ଲଣ୍ଡନ, ୧୦ା୭(ପି.ଟି.):କୋଭିଡ୍-୧୯ ଯୋଗୁ ସାରା ବିଶ୍ୱର ଅର୍ଥନୀତି ଗୁରୁତର ଭାବେ ପ୍ରଭାବିତ ହୋଇଛି। ଏଥିରୁ ମୁକିଳିବା ପାଇଁ ବିଭିନ୍ନ ଦେଶ ଉଦ୍ୟମ ଚଳାଇଥିବାବେଳେ ଭାରତରେ ସ୍ଥିତି ସୁଧୁରୁଥିବାର ସକାରାତ୍ମକ ଚିତ୍ର ଦେଖିବାକୁ ମିଳିଛି। ବିଶ୍ୱ ଅର୍ଥନୀତିକୁ ସୁଧାରିବାରେ ଭାରତ ପ୍ରମୁଖ ଭୂମିକା ଗ୍ରହଣ କରିବ ବୋଲି ବିଶ୍ୱାସ ରହିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର କହିଛନ୍ତି। ବ୍ରିଟେନ ଦ୍ୱାରା ଆୟୋଜିତ ଇଣ୍ଡିଆ ଗ୍ଲୋବାଲ ଓ୍ବିକ୍ର ଉଦ୍ଘାଟନୀ ଅଧିବେଶନକୁ ଭିଡିଓ କନ୍ଫରେନ୍ସ ଜରିଆରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ ଏହା କହିଥିଲେ।
ଅସମ୍ଭବ ବୋଲି ଯାହା ବିଶ୍ୱାସ କରାଯାଉଥାଏ ତାକୁ ହାସଲ କରିବାର ମନୋବଳ ଭାରତୀୟଙ୍କର ରହିଛି। ଏହାର ମୁଖ୍ୟ କାରଣ ହେଉଛି ଭାରତୀୟଙ୍କଠାରେ ପ୍ରତିଭା ରହିଥିବାବେଳେ ସଂସ୍କାର ଏବଂ ନୂତନତା ଆଣିବାର ସାମର୍ଥ୍ୟ ଭାରତର ରହିଛି। ଦେଶର ଅର୍ଥନୀତିରେ ସୁଧାର ଆସୁଥିବା ସ୍ପଷ୍ଟ ପରିଲକ୍ଷିତ ହୋଇଛି। ଭାରତ ବିଶ୍ୱର ସବୁଠୁ ମୁକ୍ତ ଅର୍ଥନୀତି ହୋଇ ରହିଛି। ଏଠାକୁ ଆସି ଶିଳ୍ପ ପ୍ରତିଷ୍ଠା ପାଇଁ ଆମେ ବିଶ୍ୱର ସବୁ କମ୍ପାନୀଙ୍କୁ ସ୍ବାଗତ କରୁଛୁ। ଭାରତ ଯେଉଁ ସୁଯୋଗ ଦେଉଛି, ତାହା ବିଶ୍ୱର କ୍ୱଚିତ୍ ଦେଶ ଦେବେ ବୋଲି ପ୍ରଧାନମନ୍ତ୍ରୀ କହିଥିଲେ। ଭାରତର ବିଭିନ୍ନ ସେକ୍ଟରରେ ଯଥେଷ୍ଟ ସମ୍ଭାବନା ଓ ସୁଯୋଗ ରହିଛି। କୃଷି ସେକ୍ଟରରେ ସରକାର ନେଇଥିବା ସଂସ୍କାରମୂଳକ ପଦକ୍ଷେପ ପୁଞ୍ଜିନିବେଶର ନୂଆ ସୁଯୋଗ ସୃଷ୍ଟି କରିଛି। ଗତ ବ୍ୟବସାୟର ସରଳୀକରଣ, ଜିଏସ୍ଟି ସମେତ ଟିକସ କ୍ଷେତ୍ରରେ ପରିବର୍ତ୍ତନ ଆଦି ୬ ବର୍ଷ ମଧ୍ୟରେ କେନ୍ଦ୍ର ସରକାର ନେଇଥିବା ବିଭିନ୍ନ ସଂସ୍କାର ସମ୍ପର୍କରେ ପ୍ରଧାନମନ୍ତ୍ରୀ କହିଥିଲେ। ଏମ୍ଏସ୍ଏମ୍ଇ ସେକ୍ଟର ଅଭିବୃଦ୍ଧି ପାଇଁ ସରକାର ନିକଟରେ କେତେକ ସଂସ୍କାର ପ୍ରକ୍ରିୟା ଆପଣାଇଛନ୍ତି। ସେହିପରି ପ୍ରତିରକ୍ଷା ଓ ମହାକାଶ ସେକ୍ଟରରେ ପୁଞ୍ଜିନିବେଶର ସୁଯୋଗ ସୃଷ୍ଟି କରାଯାଇଥିବା ମୋଦି କହିଥିଲେ। କରୋନା ମହାମାରୀ ବେଳେ ଭାରତର ଔଷଧ ଶିଳ୍ପ ସାରା ବିଶ୍ୱକୁ ଔଷଧ ଯୋଗାଇଛି ଓ ବିକାଶଶୀଳ ଦେଶରେ ଔଷଧ ଦାମ୍ କମାଇବାରେ ପ୍ରମୁଖ ଭୂମିକା ନେଇଥିବା ପ୍ରଧାନମନ୍ତ୍ରୀ କହିଥିଲେ।
