ପୁରୀ ଅଫିସ/କଣାସ/ଡେଲାଙ୍ଗ/ନିମାପଡ଼ା (ସ୍ବ.ପ୍ର./ଡି.ଏନ୍.ଏ), ୨ା୯ : ଦୟା, ରାଜୁଆ, ଭାର୍ଗବୀ, ଧନୁଆ ପରେ ଏବେ ପୁରୀ ଜିଲାରେ ଲୁଣା ନଦୀ ଉଗ୍ରରୂପ ଧାରଣ କରିଛି। ଲୁଣା ନଦୀର ପାଣି ଡେଲାଙ୍ଗ ବ୍ଲକର ଅନେକ ଅଞ୍ଚଳକୁ ବୁଡ଼ାଇ ଦେଇଛି। ବିଶେଷକରି ଡେଲାଙ୍ଗ-କଣାସ ରାସ୍ତାରେ ବନ୍ୟା ଜଳ ପ୍ରବାହିତ ହେଉଥିବା ବେଳେ ବହୁ ଗଁା ଭିତରେ ବି ପାଣି ପଶିଛି। ସେପଟେ ଦୟାରୁ ପାଣି ଖସୁ ନ ଥିବାରୁ କଣାସ ଅଞ୍ଚଳବାସୀ ଦୁର୍ଦ୍ଦଶାରେ ଦିନ କାଟୁଛନ୍ତି। ଶହ ଶହ ପରିବାର ଘରଦ୍ୱାର ଛାଡ଼ିି ନଦୀ ବନ୍ଧରେ ରହିଥିବା ବେଳେ ଅନେକ ପରିବାର କୋଠା ଛାତରେ ଆଶ୍ରୟ ନେଇଛନ୍ତି। ଦୟା ଓ ରାଜୁଆ ନଦୀର ଘାଇ ଦେଇ ଏବେ ବି କଣାସର ବିଭିନ୍ନ ଅଞ୍ଚଳକୁ ପାଣି ମାଡୁଛି। ସେହିପରି ପୁରୀ ସଦର ବ୍ଲକରେ ଭାର୍ଗବୀ, ନିମାପଡ଼ା ବ୍ଲକରେ ଧନୁଆ ନଦୀ ବନ୍ଧବାଡ଼ ଦେଇ ଜନବସତିକୁ ପଶିଥିବା ବେଳେ ହଜାର ହଜାର ଲୋକ ପ୍ରଭାବିତ ହୋଇଛନ୍ତି। ପ୍ରଶାସନ ପକ୍ଷରୁ ଶୁଖିଲା ଖାଦ୍ୟ ଓ ରନ୍ଧାଖାଦ୍ୟ ଦିଆଯାଉଥିଲେ ବି ଅନେକ ବିପନ୍ନ ବଞ୍ଚତ୍ତ ରହିଛନ୍ତି।
ଦୟା ନଦୀର ଉଦ୍ବୃତ୍ତ ବନ୍ୟାଜଳ କଣ୍ଟି କାଜ ଦେଇ ପ୍ରଥମେ ଲୁଣା ନଦୀରେ ପଡ଼ିଥିଲା। କିନ୍ତୁ ଦୟାରେ ବନ୍ୟାପାଣି ବଢୁଥିବାରୁ ଲୁଣାନଦୀ ପାଣି ଉଛୁଳି ଚାଇଁପୁର, ଅରିଶଲ, ସିଂହବ୍ରହ୍ମମପୁର, ଡେଲାଙ୍ଗ କୋଠବାଡ଼, ସୁଜନପୁର ଓ ମୁନିନ୍ଦା ପଞ୍ଚାୟତରେ ପଶିଛି। ତେଣୁ ବିଭିନ୍ନ ରାସ୍ତାରେ ବନ୍ୟାପାଣିର ସୁଅ ଛୁଟୁଥିବାବେଳେ ଅନେକ ଗଁା ପ୍ରଭାବିତ ହୋଇଛି। ମୁନିନ୍ଦା ପଞ୍ଚାୟତରେ ବନ୍ୟାପାଣି ଅଧିକ କ୍ଷତି ଘଟାଇଛି। ପଞ୍ଚାୟତର ଶଙ୍ଖପାଟ, ଡାକପଡ଼ା, ବେଲପଡ଼ା, ମୁନିନ୍ଦା ଗଁା ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି। ଡେଲାଙ୍ଗ-କଣାସ ରାସ୍ତାର ଡେଲାଙ୍ଗରୁ ମୁନିନ୍ଦା ପର୍ଯ୍ୟନ୍ତ ବିଭିନ୍ନ ସ୍ଥାନରେ ରାସ୍ତା ଉପରେ ଫୁଟେ ଦେଢଫୁଟର ପାଣି ଚାଲୁଛି। ସେହିପରି ବେରବୋଇ ଲେଭଲ କ୍ରସିଂଠାରୁ ଡେଲାଙ୍ଗ ହାଟ ମଧ୍ୟରେ ରାମଚନ୍ଦ୍ରପୁର, ପ୍ରାଣୀ ଚିକିତ୍ସାଳୟ ଆଦି ସ୍ଥାନରେ ରାସ୍ତା ଉପରେ ପାଣି ଚାଲୁଥିବା ଦେଖିବାକୁ ମିଳିଛି। ମୁନିନ୍ଦା ପଞ୍ଚାୟତର ସେବତୀପୁର, ବରକେରା, ମୋହନପୁର, ଚାନ୍ଦୋଳ, ଅଳଉତା ଏବଂ ସାନମୁନିନ୍ଦା ଗଁାର ଗହୀର ସମ୍ପୂର୍ଣ୍ଣ ବୁଡ଼ିଯାଇଛି। ଯଦି ପାଣି ନ କମେ ତେବେ ଉପରୋକ୍ତ ଗଁା ଭିତରକୁ ପାଣି ପଶିବା ସମ୍ଭାବନା ରହିଛି। ସେହିପରି କଣାସ ବ୍ଲକରେ ବନ୍ୟା ବିପନ୍ନଙ୍କ ଦୁର୍ଦ୍ଦଶା ବଢିବାରେ ଲାଗିଛି। ଦୟା ନଦୀର ନୂଆସାହି ଘାଇ ଯୋଗୁ ପ୍ରାୟ ୨୦ ହଜାର ଲୋକ ବିପନ୍ନ ହୋଇପଡ଼ିଛନ୍ତି। ଉଜୁଡ଼ିଯାଇଛି ଚାଷ। ଗଁା, ଘର ବନ୍ୟାପାଣିରେ ଏକାକାର ହୋଇଯାଇଛି। ଘର ଭିତରେ ୫/୬ ଫୁଟର ପାଣିଥିବାବେଳେ ରାସ୍ତା ଉପରେ ବି ସୁଅ ଚାଲୁଛି। ପାଣ୍ଡିଆକେରା, ଗଡ଼ବଡପୁଟ, ସାନପୁଟ ପଞ୍ଚାୟତର ପ୍ରାୟ ୩୦ ଗଁାରେ ବନ୍ୟା ପାଣି ବଢୁଥିବାରୁ ସ୍ଥିତି ଜଟିଳ ହେବାରେ ଲାଗିଛି। ଗୃହପାଳିତ ପ୍ରାଣୀଙ୍କ ଅବସ୍ଥା ମଧ୍ୟ ଦୟନୀୟ ହୋଇପଡ଼ିଛି। କଣାସର ଅନେକ ପରିବାର ନଦୀବନ୍ଧରେ ଆଶ୍ରୟ ନେଇଛନ୍ତି। ପ୍ରଶାସନ ପକ୍ଷରୁ ଗୋଟିଏ ବେଳା ରନ୍ଧାଖାଦ୍ୟ ଦିଆଯାଉଛି। ତଥାପି ଅନେକ ବିପନ୍ନଙ୍କ ପାଖରେ କୌଣସି ସହାୟତା ପହଞ୍ଚତ୍ ପାରିନାହିଁ।
