କେନ୍ଦ୍ରାପଡା ଜିଲା ପଟ୍ଟାମୁଣ୍ଡାଇ ବ୍ଲକ ଅନ୍ତର୍ଗତ ଡାମରପୁର ଗଁାର ସୁଲୋଚନା ଏବଂ ସୁରେନ୍ଦ୍ର ପଣ୍ଡାଙ୍କ ଝିଅ ଶ୍ୱେତାଲିନ୍। ପ୍ରାୟ ୧୦୦ରୁ ଊର୍ଦ୍ଧ୍ୱ ଆଲବମ୍ରେ କଣ୍ଠଦାନ କରି ସୋସିଆଲ୍ ମିଡିଆରେ ଏକ ପରିଚିତ ଚେହେରା ପାଲଟିଛନ୍ତି ସେ। ଓଡିଶାର ଅନେକ ନାମୀ କଣ୍ଠଶିଳ୍ପୀଙ୍କ ସହ କଣ୍ଠଦାନ କରି ଶ୍ରୋତାଙ୍କ ଠାରୁ ପ୍ରଶଂସା ସାଉଁଟିଛନ୍ତି। ଆଜାଦି କା ଅମୃତ ମହୋତ୍ସବରେ ନ୍ୟାଶନାଲ ଆଓ୍ବାର୍ଡ ସମେତ ଅନେକ ସରକାରୀ ଏବଂ ବେସରକାରୀ ସଂସ୍ଥା ପକ୍ଷରୁ ପୁରସ୍କୃତ ହୋଇଛନ୍ତି। ପିଲା ବେଳେ ହିଁ ବିଦ୍ୟାଳୟସ୍ତରୀୟ କାର୍ଯ୍ୟକ୍ରମ ଏବଂ ସ୍ଥାନୀୟ ଅଞ୍ଚଳରେ ଆୟୋଜିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ଯୋଗ ଦେଇ ଶ୍ରୋତାଙ୍କ ହୃଦୟ ଜିତି ପାରିଲେ। ସ୍କୁଲରେ ପଢୁଥିବା ସମୟରେ ଅନେକ ସମେତ ପ୍ରତିଯୋଗିତାରେ ଅଂଶଗ୍ରହଣ କରି ପ୍ରଥମ ହେଉଥିଲେ। ତେଣୁ ସପ୍ତମ ପଢୁଥିବାବେଳେ ଗୁରୁଶ୍ରୀ ରବୀନ୍ଦ୍ର ନାଥ ମିଶ୍ରଙ୍କ ପାଖରେ ଓଡ଼ିଶୀ ସଙ୍ଗୀତ ଶିକ୍ଷା କରିବା ଆରମ୍ଭ କଲେ ଓ ଧୀରେ ଧୀରେ ସଂଗୀତ କ୍ଷେତ୍ରରେ ସଫଳତାର ଶିିଡି ଚଢିଚାଲିଲେ। ସେ କୁହନ୍ତି, ‘ମୋ ପ୍ରଥମ ଗୁରୁ ହେଉଛନ୍ତି ମୋ ବାପା। ମାତ୍ର ୪ ବର୍ଷ ବୟସରେ ସେ ମୋତେ ପ୍ରଥମେ ସଙ୍ଗୀତ ଶିଖାଇଥିଲେ। ଆଜି ଯଦି ମୁଁ ସୋସିଆଲ ମିଡିଆରେ ପରିଚିତ ହୋଇଥାଏ, ତାହା କେବଳ ମୋ ବାବା, ମାମା ଓ ମୋ ଗୁରୁ ପ୍ରଦୀପ କୁମାର ଦାଶଙ୍କ ପାଇଁ। ସବୁ କ୍ଷେତ୍ରରେ ଆଗକୁ ବଢିବାରେ ସେମାନେ ବେଶ୍ ପ୍ରୋତ୍ସାହିତ କରିଥାନ୍ତି।’ ଓଡ଼ିଶାର ସ୍ବନାମଧନ୍ୟ ମ୍ୟୁଜିକ ଡାଇରେକ୍ଟର ତଥା ଗୁରୁ ଦିନେଶ ମଲ୍ଲିକଙ୍କ ସହ ଦେଖା ହେବା ପରେ ଫିଲ୍ମ ଲାଇନରେ ଯୋଗ ଦେବାର ସୁଯୋଗ ମିଳିଲା। ତା’ ପରେ ସେ ଅନେକ ମ୍ୟୁଜିକ ଡାଇରେକ୍ଟରଙ୍କ ସହ କାମ କରିଛନ୍ତି ଏବଂ ଓଡ଼ିଶାର ନାମୀଦାମୀ କଣ୍ଠଶିଳ୍ପୀ ହ୍ୟୁମାନ ସାଗର, ତାରିକ ଅଜିଜ୍, ବିଷ୍ଣୁମୋହନ କବି, ପପୁ ପମ୍ପମ୍, ଦିଲୀପ୍ କୁମାର ପ୍ରମୁଖଙ୍କ ସହ କଣ୍ଠଦାନ କରିସାରିଛନ୍ତି। ତେବେ ବଲିଉଡ୍ ଲିଜେଣ୍ଡ ସୁରେଶ ଓ୍ବାଡ଼େକରଙ୍କ ସହ ଗୀତ ଗାଇବାର ସୁଯୋଗ ପାଇବା ମୋ ପାଇଁ ବେଶ୍ ଗୌରବର କଥା ବୋଲି ସେ ପ୍ରକାଶ କରନ୍ତି। ଓଡ଼ିଶାର ଫିଲ୍ମ ଇଣ୍ଡଷ୍ଟ୍ରିରେ ଗୀତ ଗାଇବା ସହ ଓଡ଼ିଶୀ ସଙ୍ଗୀତରେ ଜଣେ କଣ୍ଠଶିଳ୍ପୀ ଭାବରେ ନିଜ ଗାଁ, ରାଜ୍ୟ ଓ ସମଗ୍ର ଭାରତରେ ପରିଚିତ ହେବାକୁ ଲକ୍ଷ୍ୟ ରଖିଛନ୍ତି ଶ୍ୱେତାଲିନ୍।
