ବୋଲଗଡ଼,୨୭।୬(ଡି.ଏନ୍.ଏ.): ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ଅନ୍ତର୍ଗତ ବେଲପଦର ଗ୍ରାମର ଯୋଗୀନାଥ ବେହେରା। ବୟସ ୪୦ବର୍ଷ। ପେସାରେ ସେ ଜଣେ ଗୋରୁଚରାଳି ହୋଇଥିଲେ ମଧ୍ୟ ନିଶା ହେଉଛି ବଂଶୀବାଦନ। ଏହି କଳା କାହାଠାରୁ ଶିଖି ନ ଥିବାବେଳେ ତାଙ୍କର ବଂଶୀବାଦନ ସମସ୍ତଙ୍କୁ ବିମୋହିତ କରିଥାଏ। ତାଙ୍କର ଏଭଳି ସୁନ୍ଦର ବଂଶୀବାଦନକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ଖୋର୍ଦ୍ଧା ଜିଲା କଳା, ସଂସ୍କୃତି, ଐତିହ୍ୟ ଓ ପରମ୍ପରାର ଗନ୍ତାଘର ପାଲଟିଥିବା ବେଳେ ଯୋଗୀନାଥଙ୍କ ଏଭଳି ପ୍ରତିଭା ଦେଖି ସମସ୍ତେ ଆଶ୍ଚର୍ଯ୍ୟ ହେଉଛନ୍ତି। ପ୍ରତିଦିନ ନିତ୍ୟକର୍ମ ସାରି ସକାଳେ ଗ୍ରାମର ଗୋରୁଙ୍କୁ ସ୍ଥାନୀୟ ଜଙ୍ଗଲରେ ଚରିବା ପାଇଁ ଛାଡ଼ିଦେଇଥାନ୍ତି। ଏହା ପରେ ସେ ବେଲପଦର ଗ୍ରାମ ନିକଟ ପାହାଡ଼ ତଳ ଘଞ୍ଚ ଜଙ୍ଗଲ ମଧ୍ୟରେ ଅବସ୍ଥିତ ମା’ ଡାକଦେବୀ ପୀଠରେ ପହଞ୍ଚିଯାନ୍ତି। ଏଠାରେ ମା’ଙ୍କୁ ଧ୍ୟାନ କରିବା ସହ ବିଭିନ୍ନ ଭଙ୍ଗୀ ତଥା ସ୍ବରରେ ବଂଶୀବାଦନ କରିଥାନ୍ତି। ତାଙ୍କର ଏହି ବଂଶୀ ସ୍ବର ଶୁଣିବାକୁ ଅନେକ ଶ୍ରୋତା ମଧ୍ୟ ଆସିଥାନ୍ତି। ଏଥିସହ ଶ୍ରୋତାଙ୍କ ଅନୁରୋଧରେ ବିଭିନ୍ନ ସ୍ବରରେ ବଂଶୀ ବଜାଇଥାନ୍ତି। ପ୍ରାୟ ୨୦ବର୍ଷ ହେବ ଏଠାରେ ସେ ବଂଶୀ ବଜାଉଛନ୍ତି। ମା’ ଡାକଦେବୀଙ୍କ କୃପାରୁ ସ୍ବର ଆପେ ଆପେ ଆସିଯାଏ ବୋଲି ଯୋଗୀନାଥ କହିଛନ୍ତି।
