ନୂଆଦିଲ୍ଲୀ: ସରକାର ଆଗାମୀ ଦିନରେ ଏକ ରେଣ୍ଟାଲ ବା ଭଡା ସଂକ୍ରାନ୍ତ ଆଇନ ଆଣିବାକୁ ଯୋଜନା ରଖିଛନ୍ତି। ଆବାସ ଏବଂ ସହରୀ ବ୍ୟାପାର ସଚିବ ଦୁର୍ଗା ଶଙ୍କର ମିଶ୍ର ଗୁରୁବାର ଏ ସମ୍ପର୍କରେ ସୂଚନା ଦେଇଛନ୍ତି। ଏହି ଅବସରରେ ସୂଚନା ଦେଇ ସେ କହିଛନ୍ତି, ଏହା ଦ୍ୱାରା ରିୟଲ ଇଷ୍ଟେଟ କ୍ଷେତ୍ର ଏବଂ ଭଡାରେ ପ୍ରଦାନ କରାଯାଉଥିବା ଘର କ୍ଷେତ୍ରକୁ ପ୍ରୋତ୍ସାହନ ମିଳିବ। ନାରେଡକୋ ପକ୍ଷରୁ ଅନୁଷ୍ଠିତ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ସେ ଏଭଳି କହିଛନ୍ତି। ଜୁଲାଇ ୨୦୧୯ରେ ସରକାର ମଡେଲ ଟେନାନ୍ସି ଆଇନର ଡ୍ରାଫ୍ଟ କରିଥିଲେ। ପ୍ରବାସୀଙ୍କ ଲାଗି ଆରମ୍ଭ କରାଯାଇଥିବା ସୁଲଭ ଘରଭଡା କମ୍ପ୍ଲେକ୍ସ ସ୍କିମର ଅଗ୍ରଗତି ଉନ୍ନତ ରହିଛି। ଏହା ଆଗାମୀ ଦିନରେ ସହରଗୁଡିକରେ ବସ୍ତିକୁ କମାଇବା ଦିଗରେ ସହାୟକ ହେବ। ଦେଶରରେ ହାଉସିଂ ସେଲ୍କୁ ବଢାଇବା ଲାଗି ସରକାର ବିଭିନ୍ନ ପଦକ୍ଷେପ ନେଉଥିବା ସେ ମତ ରଖିଛନ୍ତି। ସେହିଭଳି ଲକଡାଉନର ବିଭିନ୍ନ କଟକଣାକୁ ଧୀରେ ଧୀରେ ହଟାଯାଉଛି। ଘର ବିକ୍ରିକୁ ବଢାଇବା ଲାଗି ପଞ୍ଜୀକରଣ ବେଳେ ଲାଗୁ ହେଉଥିବା ଷ୍ଟାମ୍ପ ଡ୍ୟୁଟିକୁ ମହାରାଷ୍ଟ୍ର ଏବଂ କର୍ନାଟକ ଭଳି ରାଜ୍ୟ ବାଦ ଦେଇଛନ୍ତି। ହାଉସିଂ କ୍ଷେତ୍ରକୁ ଉତ୍ସାହିତ କରିବା ଲାଗି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳ ଷ୍ଟାମ୍ପ ଡ୍ୟୁଟି କୋହଳ କରିବା ଲାଗି ସେ ନିବେଦନ କରିଛନ୍ତି।
