ହାଟଡିହୀ/ଛେନାପଦୀ,୩୦।୭(ଶୁଭକାନ୍ତ ନାୟକ/ନିରାକାର ପରିଡା): ବୈତରଣୀ ନଦୀରେ ଆସିଥିବା ବନ୍ୟା ପାଣି କମିଯାଇଥିଲେ ମଧ୍ୟ କେନ୍ଦୁଝର ଜିଲା ହାଟଡିହୀ ବ୍ଲକର ବନ୍ୟା ପ୍ରଭାବିତ ଅଞ୍ଚଳରେ ଲୋକଙ୍କ ଦୁର୍ଦ୍ଦଶା କମିବାର ନାଁ ନେଉନାହିଁ। ଏବର୍ଷର ବନ୍ୟାରେ ବ୍ଲକର ୪୦ଟି ଗ୍ରାମର ୩୧ ହଜାରରୁ ଉର୍ଦ୍ଧ୍ୱ ଲୋକ ପ୍ରଭାବିତ ହୋଇଥିଲେ। ପ୍ରାୟ ଦୁଇ ଦିନ ଧରି ବିଭିନ୍ନ ଗ୍ରାମ ଜଳବନ୍ଦୀ ହୋଇ ରହିବା ସହ ରାସ୍ତାଘାଟ ଓ ଚାଷ ଜମି ଜଳମଗ୍ନ ହୋଇଯାଇଥିଲା। ବିଶେଷ କରି ଆଇତିପୁର, ସମଣା, ଆମ୍ବୋ ଏବଂ ହାବଳେଶ୍ୱର ପଞ୍ଚାୟତ ସର୍ବାଧିକ କ୍ଷତିଗ୍ରସ୍ତ ହୋଇଛନ୍ତି।
ସର୍ବାଧିକ କ୍ଷତିଗ୍ରସ୍ତ ଆଇତିପୁର ପଞ୍ଚାୟତର ରାଘବପୁର ଗାଁ ସରକାରୀ ଉଚ୍ଚପ୍ରାଥମିକ ବିଦ୍ୟାଳୟରେ ୫ ଫୁଟରୁ ଅଧିକ ଉଚ୍ଚର ବନ୍ୟାଜଳ ପ୍ରବେଶ କରିଥିଲା, ଯାହା ଏବେବି ସମ୍ପୂର୍ଣ୍ଣ ନିଷ୍କାସନ ହୋଇପାରିନାହିଁ। ବିଦ୍ୟାଳୟର ଶୌଚାଳୟ, ରୋଷେଇ ଘର ଏବଂ ଶ୍ରେଣୀଗୁଡ଼ିକରେ ବନ୍ୟାଜଳ ସାଙ୍ଗକୁ ପଟୁମାଟି ଜମି ରହିଛି। ଗୁରୁବାର ସ୍କୁଲ ଖୋଲିଥିଲେ ହେଁ ପାଣି ଓ କାଦୁଅ ଯୋଗୁ ଛାତ୍ରଛାତ୍ରୀ ଆସିପାରି ନ ଥିବାରୁ ପ୍ରଧାନଶିକ୍ଷକ, ପୁରାତନ ଛାତ୍ର ଏବଂ ଅଭିଭାବକମାନେ ମିଶି ସଫାସୁତରା କାର୍ଯ୍ୟରେ ଲାଗିପଡ଼ିଛନ୍ତି। ବିଦ୍ୟାଳୟରେ ପାଠପଢ଼ା ସ୍ୱାଭାବିକ ହେବାକୁ ଆଉ ୨ ରୁ ୩ ଦିନ ଲାଗିବ ବୋଲି ପ୍ରଧାନଶିକ୍ଷକ ବିଷ୍ଣୁ ପ୍ରସାଦ ବୋଇତେଇ ସୂଚନା ଦେଇଛନ୍ତି। ଏହି ସ୍କୁଲଟି ଉଚ୍ଚ ସ୍ଥାନରେ ନ ଥିବାରୁ ପ୍ରତିବର୍ଷ ବନ୍ୟାରେ ପାଣି ପଶୁଥିବାରୁ ଏଠାରେ ଏକ ଦୁଇ ମହଲା ବିଶିଷ୍ଟ ଶ୍ରେଣୀଗୃହ ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି।
ଅସମ୍ପୂର୍ଣ୍ଣ ନଦୀବନ୍ଧ ଯୋଗୁ ରାଘବପୁର ଓ ଆଖପାଖ ଅଞ୍ଚଳରେ ବନ୍ୟାଜଳ ପଶି ବହୁ ଲୋକଙ୍କ ଚାଳଘର ଭାଙ୍ଗିଯାଇଛି। କିଏ ଭଙ୍ଗା କାନ୍ଥ ମରାମତି କରୁଛି ତ ପୁଣି କିଏ ମୁଣ୍ଡ ଗୁଞ୍ଜିବା ପାଇଁ ପଲିଥିନ୍ ଟାଙ୍ଗୁଥିବା ଦେଖିବାକୁ ମିଳିଛି। ଶହ ଶହ ଏକର ଧାନ ଓ ପନିପରିବା ଜମି ଜଳମଗ୍ନ ହୋଇରହିଥିବାରୁ ଚାଷୀମାନେ ଚିନ୍ତାରେ ପଡ଼ିଛନ୍ତି। ପ୍ରଶାସନ ପକ୍ଷରୁ ତୁରନ୍ତ କ୍ଷୟକ୍ଷତି ଆକଳନ କରାଯାଇ ସରକାରୀ ସହାୟତା ଯୋଗାଇଦେବାକୁ ସାଧାରଣରେ ଦାବି ହୋଇଛି।
ଏ ସମ୍ପର୍କରେ ହାଟଡିହୀ ବିଡ଼ିଓ ରଞ୍ଜନ କୁମାର ପରିଡ଼ା କହିଛନ୍ତି ଯେ ବୈତରଣୀ ନଦୀର ଜଳସ୍ତର କମିଯାଇଥିବାରୁ ବର୍ତ୍ତମାନ ଆଉ କୌଣସି ଗ୍ରାମ ପାଣି ଘେରରେ ନାହିଁ। ପାନୀୟ ଜଳ ଯୋଗାଣ ବିଭାଗ ପକ୍ଷରୁ ସମସ୍ତ ବନ୍ୟାଞ୍ଚଳର ନଳକୂପଗୁଡ଼ିକୁ ବିଶୋଧନ କରାଯାଉଛି ଏବଂ ତହସିଲ ପକ୍ଷରୁ ବନ୍ୟା କ୍ଷୟକ୍ଷତି ଆକଳନ ଜାରି ରହିଛି।
