ଭଦ୍ରକ ଅଫିସ,୨୭ା୨: ସିଲିଣ୍ଡରରୁ ଗ୍ୟାସ ଲିକ୍ ହୋଇ ସ୍ତ୍ରୀଙ୍କ ଦେହରେ ନିଆଁ ଲାଗିଯାଇଥିଲା। ସ୍ତ୍ରୀଙ୍କ ଚିତ୍କାର ଶୁଣି ବଞ୍ଚାଇବା ପାଇଁ ଆସି ସ୍ବାମୀ ନିଆଁରେ ପୋଡ଼ି ଗୁରୁତର ଆହତ ହୋଇଛନ୍ତି। ଏହି ଘଟଣା ଘଟିଛି ଭଦ୍ରକ ଜିଲା ଧୂଷୁରୀ ଥାନା ବୟାଙ୍ଗଡିହୀ ପଞ୍ଚାୟତ ନୂଆଗାଁରେ। ନୂଆଗାଁର ପ୍ରମିଳା ଦାସ ଶନିବାର ଘରେ ରୋଷେଇ କରୁଥିବା ବେଳେ ହଠାତ୍ ସିଲିଣ୍ଡରୁ ଗ୍ୟାସ ଲିକ୍ ହୋଇ ଶାଢୀରେ ନିଆଁ ଲାଗିଯାଇଥିଲା। ଏନେଇ ପ୍ରମିଳା ଚିତ୍କାର କରିଥିଲେ। ପାଟି ଶୁଣି ସ୍ବାମୀ ମହେନ୍ଦ୍ର ଉଦ୍ଧାର କରିବାକୁ ଘର ଭିତରକୁ ଯାଇଥିଲେ। ସେତିକିବେଳେ ତାଙ୍କ ଦେହରେ ମଧ୍ୟ ନିଆଁ ଲାଗିଯାଇଥିଲା। ସ୍ଥାନୀୟ ଲୋକେ ସ୍ବାମୀ, ସ୍ତ୍ରୀଙ୍କୁ ଉଦ୍ଧାର କରି ଭଦ୍ରକ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ଉଭୟଙ୍କ ଅବସ୍ଥା ଗୁରୁତର ରହିଥିବା ଜଣାପଡ଼ିଛି।
