ଇସଲାମବାଦ,୮।୨: ‘ମୋଗଲ-ଏ-ଆଜମ’ ଫିଲ୍ମ ୧୯୬୦ଦଶକ ବଲିଉଡର ଐତିହାସିକ ଡ୍ରାମା ଫିଲ୍ମ ଭାବେ ଖ୍ୟାତି ଅର୍ଜନ କରିଛି। ଏହି ଫିଲ୍ମକୁ ଦିଲୀପ କୁମାରଙ୍କ ତାଙ୍କ କ୍ୟାରିଅରର କ୍ଲାସିକ ଫିଲ୍ମ ଭାବେ ପରିଚିତ କରାଯାଏ। କିନ୍ତୁ ଆଶ୍ଚର୍ଯ୍ୟର କଥା ସେ ଏହି ଫିଲ୍ମର ପ୍ରଥମ ପସନ୍ଦ ନ ଥିଲେ। ମୋଗଲ-ଏ-ଆଜମ ସହିତ ଜଡିତ ଏହିପରି ଅନେକ କାହାଣୀ ଅଛି, ଯାହା ସିନେମା ଜଗତରେ ଏକ ନିଆରା ପ୍ରେମ କାହାଣୀ ଭାବେ ପରିଚିତ। କେ.ଆସିଫଙ୍କ ନିର୍ଦ୍ଦେଶନାରେ ନିର୍ମିିତ ଏହି ଫିଲ୍ମଟି ପ୍ରେମୀଯୁଗଳଙ୍କ ମନରେ ବସା ବାନ୍ଧି ରହିଛି।
‘ମୋଗଲ-ଏ-ଆଜମ’ ଏକ ମଲ୍ଟି ଷ୍ଟାରର ଫିଲ୍ମ ଥିଲା। ଏହାକୁ ପ୍ରୀତିରାଜ, ଦିଲୀପ କୁମାର, ମଧୁବାଲା ପରି ଅନେକ ଲୋକପ୍ରିୟ ଷ୍ଟାର ଅଭିନୟ କରିଥିଲେ। କିନ୍ତୁ ଜାଣି ଆଶ୍ଚର୍ଯ୍ୟ ହେବେ ଏହି ଫିଲ୍ମର ଆଇକନିକ ଭୂମିକାରେ ଲୋକପ୍ରିୟ ହୋଇଥିବା ଦିଲୀପ କୁମାର ଓ ମଧୁବାଲା ପ୍ରଥମ ପସନ୍ଦ ନ ଥିଲେ। ଆସିଫ ନର୍ଗିସ, ଚନ୍ଦ୍ର ମୋହନ ଓ ଡି.କେ ସାପ୍ରୁଙ୍କ ସହ ଏହି ଫିଲ୍ମ ନିର୍ମାଣ କରିବାକୁ ଚାହୁଁଥିଲେ। ତେବେ ପରେ ମଧୁବାଲାଙ୍କୁ କାଷ୍ଟ କରାଯାଇଥିଲା।
ଦିଲୀପ କୁମାର ଓ ମଧୁବାଲାଙ୍କ ଅଭିନୀତ ଏହି ଫିଲ୍ମଟି ପାକିସ୍ତାନରେ ମୁକ୍ତିଲାଭ କରିଥିବା ପ୍ରଥମ ରଙ୍ଗୀନ ଫିଲ୍ମ ଅଟେ। ଭାରତ ସହିତ ପାକିସ୍ତାନରେ ମଧ୍ୟ ଏହି ଫିଲ୍ମ ଲୋକଙ୍କୁ ଦିଓ୍ବାନା କରିଥିଲା। IMDBର ରିପୋର୍ଟ ଅନୁଯାୟୀ, ୧୯୬୫ରେ ଭାରତ-ପାକିସ୍ତାନ ତିକ୍ତତା ପରେ ମୋଗଲ-ଏ-ଆଜମ ଉପରେ ପ୍ରତିବନ୍ଧକ ଲଗାଯାଇଥିଲା। କିନ୍ତୁ, ଏହା ପାକିସ୍ତାନରେ ଖୁବ୍ ଲୋକପ୍ରିୟ ହୋଇପାରିଥିଲା।
