ରାଉରକେଲା ଅଫିସ,୧୯।୧୨:ଷ୍ଟିଲସିଟି ରାଉରକେଲାରେ ପ୍ରଥମ ଥର ପାଇଁ ହେବାକୁ ଯାଉଛି ପୁରୁଷ ହକି ବିଶ୍ୱକପ୍। ଏହି ବିଶ୍ୱକପ୍ ରାଉରକେଲା ଛେଣ୍ଡ କଲୋନି ବିପିୟୁଟି ପରିସରରେ ନିର୍ମାଣାଧୀନ ବିର୍ସାମୁଣ୍ଡା ହକି ଷ୍ଟାଡିୟମରେ ଖେଳାଯିବ। ହକି ବିଶ୍ୱକପ୍କୁ ଆଉ ମାତ୍ର ୨୬ ଦିନ ବାକି ରହିଥିବାବେଳେ ସହରରେ ଚାଲିଛି ବହୁ ଉନ୍ନତିମୂଳକ କାର୍ଯ୍ୟ। ସେଥିମଧ୍ୟରୁ ସହରର ପ୍ରବେଶ ପଥ କୁହାଯାଉଥିବା ପାନପୋଷ ହକି ଛକର ରୂପରେଖ ସମ୍ପୂର୍ଣ୍ଣ ବଦଳିଯାଇଛି। ହକି ବିଶ୍ୱକପ ସମୟରେ ସହରକୁ ଏହି ବାଟ ଦେଇ ବହୁ ସଂଖ୍ୟାରେ ଦର୍ଶକ ଓ ହକି କ୍ରୀଡ଼ାପ୍ରେମୀ ପ୍ରବେଶ କରିବେ। ତେଣୁ ସ୍ଥାନୀୟ ପ୍ରଶାସନ ପାନପୋଷ ହକି ଛକର ଉନ୍ନତୀକରଣ ସାଙ୍ଗକୁ ଛକର ମୁଖ୍ୟ ରାସ୍ତା ମାର୍ଗରେ ହକି ତାରକାଙ୍କ ଷ୍ଟାଚ୍ୟୁ ସହ ବିଶ୍ୱକପ୍ର ଝଲକ ନିର୍ମାଣ କରିଛି। ଛକଟି ଏନ୍ଏଚ-୧୪୩ ଉପରେ ଥିବାବେଳେ ବିଶ୍ୱକପ୍ରେ ହକି କ୍ରୀଡ଼ାପ୍ରେମୀଙ୍କୁ ସ୍ବାଗତ କରିବା ପାଇଁ ରଙ୍ଗବେରଙ୍ଗ ଆଲୋକୀକରଣ ବ୍ୟବସ୍ଥା କରାଯାଇଛି। ଏଠାରେ ପୂର୍ବରୁ ଏକ ପଥର ଉପରେ ଜିଲାର ବିଭିନ୍ନ ହକି ତାରକାଙ୍କ ନାମାଙ୍କନ କରାଯାଇଥିଲା। ଛକଟି ବହୁଦିନ ଧରି ଅବହେଳିତ ହୋଇ ପଡିରହିଥିବା ବେଳେ ବିଶ୍ୱକପ୍ ପୂର୍ବରୁ ସ୍ଥାନୀୟ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଏହାର ଉନ୍ନତୀକରଣ ପାଇଁ ୩ ମାସ ପୂର୍ବରୁ କାର୍ଯ୍ୟ ଆରମ୍ଭ କରିଥିଲା। ବର୍ତ୍ତମାନ ମୁଖ୍ୟ ରାସ୍ତାରେ ଏକ ବଗିଚା କରାଯାଇ ସେଥିରେ ହକି ଖେଳାଳିଙ୍କ ଷ୍ଟାଚ୍ୟୁ କରାଯାଇଛି। ଛକର ଅନ୍ୟପଟେ ବିଜୁ ପଟ୍ଟନାୟକ ଇଣ୍ଡୋର ଷ୍ଟାଡିୟମର ଆଲୋକୀକରଣ ବ୍ୟବସ୍ଥା ଆକର୍ଷିତ କରୁଛି। ହକି ବିଶ୍ୱକପ୍ ପାଇଁ ସହରକୁ ଆସୁଥିବା ସମସ୍ତ କ୍ରୀଡାପ୍ରେମୀଙ୍କୁ ଷ୍ଟାଚ୍ୟୁ ମାଧ୍ୟମରେ ଏକ ହାତରେ ହକି ଷ୍ଟିକ ସହ ଅନ୍ୟ ହାତରେ ସ୍ବାଗତ କରାଯାଇଛି। ଏଥିସହ ସହରର ପ୍ରମୁଖ ଛକମାନଙ୍କରେ ଏଲ୍ଇଡି ଟିଭି ବ୍ୟବସ୍ଥା ହୋଇଥିବା ଜଣାପଡିଛି।
