ପୁରୀ ଅଫିସ,୩।୩: ପୁରୀ ଜିଲାରେ ଅନୁସୂଚିତ ଜାତି ଓ ଜନଜାତି ବିଭାଗ ଦ୍ୱାରା ପରିଚାଳିତ ୫ଟି ଛାତ୍ରୀନିବାସ ମଙ୍ଗଳବାର ଉଦ୍ଘାଟିତ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଗୁଡ଼ିକୁ ଭିଡିଓ କନଫରେନ୍ସ କୃଷ୍ଣପ୍ରସାଦ ବ୍ଲକ୍ର ବାସୁଦେବ ନୋଡାଲ ହାଇସ୍କୁଲ, ପୁରୀ ସହର ଭୋଳାନାଥ ବିଦ୍ୟାପୀଠ, କଣାସର ଗୋପୀନାଥ ଉଚ୍ଚବିଦ୍ୟାଳୟ, କାକଟପୁରର କାକଟପୁର ବାଳିକା ଉଚ୍ଚବିଦ୍ୟାଳୟ ଓ ଗୁଆଳିପଡ଼ା ସେବାଶ୍ରମରେ ଏହି ଛାତ୍ରୀ ନିବାସ ଉଦଘାଟନ ହୋଇଛି। ତେବେ ମଙ୍ଗଳବାର ଏହି ଉଦଘାଟନ ସମୟରେ ଭୋଳାନଥ ବିଦ୍ୟାପୀଠ ପରିସରରେ ଉଦଘାଟନ ବେଳେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଉଦଘାଟନୀ ଉତ୍ସବକୁ ଆସିଥିବା ଅତିଥିଙ୍କୁ ସ୍କୁଲ୍ କମିଟି ଦୁଇରୁ ୩ ଘଣ୍ଟା ପାଇଁ ଅଟକ ରଖିଛି। ପ୍ରଧାନଶିକ୍ଷକ ଓ ପରିଚାଳନା କମିଟିର ବିନା ଉପସ୍ଥିତରେ ସ୍କୁଲ ପରିସରରେ ଉଦଘାଟନ ଉତ୍ସବ ହୋଇଥିବା ଅଭିଯୋଗରେ ପରିଚାଳନା କମିଟି ଏଭଳି କରିଛି । ଭୋଳାନାଥ ସ୍କୁଲ୍ ଅଭିଭାବକ ସଂଘ ସଭାପତି ଓ କମିଟି ସଦସ୍ୟ ପ୍ରମୋଦ କୁମାର ଜେନା କହିଛନ୍ତି ଯେ, ମଙ୍ଗଳବାର ସ୍କୁଲ୍ ଶିକ୍ଷୟତ୍ରୀଙ୍କଠାରୁ ଖବର ପାଇବା ପରେ ପରିଚାଳନା କମିଟି ଉଦଘାଟନ ଉତ୍ସବ ପାଇଁ ପ୍ରସ୍ତୁତ ଥିଲା। ଜିଲାପାଳଙ୍କୁ ଅପେକ୍ଷା ମଧ୍ୟ ରହିଥିଲା। ମାତ୍ର କୌଣସି ପୂର୍ବ ସୂଚନା ନଦେଇ ରୋଡ୍ ଓ ବିଲ୍ଡିଂ ମୁଖ୍ୟ ଯନ୍ତ୍ରୀ, ବିଡିଓ, ୱେଲଫେୟାର ଅଫିସର ଭଳି କିଛି ଅଫିସର ଉଦଘାଟନୀ ଉତ୍ସବ କାଯର୍ୟ ଶେଷ କରି ସାରିଥିଲେ। ଏହାପରେ ଆମେ ଅପମାନିତ ଅନୁଭବ କରି ସ୍କୁଲ୍ ଗେଟ୍ ତାଲା ପକାଇ ସେମାନଙ୍କୁ ଅଟକ ରଖିଥିଲୁ। ଜିଲାପାଳ ଆସିଲେ ହିଁ ଏମାନଙ୍କୁ ଛଡ଼ା ଯିବ ବୋଲି ଦାବି ରଖାଯାଇଥିଲା। ଘଟଣା ସ୍ଥଳରେ କିଛି ସମୟ ପାଇଁ ଉତ୍ତେଜନା ଲାଗି ରହିବା ପରେ ଜିଲା ମୁଖ୍ୟ ଶିକ୍ଷା ଅଧିକାରୀ ନିରଞ୍ଜନ ସାହୁ ସେଠାରେ ପହଞ୍ଚି ପରିଚାଳନା କମିଟିକୁ ବୁଝାଶୁୁଝା କରି ଗେଟ୍ ଖୋଲିଥିଲେ।
