ଖଣ୍ଡପଡା.୨୬ା୫ (ସ୍ବ.ପ୍ର.):ଜୀବନ୍ତ ତଥା ସବୁଜ ବୃକ୍ଷକୁ ବନ ବିଭାଗର ବିନା ଅନୁମତିରେ କାଟିବା ଆଇନ ଅନୁଯାୟୀ ଦଣ୍ଡନୀୟ । ତେବେ ଗଛଗୁଡିକୁ କିପରି ମାରି ପରେ କଟାଯାଇ ପାରିବ ସେ ନେଇ କେତେଜଣ ବ୍ୟକ୍ତି ଅଭିନବ ଉପାୟ ଆପଣେଇ ଥିବା ପରିଲକ୍ଷତ ହୋଇଛି । ଖଣ୍ଡପଡା ବ୍ଳକ ଅଧିନ ଖଳିସାହି ଗ୍ରାମଠାରୁ କୋସକା ଦେଇ ଗଣିଆ ବ୍ଳକ ଆଡକଟା ଛକକୁ ସଂଯୋଗ କରୁଥିବା ମୁଖ୍ୟ ରାସ୍ତାଟି ପୂର୍ତ୍ତ ବିଭାଗ ଅଧିନରେ ରହିଛି । ଉକ୍ତ ରାସ୍ତାର ସଂପ୍ରସାରଣ କାର୍ଯ୍ୟ ଇତି ମଧ୍ୟରେ ଶେଷ ହୋଇଛି । ରାସ୍ତା ପାର୍ଶ୍ୱରେ ରାଜରାଜୁଡା ଅମଳରୁ ଶତାଧିକ ଆମ୍ବଗଛ ଲଗାଯାଇଥିଲା । ରାସ୍ତା ସଂପ୍ରସାରଣ ବେଳେ କେତେକ ସ୍ଥାନରେ ଆମ୍ବଗଛ ଗୁଡିକ କଟାଯାଇଛି । ରାସ୍ତା ପାର୍ଶ୍ୱସ୍ଥିତ ଅନେକ ଫଳ ପ୍ରଦାନକାରୀ ଆମ୍ବଗଛର ବକଳ ଗୁଡିକ ଛାଲି ଦେବାରୁ ଏବେ ଗ୍ରୀଷ୍ମର ପ୍ରବାହରେ ଗଛ ଗୁଡିକ ଶୁଖି ଠିଆ ହୋଇଛି । ରାସ୍ତାପାର୍ଶ୍ୱରେ ଶୁଖିଲା ଆମ୍ବଗଛଗୁଡିକୁ ଦେଖି ପରିବେଶବିତ୍ମାନେ ଉଦ୍ବେଗ ପ୍ରକାଶ କରୁଛନ୍ତି । ସ୍ଥାନୀୟ ଅଞ୍ଚଳର କାଠ କଟାଳୀଙ୍କ ଠାରୁ ଆରମ୍ଭ କରି ବ୍ୟବସାୟୀମାନେ ଏହି ଗଛଗୁଡିକ ପ୍ରତି ଲୋଲୁପ ଦୃଷ୍ଟି ପଡୁଥିବା ଜଣାପଡିଛି । ଫଳରେ ସମୟାନୁକ୍ରମେ ଖଳିସାହି-କୋସକା ରାସ୍ତାଟି ବୃକ୍ଷଶୂନ୍ୟ ହେବାରେ ଲାଗିଥିବାରୁ ସେଥିପ୍ରତି ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।
