ପୁରୀ ଅଫିସ, ୧୦ା୩: ମରୀଚିକୋଟ ଛକ ନିକଟସ୍ଥ ଲକ୍ଷ୍ମୀ ମାର୍କେଟ କମ୍ପ୍ଲେକ୍ସରେ ଅଗ୍ନିକାଣ୍ଡ ଘଟଣା ସାଧାରଣରେ ଅନେକ ପ୍ରଶ୍ନ ସୃଷ୍ଟି କରିଛି। କିପରି ଓ କାହିଁକି ଏହି ଘଟଣା ଘଟିଲା, ଏଥିପାଇଁ ଦାୟୀ କିଏ ଏବଂ କେଉଁ କାରଣରୁ ନିଆଁ ଶୀଘ୍ର ଆୟତ୍ତ ହୋଇପାରିଲା ନାହିଁ ଆଦି ବିଭିନ୍ନ ପ୍ରଶ୍ନ ଲୋକଙ୍କ ମନରେ ଉଙ୍କି ମାରିଛି। ଅଗ୍ନି ନିରାପତ୍ତା ବ୍ୟବସ୍ଥା ପ୍ରତି ପ୍ରଶାସନ ଆଖି ବୁଜିଦେଇଥିବା ଅଭିଯୋଗ ହେଉଥିବାବେଳେ କ୍ଷତିଗ୍ରସ୍ତ ବ୍ୟବସାୟୀମାନେ ପୁଣି ବେଉସା ଆରମ୍ଭ କରିବା ଓ ପରିବାର ପ୍ରତିପୋଷଣ ଲାଗି ସରକାରୀ ସହାୟତାକୁ ଅପେକ୍ଷା କରିଛନ୍ତି।
ଅମ୍ଳଜାନ ସିଲିଣ୍ଡର ଯୋଗାଇ ଦିଆଗଲା
ଅଗ୍ନିଶମ କର୍ମଚାରୀମାନେ ଭିତରକୁ ଯାଇ ନିଆଁକୁ ଆୟତ୍ତ କରିବାରେ ଅସୁବିଧାର ସମ୍ମୁଖୀନ ହୋଇଥିଲେ। ତେଣୁ ଅମ୍ଲଜାନ ସିଲିଣ୍ଡର ନେଇ ଭିତରକୁ ଯାଇଥିଲେ। ବଡ଼ଦାଣ୍ଡରେ କୃତ୍ରିମ ଭାବେ ଅମ୍ଲଜାନ ପ୍ରସ୍ତୁତ କରି ସିଲିଣ୍ଡରରେ ଭର୍ତ୍ତି କରାଯାଉଥିବା ଦେଖିବାକୁ ମିଳିଥିଲା।
ମିଳିଲା କଇଁଛ, ୩ ଗାଡ଼ି
ଅଗ୍ନିଶମ କର୍ମଚାରୀମାନେ ଜୀବନ୍ତ ଅବସ୍ଥାରେ ଏକ କଇଁଛ ଓ ୩ ବାଇକ୍ ଉଦ୍ଧାର କରିଛନ୍ତି। ଆଶ୍ଚର୍ଯ୍ୟର କଥା, ନିଆଁର ପ୍ରବଳ ଉତ୍ତାପ ସତ୍ତ୍ୱେ କଇଁଛଟିର କିଛି କ୍ଷତି ହୋଇ ନ ଥିବା ଦେଖିବାକୁ ମିଳିଛି। କଇଁଛଟି ହୋଟେଲ ଆକ୍ୱାରିୟମରେ ଥିବା ଅନୁମାନ କରାଯାଉଛି। କଇଁଛକୁ ସ୍ଥାନୀୟ ବାସିନ୍ଦାଙ୍କ ଦାୟିତ୍ୱରେ ଦିଆଯାଇଛି। ଜଣେ ବ୍ୟକ୍ତି ତାହାକୁ ନେଇ ନିଜ ଘରେ ପାଳିବେ ବୋଲି କହିଛନ୍ତି। କମ୍ପ୍ଲେକ୍ସ ପୁଣି ଆରମ୍ଭ ହେଲେ ବୁଝାବୁଝି କରି କଇଁଛକୁ ଫେରାଇଦେବେ ବୋଲି କହିଛନ୍ତି।
ପ୍ରଶାସନ ପକ୍ଷରୁ କରାଯାଇଥିଲା ବ୍ୟାରିକେଡ୍
ଯେପରି ଜନସାଧାରଣ ନିଆଁ ପ୍ରଭାବରେ ନ ଆସିବେ ସେଥିପାଇଁ ବଡ଼ଦାଣ୍ଡରେ ବ୍ୟାପକ ପୋଲିସ କର୍ମଚାରୀଙ୍କୁ ନିୟୋଜିତ କରାଯାଇଥିଲା। ଘଟଣାସ୍ଥଳକୁ ଯାନବାହନ ଛଡ଼ାଯାଇ ନ ଥିଲା। ପ୍ରଶାସନ ପକ୍ଷରୁ ବ୍ୟାରିକେଡ କରାଯାଇଥିଲା। ମାର୍କେଟଛକଠାରେ ପ୍ରଥମ ବ୍ୟାରିକେଡ କରାଯାଇ ଶ୍ରୀମନ୍ଦିର ଆଡ଼କୁ ଗାଡ଼ିମୋଟର ଛଡ଼ାଯାଇ ନ ଥିଲା। ସେହିପରି ଦ୍ୱିତୀୟ ବ୍ୟାରିକେଡ ମରୀଚିକୋଟଠାରେ କରାଯାଇଥିଲା। ଅପରପକ୍ଷରେ ଶ୍ରୀମନ୍ଦିର ପଟୁ ମରୀଚିକୋଟ ପଟକୁ ଯେପରି ଗାଡ଼ିମୋଟର ନ ଯିବ ସେଥିପାଇଁ ଶ୍ରୀକୃଷ୍ଣ ସିନେମା ହଲ ଛକଠାରେ ବ୍ୟାରିକେଡ କରାଯିବା ସହ ପୋଲିସ ନିୟୋଜିତ ରହିଥିଲେ। ମହାପ୍ରଭୁଙ୍କ ଦର୍ଶନ ପାଇଁ ଆସୁଥିବା ଭକ୍ତଙ୍କ ପାଇଁ ମରୀଚିକୋଟ ଠାରୁ ଶ୍ରୀକୃଷ୍ଣ ସିନେମା ହଲ ପର୍ଯ୍ୟନ୍ତ ବ୍ୟାରିକେଡ କରାଯାଇଥିଲା। ଉକ୍ତ ବ୍ୟାରିକେଡ ଦେଇ ଭକ୍ତ ଓ ସ୍ଥାନୀୟ ଲୋକେ ଚାଲିକରି ଯିବା ଆସିବା କରିଥିଲେ। ନିଆଁ ପାଖରୁ ଲୋକଙ୍କୁ ହଟାଇବା ପାଇଁ ପୋଲିସକୁ ନାକେଦମ ହେବାକୁ ପଡ଼ିଥିଲା। ପୋଲିସ ବାରମ୍ବାର ଡାକବାଜି ଯନ୍ତ୍ରରେ ଡାକି ଉକ୍ତ ସ୍ଥାନକୁ ଖାଲି କରିବାକୁ କହିଥିଲା। ମଝିରେ ମଝିରେ ଲୋକଙ୍କୁ ଘଉଡ଼ାଇଥିଲା।
ସହଯୋଗ କଲେ ସ୍ବେଚ୍ଛାସେବୀ
ନିଆଁ ଲିଭାଇବା କାର୍ଯ୍ୟରେ ବିଭିନ୍ନ ସଙ୍ଗଠନର କର୍ମକର୍ତ୍ତା ଓ ସ୍ବେଚ୍ଛାସେବୀମାନେ ସାମିଲ ହୋଇଥିଲେ। ସେଣ୍ଟ ଜନ୍ ଆମ୍ବୁଲାନ୍ସ ଏବଂ ଉର୍ଜାବାନ ଓଡ଼ିିଶା ସମେତ ଅନ୍ୟ କେତେକ ଅନୁଷ୍ଠାନ ପକ୍ଷରୁ ନିଆଁ ଲିଭାଇବା କାର୍ଯ୍ୟରେ ନିୟୋଜିତ ଥିବା କର୍ମଚାରୀମାନଙ୍କୁ ପାଣି ଓ ଶୁୁଖିଲା ଖାଦ୍ୟ ଯୋଗାଇ ଦିଆଯାଇଥିଲା।
