ଭୁବନେଶ୍ୱର,୭।୬(ବ୍ୟୁରୋ):ରାତିହେଲେ ରାଜଧାନୀରେ ମୁଖ୍ୟ ରାସ୍ତାଠାରୁ ଗଳିକନ୍ଦି ଘୁରି ବୁଲୁଥିଲେ। ଯାହାକୁ ପାରିଲେ ଛୁରାମାଡ଼ କରି ଲୁଟୁଥିଲେ। ଗତ ୧୬ ତାରିଖରେ ଜଣେ ଧୂପ ବ୍ୟବସାୟୀଙ୍କୁ ଛୁରି ଭୁସି ଲୁଟ୍ କରିବା ଘଟଣାରେ ଭରତପୁର ଥାନା ପୋଲିସ ସମ୍ପୃକ୍ତ ଗ୍ୟାଙ୍ଗ ମୁଖ୍ୟଙ୍କ ସମେତ ୨ ଜଣଙ୍କୁ ଗିରଫ କରିଛି। ସେମାନେ ହେଲେ ଶହୀଦନଗର ଥାନା ଶାନ୍ତିପଲ୍ଲୀ ବସ୍ତିରେ ରହୁଥିବା ପୁରୀ ଜିଲା ଡେଲାଙ୍ଗ ଅଞ୍ଚଳର କାଳିଆ ଓରଫ ଦୀପକ ପ୍ରଧାନ(୨୩) ଓ ସହଯୋଗୀ ଲକ୍ଷ୍ମୀସାଗର ଥାନା ଅନ୍ତର୍ଗତ ବମିଖାଲରେ ରହୁଥିବା ଲୁଡୁ ଓରଫ ଶୁଭମ ସ୍ବାଇଁ(୨୦)। ଏମାନଙ୍କଠାରୁ ଗୋଟିଏ ଛୁରି, ଗୋଟିଏ ବାଇକ ଓ ୧୫ ମୋବାଇଲ ଫୋନ୍ ଜବତ କରାଯାଇଛି। ଅଭିଯୁକ୍ତଦ୍ୱୟଙ୍କୁ ସୋମବାର କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏହି ଗ୍ୟାଙ୍ଗର ସଦସ୍ୟମାନେ ଏକାଧିକ ଲୁଟ୍ ଘଟଣାରେ ସମ୍ପୃକ୍ତ ଅଛନ୍ତି। ଗ୍ୟାଙ୍ଗର ଅନ୍ୟ ସଦସ୍ୟଙ୍କୁ ଧରିବାକୁ ଖୋଜାଚାଲିଛି ବୋଲି ଥାନାଧିକାରୀ ବିଭୁଦତ୍ତ ରାଉତରାୟ କହିଛନ୍ତି।
ପୋଲିସ ସୂଚନାନୁସାରେ, ମାଷ୍ଟରମାଇଣ୍ଡ୍ କାଳିଆ କେତେଜଣ ସହଯୋଗୀଙ୍କ ସହ ମିଶି ଏକ ଗ୍ୟାଙ୍ଗ୍ ଗଢ଼ିଥିଲେ। ଗ୍ୟାଙ୍ଗର ସଦସ୍ୟମାନେ ଦୁଇଜଣିଆ ଦଳ ହୋଇ ବାଇକରେ ବୁଲି ଲୁଟ୍ପାଟ କରନ୍ତି। ଲୁଡୁ ଚୋରା ମୋବାଇଲ ଫୋନ୍ ବିକ୍ରି କରନ୍ତି। କଳିଙ୍ଗନଗର କେ-୩ରେ ରୁହୁଥିବା ଧୂପ ବ୍ୟବସାୟୀ ବିଭୁପ୍ରସାଦ ଦାଶ ନିଜ କାମ ସାରି ମେ’ ୧୬ ରାତିରେ ଘରକୁ ଫେରୁଥିଲେ। ରାତି ପ୍ରାୟ ୧୧ଟା ୫୦ରେ ଘାଟିକିଆ ହନୁମାନ ମନ୍ଦିର ନିକଟରେ ବିଭୁପ୍ରସାଦ ଯାଉଥିବାବେଳେ ଗ୍ୟାଙ୍ଗର ସଦସ୍ୟ ସଲମନ୍ଙ୍କ ସହ କାଳିଆ ତାଙ୍କୁ ଅଟକାଇ ଟଙ୍କା ବ୍ୟାଗକୁ ଛଡାଇବାକୁ ଚେଷ୍ଟା କରିଥିଲେ। ବିଭୁପ୍ରସାଦ ବିରୋଧ କରିବାରୁ ସେମାନେ ତାଙ୍କ ପେଟକୁ ଛୁରାମାଡ କରି ୩ ହଜାର ଟଙ୍କା ଥିବା ବ୍ୟାଗ ଓ ମୋବାଇଲ ଫୋନ୍ ନେଇ ପଳାଇଥିଲେ। ବିଭୁପ୍ରସାଦ ରକ୍ତାକ୍ତ ଅବସ୍ଥାରେ ରାସ୍ତାରେ ପଡିଥିବା ଦେଖି ଉକ୍ତ ବାଟଦେଇ ଯାଉଥିବା କେତେଜଣ ବ୍ୟକ୍ତି ଆମ୍ବୁଲାନ୍ସରେ ନିକଟ ହସ୍ପିଟାଲରେ ଭର୍ତ୍ତି କରିଥିଲେ। ସେ ବର୍ତ୍ତମାନ ଏମ୍ସରେ ଚିକିତ୍ସିତ ହେଉଥିବାବେଳେ ତାଙ୍କ ବନ୍ଧୁ ପ୍ରଭାତ ରଞ୍ଜନ ଦାଶଙ୍କ ଅଭିଯୋଗକ୍ରମେ ପୋଲିସ ଏକ ମାମଲା (ନଂ.୧୯୧/୨୦୨୨) ରୁଜୁ କରି ତଦନ୍ତ ଚଳାଇଛି।
