ବରଗଡ଼,୨୭ା୭(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ନକଲି ଶିକ୍ଷକ ନିଯୁକ୍ତି ଚର୍ଚ୍ଚା ଥମିବାର ନାଁ ନେଉ ନାହିଁ। ଦିନ ଯେଉଁଭଳି ଗଡ଼ି ଚାଲିଛି, ଏହି ପ୍ରସଙ୍ଗକୁ ନେଇ ସେଭଳି ନୂଆକଥା ସାମ୍ନାକୁ ଆସିବାରେ ଲାଗିଛି। ଦୀର୍ଘଦିନର ନୀରବତା ପରେ ଏଭଳି ଏକ ପ୍ରସଙ୍ଗରେ ଜିଲା ଶିକ୍ଷା ବିଭାଗ ପଦକ୍ଷେପ ଆରମ୍ଭ କରିଛି। ଜିଲା ଶିକ୍ଷା ଅଧିକାରୀ(ଡିଇଓ) ରାଧାକାନ୍ତ ଛାତ୍ରୀଙ୍କ ନିର୍ଦ୍ଦେଶ ପରେ ଜିଲାର ବିଭିନ୍ନ ବ୍ଲକ ଶିକ୍ଷା ଅଧିକାରୀ(ବିଇଓ)ମାନେ ଯାଞ୍ଚ ପ୍ରକ୍ରିୟା ଆରମ୍ଭ କରିଛନ୍ତି। ଏହି କ୍ରମରେ ଶନିବାରରୁ ଅମ୍ବାପାଲିସ୍ଥିତ ସମଲେଶ୍ୱରୀ ସରକାରୀ ଉଚ୍ଚ ବିଦ୍ୟାଳୟରେ ବରଗଡ଼ ବ୍ଳକରେ କାର୍ଯ୍ୟରତ ଶିକ୍ଷୟିତ୍ରୀ, ଶିକ୍ଷକଙ୍କ ନିଯୁକ୍ତିପତ୍ର, ଶିକ୍ଷାଗତ ତଥା ଡିଗ୍ରୀ ପ୍ରମାଣପତ୍ର, ଜାତିଗତ ପ୍ରମାଣପତ୍ର, ଭିନ୍ନକ୍ଷମ ପ୍ରମାଣପତ୍ର ଆଦି ଯାଞ୍ଚ ଆରମ୍ଭ ହୋଇଛି। ଆସନ୍ତା ୩୦ ତାରିଖ ପର୍ଯ୍ୟନ୍ତ ଉକ୍ତ ବ୍ଲକର ଶିକ୍ଷୟିତ୍ରୀ, ଶିକ୍ଷକଙ୍କ ପ୍ରମାଣପତ୍ରର ଏଭଳି ଯାଞ୍ଚ କାର୍ଯ୍ୟକ୍ରମ ରହିଛି।
ଯାଞ୍ଚ ପ୍ରକ୍ରିୟାର ପ୍ରଥମ ଦିବସରେ ପୂର୍ବତନ ସମ୍ବଲପୁର ଶିକ୍ଷା ମଣ୍ଡଳାଧୀଶ ସ୍ବର୍ଗତ କୈଳାସ ଗୁରୁଙ୍କ କାର୍ଯ୍ୟକାଳ ସମୟରେ ନିଯୁକ୍ତି ପାଇଥିବା ଶିକ୍ଷୟିତ୍ରୀ, ଶିକ୍ଷକଙ୍କ ପ୍ରମାଣପତ୍ର ଯାଞ୍ଚ କରାଯାଇଥିଲା। ତେବେ ଯାଞ୍ଚ ପ୍ରକ୍ରିୟା ନ ସରୁଣୁ କିଛି ଲୋକ ନିଜକୁ ବିଭିନ୍ନ ଗଣମାଧ୍ୟମ ପ୍ରତିନିଧିଙ୍କ ପରିଚୟ ଦେବା ସହିତ ବଡ଼ବଡ଼ିଆ ନେତା, ଅଧିକାରୀଙ୍କ ସହିତ ସେମାନଙ୍କ ଭଲ ସମ୍ପର୍କ ରହିଥିବା କହି କେତେକ ଶିକ୍ଷୟିତ୍ରୀ, ଶିକ୍ଷକଙ୍କୁ ନକଲି ବୋଲି କହି ଧମକଚମକ ଦେଇ ଆସୁଥିବା ସାଧାରଣରେ ଆଲୋଚିତ ହେଉଛି। ଏଭଳିସ୍ଥଳେ ସେଭଳି କେହି କୌଣସି ଶିକ୍ଷୟିତ୍ରୀ, ଶିକ୍ଷକଙ୍କୁ ଫୋନ୍ କରୁଛନ୍ତି ତ ଆଉ କେହି ବିଦ୍ୟାଳୟ କିମ୍ବା ସେମାନଙ୍କ ଘରେ ପହଞ୍ଚି ଯାଉଛନ୍ତି। ସେହିପରି କେତେ ଲୋକ ବାଟରେ ମଧ୍ୟ ଶିକ୍ଷୟିତ୍ରୀ, ଶିକ୍ଷକଙ୍କୁ ଅଟକାଉ ଥିବା ଏବଂ ନାନା ଆଳରେ ଭୟଭୀତ କରି ମୋଟାଅଙ୍କର ଟଙ୍କା ଅସୁଲିର ମସୁଧା ଚଳାଉଥିବା ଏବେ ଜିଲାରେ ଚର୍ଚ୍ଚାର ବିଷୟ ହୋଇଛି।
ତେବେ ନକଲି ଶିକ୍ଷକ ନିଯୁକ୍ତି ପ୍ରସଙ୍ଗ ଉଠିବାବେଳେ ଗୋଟିଏ ପଟେ ଜିଲା ଶିକ୍ଷା ବିଭାଗ ଏହାକୁ ଗୁରୁତ୍ୱର ସହିତ ନେଇ ଯାଞ୍ଚ ପ୍ରକ୍ରିୟା ଆରମ୍ଭ କରିଥିବାବେଳେ ଅନ୍ୟପଟେ ଧମକଚମକ ଦେଇ ଟଙ୍କା ଅସୁଲି ଭଳି ହୀନପ୍ରୟାସ କରୁଥିବା ଲୋକଙ୍କୁ ମଧ୍ୟ ଠାବ କରିବା ଏବଂ ସେମାନଙ୍କ ବିରୋଧରେ କାର୍ଯାନୁଷ୍ଠାନ ନିଆଯିବାର ଆବଶ୍ୟକତା ରହିଛି ବୋଲି ସାଧାରଣରେ ମତପ୍ରକାଶ ପାଇଛି। ଜିଲାରେ ନକଲି ଶିକ୍ଷକ ନିଯୁକ୍ତି ପ୍ରସଙ୍ଗ ବାରମ୍ବାର ଉଠୁଛି। ଚିରାଚରିତ ଢଙ୍ଗରେ ଯାଞ୍ଚ ପ୍ରକ୍ରିୟା ଚାଲୁଛି। ତଥାପି ନକଲି ଶିକ୍ଷକଙ୍କ ମୁଖା ଖୋଲୁ ନଥିବାରୁ ପୁଣି ଏହି ପ୍ରସଙ୍ଗ ଉଠି ହଇଚଇ ସୃଷ୍ଟି ହେଉଛି। ଏଭଳି ସ୍ଥିତିରେ ନକଲି ଶିକ୍ଷକଙ୍କୁ ଠାବ କରିବା ସହିତ ଏହି ପ୍ରସଙ୍ଗରେ ହାତଗୁଞ୍ଜା ପାଇଁ ଧମକଚମକ ଦେଉଥିବା ତଥାକଥିତ ଗଣମାଧ୍ୟମ ପ୍ରତିନିଧିମାନଙ୍କୁ ମଧ୍ୟ ଚିହ୍ନଟ କରି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି ହେଉଛି।
