ନାଉଗାଁ,୨୨।୩(ସ୍ବ.ପ୍ର.): ନାଉଗାଁ ବ୍ଲକ ଦେଇ ବାଲି ଭଉଁରୀ-ଶିଖରଘାଟ, କୋକିଢ଼ିହ-ତେଲସରା ରାସ୍ତା ସଂଯୋଗ କରୁଛି। ଏହି ରାସ୍ତା ପୂର୍ତ୍ତ ବିଭାଗ ଜଗତ୍ସିଂହପୁର ଡିଭିଜନ ଅଧୀନରେ ରହିଛି। କୋକିଡିହ-ତେଲସରା ରାସ୍ତା ପାଇଁ ପୂର୍ତ୍ତ ବିଭାଗ ପକ୍ଷରୁ ଟେଣ୍ଡର କରାଯିବା ସହ ନିର୍ମାଣ ଓ ପୁନଃ ସମ୍ପ୍ରସାରଣ କାର୍ଯ୍ୟ ଜାରି ରହିଛି। ଏହି ନିର୍ମାଣ ପାଇଁ ୯ କୋଟିରୁ ଊର୍ଦ୍ଧ୍ୱ ଅର୍ଥ ବ୍ୟୟ ବରାଦ କରାଯାଇଛି। ରାସ୍ତା ସମ୍ପ୍ରସାରଣ କାର୍ଯ୍ୟ ଚାଲିଥିବାବେଳେ କେତେଜଣ ଠିକାଦାର ଚିଠା ମାଧ୍ୟମରେ ଉକ୍ତ ରାସ୍ତାରେ ଗାର୍ଡ ଓ୍ବାଲ ନିର୍ମାଣ କରୁଛନ୍ତି। ସେହିପରି ବାଲିଭଉଁରୀ-ଶିଖରଘାଟ ରାସ୍ତାରେ ନାଉଗଁା ସାଧୁ ଗୋସ୍ବାମୀ ପୀଠ ସମ୍ମୁଖ ରାସ୍ତାର ଉଭୟ ପାର୍ଶ୍ୱ ଖୋଳାଯାଇ ଗାର୍ଡ ଓ୍ବାଲ ନିର୍ମାଣ କରାଯାଉଛି। ମାତ୍ର ଏ ବିଷୟରେ ବିଭାଗୀୟ ଯନ୍ତ୍ରୀ ଜାଣିନାହାନ୍ତି। ସେହିପରି ଶିଖରଘାଟ ରାସ୍ତାର ବିନିଶିପୁର ନିକଟରେ କିଛି ଦିନ ତଳେ ୧ ଫୁଟ ବଦଳରେ ୩ ଇଞ୍ଚର ଢଳେଇ କାର୍ଯ୍ୟ କରାଯାଇଥିଲା। ଏବିଷୟରେ ବିଭାଗୀୟ ନିର୍ବାହୀ ଯନ୍ତ୍ରୀ ଅଭିଷେକ ସେଠୀ ଜାଣିବା ପରେ କାର୍ଯ୍ୟସ୍ଥଳକୁ ଯାଇ ନିର୍ମାଣ କାର୍ଯ୍ୟ ବନ୍ଦ କରିଥିଲେ। ଏବେ ମାର୍ଚ୍ଚ ମାସ ଚାଲିଥିବାବେଳେ ଅନେକ ଠିକାଦାର ରାଜନେତାଙ୍କ ଚିଠାରେ ମନଇଚ୍ଛା କାର୍ଯ୍ୟ କରୁଥିବା ଚର୍ଚ୍ଚା ହେଉଛି। ମାତ୍ର ଅଧିକାଂଶ କାର୍ଯ୍ୟ ଯନ୍ତ୍ରୀ କିମ୍ବା କାର୍ଯ୍ୟ ନିର୍ବାହୀ ଅଧିକାରୀ ଏହା ଜାଣିନାହାନ୍ତି। ଫଳରେ ଠିକାଦାରମାନେ ବ୍ୟବହାର କରୁଥିବା ସାମଗ୍ରୀ ସିମେଣ୍ଟ ,ବାଲି ,ମେଟାଲ ଭାଗ ମାପ ଠିକ୍ ରଖୁନାହାନ୍ତି। ଢଳେଇ କିମ୍ବା ଓ୍ବାଲ ନିର୍ମାଣ ବେଳେ ବିଭାଗର ଯନ୍ତ୍ରୀ ଉପସ୍ଥିତ ରହି କାର୍ଯ୍ୟକୁ ତଦାରଖ କରିବା କଥା। କିନ୍ତୁ କାର୍ଯ୍ୟ ସମୟରେ ବିଭାଗୀୟ ଅଧିକାରୀ ଉପସ୍ଥିତ ନ ରହିବା ଯୋଗୁ ନିମ୍ନମାନର ହେଉଥିବା ସାଧାରଣରେ ଚର୍ଚ୍ଚା ହେଉଛି। ଏନେଇ କାର୍ଯ୍ୟର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଚିଠା ଦ୍ୱାରା ଠିକାଦାରମାନେ ମନଇଚ୍ଛା କାର୍ଯ୍ୟ କରୁଥିବାରୁ କାର୍ଯ୍ୟର ଅଟକଳ ମୂଲ୍ୟ ସାଧାରଣ ଲୋକ ଜାଣିପାରୁ ନାହାନ୍ତି। ସର୍ବସାଧାରଣଙ୍କ ଅବଗତି ନିମନ୍ତେ କାର୍ଯ୍ୟର ସବିଶେଷ ତଥ୍ୟ ପ୍ରଦାନ କରି ସୂଚନା ଫଳକ ଲଗାଇବାର ନିର୍ଦ୍ଦେଶ ଥିଲେ ମଧ୍ୟ କୌଣସି ଠିକାଦାର ଏହା କରୁନାହାନ୍ତି। କାର୍ଯ୍ୟ ବିଷୟରେ ବିଭାଗ ଯନ୍ତ୍ରୀ ବଳରାମ ସ୍ବାଇଁଙ୍କୁ ପଚାରିବାରେ ସେ ଏବିଷୟରେ କିଛି ଜାଣି ନ ଥିବା କହିଛନ୍ତି। ଏନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
