ଯାଜପୁରରୋଡ୍,୧୧ା୩(ପବିତ୍ର ରଞ୍ଜନ ମହାନ୍ତି): ପୂର୍ବତଟ ରେଳପଥ ଅଧୀନ ଯାଜପୁର-କେନ୍ଦୁଝର ରୋଡ ରେଳଲାଇନର ସମ୍ପ୍ରସାରଣ କାର୍ଯ୍ୟ ଚାଲୁରହିଛି। ଅମୃତ ଭାରତ ଷ୍ଟେଶନ ଯୋଜନାରେ ଏଠାରେ ଏକ ରେଳ ଓଭର ବ୍ରିଜ(ଆର୍ଓବି) ଏବଂ ଗଳିପୋଲ(ଅଣ୍ଡରପାସ) ନିର୍ମାଣ ଆରମ୍ଭ ହୋଇଛି। ଏଥିସହିତ ରେଳଲାଇନ ଦୋହରୀକରଣ କରାଯାଉଛି। ହେଲେ ବିନା ସୁରକ୍ଷା ସାରଞ୍ଜାମରେ ଶ୍ରମିକମାନଙ୍କ ଜୀବନକୁ ବାଜିରେ ଲଗାଇ ଏଠାରେ ଠିକାଦାର କାର୍ଯ୍ୟ କରାଉଥିବା ଦେଖିବାକୁ ମିଳିଛି। ସମ୍ପ୍ରସାରଣ କାର୍ଯ୍ୟରେ ସରକାରଙ୍କ ପକ୍ଷରୁ ରହିଥିବା ନ୍ୟୁନତମ ସୁରକ୍ଷା ବ୍ୟବସ୍ଥାକୁ ରେଲଓ୍ବେ ପକ୍ଷରୁ ଅବମାନନା କରାଯାଉଥିବା ଅଭିଯୋଗ ହୋଇଛି। କେନ୍ଦ୍ର ସରକାରଙ୍କ ଅଧୀକୃତ ସଂସ୍ଥା ଭାରତୀୟ ରେଳବାଇରେ ଯଦି କର୍ମଚାରୀ ଅସୁରକ୍ଷିତଭାବେ କାର୍ଯ୍ୟ କରିବେ ତେବେ କେନ୍ଦ୍ର ସରକାରଙ୍କ ସୁରକ୍ଷା ନିୟମ କାହା ପାଇଁ ବୋଲି ପ୍ରଶ୍ନଉଠିଛି। ବେସରକାରୀ ସଂସ୍ଥାଗୁଡ଼ିକ ସେମାନଙ୍କ କାର୍ଯ୍ୟସ୍ଥଳରେ ସମସ୍ତ ସୁରକ୍ଷା ବ୍ୟବସ୍ଥା ପାଳନ କରୁଛନ୍ତି। ଏଥିରେ ସାମାନ୍ୟତମ ଖିଲାପ କଲେ ସୁରକ୍ଷା ବ୍ୟବସ୍ଥାରେ ଉଲ୍ଲଂଘନ ଦର୍ଶାଇ ତାଙ୍କଠାରୁ ଜରିମାନା ଆଦାୟ କରାଯାଉଛି। ଆବଶ୍ୟକସ୍ଥଳେ କାର୍ଯ୍ୟରୁ ଅବ୍ୟାହତି ପ୍ରଦାନ କରାଯାଉଛି। ହେଲେ ଏଠାରେ ସରକାରଙ୍କ ସବୁ ନିୟମକୁ ଫୁ’ କରି ଠିକାଦାର ଶ୍ରମିକମାନଙ୍କୁ ବିପଦ ପୂର୍ଣ୍ଣ ଅବସ୍ଥାରେ କାର୍ଯ୍ୟ କରାଉଛନ୍ତି।
ଏହି ଷ୍ଟେଶନର ଦୋହରୀକରଣ କାର୍ଯ୍ୟ ସମୟରେ ରେଳବାଇର ବିଦ୍ୟୁତ୍ ଖୁଣ୍ଟ ସ୍ଥାପନ କରାଯିବା ସହିତ ନୂତନ ଲାଇନ ବିଛା କାର୍ଯ୍ୟ ଚାଲିଛି। ଲାଇନ ସମ୍ପ୍ରସାରଣ ସ୍ଥାନରେ ଗର୍ତ୍ତ ଖୋଳି ବିନା ସୁରକ୍ଷା ବାଡାରେ ତାକୁ ଛାଡ଼ି ଦିଆଯାଉଛି। ବିଦ୍ୟୁତ୍ ଖୁଣ୍ଟ୍ ସ୍ଥାପନ ସମୟରେ ଅତ୍ୟନ୍ତ ବିପଦଜନକଭାବେ କର୍ମଚାରୀମାନେ ପ୍ରାୟ ୨୦ ଫୁଟରୁ ଊର୍ଦ୍ଧ୍ୱ ଉଚ୍ଚରେ ଚଢ଼ି ବିନା ସୁରକ୍ଷା ଜୋତା ଏବଂ ସୁରକ୍ଷା ବେଲ୍ଟରେ କାର୍ଯ୍ୟ କରୁଥିବା ଦେଖିବାକୁ ମିଳୁଛି। ଯାଜପୁର ରୋଡ୍ ରେଳଷ୍ଟେଶନଠାରୁ ମାତ୍ର କେଇ ଶହ ମିଟର ଦୂରରେ ଏପରି କାର୍ଯ୍ୟ ହେଉଛି। ହେଲେ ସ୍ଥାନୀୟ ମୁଖ୍ୟ ନିର୍ମାଣ ଯନ୍ତ୍ରୀ ଏବଂ ଅନ୍ୟ ବିଭାଗୀୟ ପଦାଧିକାରୀଙ୍କ ଏହା ଦୃଷ୍ଟିଗୋଚର ହେଉନାହିଁ। ଅନ୍ୟପକ୍ଷରେ ରେଲଓ୍ବେ କର୍ତ୍ତୃପକ୍ଷ ଜାଣିଜାଣି ଶ୍ରମିକଙ୍କ ଜୀବନକୁ ବାଜିରେ ଲଗାଉଥିବା ଅଭିଯୋଗ ହେଉଛି। ଏହି ରେଳଷ୍ଟଶନ ଅର୍ନ୍ତଗତ ପ୍ଲଟ ନିକଟରେ କିଛି ମାସ ତଳେ ରେଳ ୱାଗନ ଗଡ଼ି ୬ଜଣଙ୍କ ଜୀବନ ହାନି ଘଟଥିଲା। ତେବେ ଏତେବଡ଼ ଦୁର୍ଘଟଣା ପରେ ମଧ୍ୟ କାହାର ସୁରକ୍ଷା ପ୍ରତି ଦୃଷ୍ଟି ପଡୁନାହିଁ। ଏ ସମ୍ପର୍କରେ ଉପରିସ୍ଥ ରେଳବାଇ ଅଧିକାରୀ ଏବଂ ରେଳମନ୍ତ୍ରୀ, ଶ୍ରମବିଭାଗ ଦୃଷ୍ଟି ଦେବାକୁ ଅଣସଂଗଠିତ ଶ୍ରମିକ କଂଗ୍ରେସର ରାଜ୍ୟ ଅଧ୍ୟକ୍ଷ ବିଦ୍ୟାଧର ମହାନ୍ତି ଦାବି କରିଛନ୍ତି। ଏନେଇ ରେଳବାଇ ପୂର୍ବତଟ ଡିଭିଜନର ଏଡିଇଏନ ରାଜକିଶୋର ପାତ୍ରଙ୍କୁ ପଚାରିବାରେ ଏହି କାର୍ଯ୍ୟ ତାଙ୍କ ଅଧୀନ ନୁହେଁ। ଏହା ତାଙ୍କ ଉପରିସ୍ଥ ଅଧିକାରୀ କହିପାରିବେ ବୋଲି କହିଥିଲେ। ଏ ସମ୍ପର୍କରେ ଉପରିସ୍ଥ ଅଧିକାରୀଙ୍କ ସହ ଯୋଗାଯୋଗ ହୋଇ ପାରିନାହିଁ।
