏକ ଚିଠି ବାକ୍ସକୁ ଅଦରକାରୀ ଭାବେ ପକାଇ ଦିଆଯାଇଛି। ଗତ କିଛି ଦିନ ତଳେ ଏହି ବାକ୍ସକୁ ରାସ୍ତା ନିର୍ମାଣ ସମୟରେ ମୁଖ୍ୟ ରାସ୍ତାରେ ରଖାଯାଇଥିବା ଦେଖିବାକୁ ମିଳିଥିଲା। ଏହାପରେ ପୁଣି ଏହାକୁ ରାସ୍ତା ପାର୍ଶ୍ୱରେ ଅଲୋଡା ଭାବେ ରଖାଯାଇଛି। ଏହି ଚିଠି ବାକ୍ସକୁ ସ୍ଥାନୀୟ ବାସିନ୍ଦା ଓ ସ୍କୁଲ କର୍ତ୍ତୃପକ୍ଷ ବ୍ୟବହାର କରୁଥିଲେ। ଏ ନେଇ ଅସନ୍ତୋଷ ପ୍ରକାଶ ପାଇଛି। ଏଥିସହ ବିଏମ୍ସିର ବିଭିନ୍ନ ଉନ୍ନୟନମୂଳକ କାର୍ଯ୍ୟ ସମୟରେ କୌଣସି ସୂଚନା ଫଳକ ଓ ଯାତାୟାତ ନିମନ୍ତେ ସୁବିଧା କରାଯାଉ ନ ଥିବାରୁ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ବିଏମ୍ସି ନିର୍ବାହୀ ଯନ୍ତ୍ରୀଙ୍କୁ ମୋବାଇଲ ନଂ-୯୪୩୭୨୫୯୪୦୨ରେ ଯୋଗାଯୋଗ କରିଥିଲେ ସୁଦ୍ଧା କାୈଣସି ପ୍ରତିକ୍ରିୟା ମିଳିପାରି ନାହିଁ।
