ଢେଙ୍କାନାଳ ଅଫିସ, ୩୦।୯: ଢେଙ୍କାନାଳ ଜିଲା ସଦର ରେଞ୍ଜ୍ ଓଡ଼ାପଡ଼ା ବ୍ଲକର ହଳଦିଆବାହାଳ ପାଲଟିଛି ହାତୀଙ୍କ ଚରାଭୂଇଁ। ଅଞ୍ଚଳ ଦେଇ ଯାଇଥିବା ୫୫ନଂ. ଜାତୀୟ ରାଜପଥକୁ ଦୈନିକ ଦୁଇଥର ହାତୀ ପାର୍ ହେଉଛନ୍ତି। ହାତୀଙ୍କ ସମାଗମ ଦେଖିବାକୁ ପଥଚାରୀ ଭିଡ଼ ଲଗାଉଥିବାବେଳେ ସେମାନଙ୍କୁ ଘଉଡ଼ାଇବାକୁ ଯାଇ ନୟାନ୍ତ ହେଉଛନ୍ତି ବନ କର୍ମଚାରୀ। ଅନ୍ୟପଟେ ପାଖାପାଖି ୩୦ ହାତୀ ବର୍ଷତମାମ ଫସଲ ନଷ୍ଟ କରୁଥିବାରୁ ଚାଷୀମାନେ ଚିନ୍ତାରେ ପଡ଼ିଛନ୍ତି। ବନ ବିଭାଗ ପକ୍ଷରୁ ହାତୀ ଉପଦ୍ରବର ସ୍ଥାୟୀ ପ୍ରତିକାର କରାଯାଉ ନ ଥିବାରୁ ଧନଜୀବନ ହାନି ହେଉଥିବା ବେଳେ ଅଞ୍ଚଳବାସୀ ଭୟ ଆତଙ୍କରେ ଦିନ କାଟୁଛନ୍ତି।
ହଳଦିଆବାହାଳ ନିକଟ ଜଙ୍ଗଲରେ ଦୀର୍ଘଦିନ ହେଲା ଡେରା ପକାଇଛନ୍ତି ୨୯ ହାତୀ। ଏହି ହାତୀପଲ ସକାଳେ ଏବଂ ସନ୍ଧ୍ୟାରେ ନିୟମିତ ୫୫ନଂ. ଜାତୀୟ ରାଜପଥ ପାର ହେଉଛନ୍ତି। ଜଙ୍ଗଲରୁ ହାତୀମାନେ ଧାଡ଼ିବାନ୍ଧି ରାସ୍ତା ପାର ହୋଇ ଖାଦ୍ୟ ଅନ୍ବେଷଣରେ ବ୍ରାହ୍ମଣୀ ନଦୀ କୂଳରେ ଘୂରି ବୁଲୁଛନ୍ତି। ଅନେକ ସମୟରେ ନଦୀ ପାର୍ ହୋଇ ପରଜଙ୍ଗ ବ୍ଲକ ମହାବିରୋଡ ରେଞ୍ଜ୍କୁ ଯାଇ ପୁଣି ଅପରାହ୍ନରେ ପ୍ରାକୃତିକ ଆବାସସ୍ଥଳୀକୁ ଫେରି ଆସୁଛନ୍ତି। ଜାତୀୟ ରାଜପଥରେ ଅଣ୍ଡରପାସ୍ ନ ଥିବାରୁ ହାତୀମାନେ ରାସ୍ତାକୁ ଚଲାପଥ ଭାବେ ବ୍ୟବହାର କରୁଥିବା ପରିବେଶବିତ୍ମାନେ ଅଭିଯୋଗ କରିଛନ୍ତି। ଅନ୍ୟପଟେ ହାତୀଙ୍କ କୌତୁକିଆ ଗତିବିଧି ଦେଖିବାକୁ ପଥଚାରୀ, ଗାଡ଼ିଚାଳକ ଭିଡ଼ ଜମାଉଛନ୍ତି। କୌଣସି ସମୟରେ ଅଘଟଣ ଘଟିବା ଆଶଙ୍କା ଥିବାରୁ ବନ କର୍ମଚାରୀ ହାତୀ ଗତିବିଧି କରୁଥିବା ଅଞ୍ଚଳରେ ଜଗି ରହୁଛନ୍ତି।
ହଳଦିଆବାହାଳ ନିକଟସ୍ଥ ନିମିଧା ସମେତ ନିକଟବର୍ତ୍ତୀ ଜଙ୍ଗଲ ହାତୀପଲ ପାଇଁ ସୁରକ୍ଷିତ ଆବାସସ୍ଥଳୀ ପାଲଟିଛି। ସେଠାରୁ ହାତୀପଲ ବିଭିନ୍ନ ଭାଗରେ ବିଭକ୍ତ ହୋଇ ପରଜଙ୍ଗ, ହିନ୍ଦୋଳ ରେଞ୍ଜକୁ ଯାଉଛନ୍ତି। ହାତୀ ମୁହଁରୁ ଫସଲ ସୁରକ୍ଷା ଲାଗି ବନ ବିଭାଗ ପକ୍ଷରୁ ସ୍ଥାୟୀ ପ୍ରତିକାର କରାଯାଉନାହିଁ। ଫଳରେ ହାତୀ ଉପଦ୍ରବରେ ବ୍ୟାପକ ଫସଲ ହାନି ହେଉଛି। ସନ୍ଧ୍ୟାହେଲେ ଗ୍ରାମରେ ଭୟର ବାତାବରଣ ସୃଷ୍ଟି ହୋଉଛି। ହାତୀ-ମଣିଷ ସଂଘର୍ଷ ବଢୁଥିବାରୁ ଆଇନଶୃଙ୍ଖଳା ପରିସ୍ଥିତି ମଧ୍ୟ ସୃଷ୍ଟି ହେଉଛି।
ଘଞ୍ଚ ଜଙ୍ଗଲକୁ ସୁରକ୍ଷିତ ମଣୁଛନ୍ତି
ରୁଙ୍ଗ୍ଟା କମ୍ପାନୀ ନିକଟରେ ଥିବା ଘଞ୍ଚ ଜଙ୍ଗଲକୁ ହାତୀପଲ ସୁରକ୍ଷିତ ମଣୁଛନ୍ତି। ତେଣୁ ସେଠାରେ ବର୍ଷତମାମ ରହୁଛନ୍ତି। ବ୍ରାହ୍ମଣୀ ନଦୀ ପଠା ଏବଂ ମହାବିରୋଡ ରେଞ୍ଜ୍ରେ ପର୍ଯ୍ୟାପ୍ତ ଖାଦ୍ୟ ଉପଲବ୍ଧ ଥିବାରୁ ସେମାନେ ନିୟମିତ ଉକ୍ତ ଅଞ୍ଚଳକୁ ଯାଉଛନ୍ତି। ଖାଦ୍ୟ ଖାଇ ସାରିବା ପରେ ନଦୀରୁ ପାଣିପିଇ ରାଜପଥ ପାରହୋଇ ଜଙ୍ଗଲକୁ ଫେରୁଛନ୍ତି ା
-ଅରବିନ୍ଦ ମାଝି, ବନ୍ୟପ୍ରାଣୀ ସଙ୍ଗଠନ କର୍ମକର୍ତ୍ତା
ଅଣ୍ଡରପାସ୍ ନିର୍ମାଣ ଜରୁରୀ
୫୫ନଂ. ଜାତୀୟ ରାଜପଥରେ ଦୈନିକ ହାତୀପଲ ପାର ହେଉଛନ୍ତି। ଏହାଦ୍ୱାରା ଉଭୟ ହାତୀ ଏବଂ ମଣିଷ ଜୀବନକୁ ଭୟ ରହିଛି। ହାତୀ ଚଲାପଥ ଭାବେ ଚିହ୍ନଟ ହୋଇଥିବା ଉକ୍ତ ସ୍ଥାନରେ ଏକ ଅଣ୍ଡରପାସ୍ ନିର୍ମାଣ ଜରୁରୀ ହୋଇପଡ଼ିଛି। ଏ ଦିଗରେ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ ଏବଂ ବନ ବିଭାଗ ସ୍ବତନ୍ତ୍ର ଦୃଷ୍ଟି ଦେବା ଉଚିତ।
-ପ୍ରଦ୍ୟୁମ୍ନ ରଥ, ପରିବେଶବିତ୍
ନଦୀକୂଳିଆ ଘାସ ହାତୀଙ୍କ ପସନ୍ଦ
ହାତୀପଲ ଗୋଟିଏ ସ୍ଥାନରେ ଅଧିକ ସମୟ ରୁହନ୍ତି ନାହିଁ। ହଳଦିଆବାହାଳ ଜଙ୍ଗଲରେ ରହୁଥିବା ହାତୀମାନେ ମଠରଗଡ଼ି, ନିମିଧା ଜଙ୍ଗଲକୁ ଆସୁଛନ୍ତି। ବ୍ରାହ୍ମଣୀ ନଦୀ ପଠାରେ ହୋଇଥିବା ମନପସନ୍ଦର ଘାସକୁ ଖାଦ୍ୟ ଭାବେ ଗ୍ରହଣ କରୁଛନ୍ତି। ବନ କର୍ମଚାରୀ, ହାତୀ ସ୍କ୍ବାଡ୍ କର୍ମଚାରୀ ହାତୀଙ୍କ ଗତିବିଧି ଉପରେ ନଜର ରଖୁଛନ୍ତି।
-ଡ. ପ୍ରକାଶଚାନ୍ଦ ଗୋଗିନେନି, ଡିଏଫ୍ଓ, ଢେଙ୍କାନାଳ
