ଢେଙ୍କାନାଳ ଅଫିସ/କାମାକ୍ଷାନଗର (ଡି.ଏନ୍.ଏ.)୩।୩: ଢେଙ୍କାନାଳ ଜିଲା କାମାକ୍ଷାନଗର ପ୍ରାଥମିକ କୃଷି ସେବା ସମବାୟ ସମିତି ପରିସରରେ ଜିଲାର ପ୍ରଥମ ମାଣ୍ଡିଆ ମଣ୍ଡି ଗୁରୁବାରଠାରୁ ଆରମ୍ଭ ହୋଇଛି। ମୁଖ୍ୟ ଅତିଥି ଭାବେ ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଏହାକୁ ଉଦ୍ଘାଟନ କରି କହିଲେ, ଓଡ଼ିଶାର ମିଲେଟ୍ ମିଶନକୁ ଦେଶବିଦେଶରେ ପ୍ରଶଂସା କରାଯାଉଛି। ଲାଭଜନକ ଫସଲ ମାଣ୍ଡିଆ ଚାଷ କୃଷି ଅର୍ଥନୀତିକୁ ସୁଦୃଢ଼ କରିବ। କୃଷି ବିଭାଗ ଅଧିକାରୀମାନେ ଚାଷୀଙ୍କୁ ସଚେତନ କରାଇ ପାଇଲଟ୍ ପ୍ରୋଜେକ୍ଟ ଭାବେ ମାଣ୍ଡିଆ ଚାଷ କରିବା ନିମନ୍ତେ ଉତ୍ସାହିତ କରିବା ଉଚିତ। ରେଙ୍ଗାଳି ଜଳସମ୍ପଦ ବିଭାଗ, ଚାଷୀ ଓ ଜନସାଧାରଣଙ୍କ ସହଯୋଗ ରହିଲେ କାମାକ୍ଷାନଗର ଉପଖଣ୍ଡରେ ଭଲ ମାଣ୍ଡିଆ ଚାଷ ହୋଇପାରିବ ବୋଲି ମନ୍ତ୍ରୀ ଆଶାବ୍ୟକ୍ତ କରିଛନ୍ତି। ସମ୍ମାନିତ ଅତିଥି ଜିଲାପାଳ ସରୋଜ କୁମାର ସେଠୀ କହିଲେ, ଜିଲାର ୮ ବ୍ଲକ ମଧ୍ୟରୁ ୫ଟିରେ ମାଣ୍ଡିଆ ଚାଷ କରାଯାଉଛି। ଭାରତର ପରାମର୍ଶ କ୍ରମେ ୨୦୨୩ ଅନ୍ତର୍ଜାତୀୟ ମିଲେଟ୍ ମିଶନ ଆରମ୍ଭ ହୋଇଛି। ମାଣ୍ଡିଆରେ ଥିବା ରୋଗ ପ୍ରତିରୋଧକ ଶକ୍ତି ସୁସ୍ଥ ରଖିବାରେ ସହାୟକ ହେବ।
ସମ୍ମାନିତ ଅତିଥି ଭାବେ ଉପଜିଲାପାଳ ଜ୍ୟୋତିଶଙ୍କର ସାହୁ, ଜିଲା ମୁଖ୍ୟ କୃଷି ଅଧିକାରୀ ଶରତ ଚନ୍ଦ୍ର ତୋଷ, ବିଡିଓ ବିକାଶ ମହାନ୍ତି, ନଗରପାଳ ଧର୍ମାନନ୍ଦ ପରିଡ଼ା, ବ୍ଲକ ଅଧ୍ୟକ୍ଷ ପ୍ରେମାନନ୍ଦ ସାହୁ, ଡିଆର୍ସିଏସ୍ ସରୋଜିନୀ ଜେନା ପ୍ରମୁଖ ଉପସ୍ଥିତ ଥିଲେ। ମଣ୍ଡିରେ ୫୦୦ କୁଇଣ୍ଟାଲ ମାଣ୍ଡିଆ ସଂଗ୍ରହ କରାଯିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି। ଜିଲାର ୫ ବ୍ଲକରେ କୃଷି, କୃଷକ ସଶକ୍ତୀକରଣ ବିଭାଗ ଆନୁକୂଲ୍ୟରେ ମିଲେଟ୍ ମିଶନ କାର୍ଯ୍ୟ ଆରମ୍ଭ ହୋଇଛି। ଏଣିକି ଧାନ ଭଳି ମାଣ୍ଡିଆକୁ ମଧ୍ୟ ଖରିଫ ଓ ରବି ଋତୁରେ ଅମଳ କରି ଚାଷୀମାନେ ମଣ୍ଡିରେ ବିକ୍ରି କରିପାରିବେ ବୋଲି ସୂଚନା ଦିଆଯାଇଛି। ଏହି ଅବସରରେ ମାଣ୍ଡିଆରୁ ପ୍ରସ୍ତୁତ ଜୁସ୍, କାକରା, ପକୋଡ଼ି, ଇଡ୍ଲି ସମେତ ବିଭିନ୍ନ ଖାଦ୍ୟ ସାମଗ୍ରୀ ପ୍ରଦର୍ଶନ କରାଯାଇଥିଲା।
