ରାତି ଅଧରେ ଘରେ ପଶିଗଲା ହାତୀ
8:43 amApril 7, 2021April 7, 2021

ପରଜଙ୍ଗ, ୭।୪(ଡି.ଏନ.ଏ.): ଗୋଟିଏ କୋଠରିରେ ହାତୀ। ଆଉ ଗୋଟିଏ ପ୍ରକୋଷ୍ଠରେ ୫ ପ୍ରାଣୀ। ଘର ଭିତରେ ୩୦ ମିନିଟ୍‌ ଧରି ହିଂସ୍ରହାତୀର ତାଣ୍ଡବ। ଭୟ ଆତଙ୍କର ପରିବେଶ। ତେବେ ଉପସ୍ଥିତ ବୁଦ୍ଧି ଖଟାଇ ହାତୀ କବଳରୁ ବର୍ତ୍ତିଯାଇଛନ୍ତି ପରିବାର ସଦସ୍ୟ। ସୋମବାର ବିଳମ୍ବିତ ରାତିରେ ଏଭଳି ଏକ ଛାତିଥରା ଘଟଣା ଘଟିଛି ଢେଙ୍କାନାଳ ବନଖଣ୍ଡ ମହାବିରୋଡ଼ ରେଞ୍ଜ ବଡ଼କମର ଗ୍ରାମରେ, ଯାହା ଏବେ ଚର୍ଚ୍ଚାର ବିଷୟ ପାଲଟିଛି। ହାତୀ ମୁହଁରୁ ବର୍ତ୍ତିଯାଇଥିବା ବଡ଼କମର ଗ୍ରାମର ପ୍ରଦୀପ କୁମାର ଆଇଚ୍‌ଙ୍କ କହିବା କଥା, ସବୁଦିନ ପରି ସୋମବାର ରାତିରେ ପରିବାର ସଦସ୍ୟ ଭିନ୍ନ ଭିନ୍ନ ପ୍ରକୋଷ୍ଠରେ ଶୋଇଥିଲେ। ବିଳମ୍ବିତ ରାତିରେ ଏକ ମାଈ ହାତୀ ମୁଖ୍ୟ କବାଟ ଭାଙ୍ଗି ଭିତରକୁ ପଶିଥିଲା। ଏ ସମ୍ପର୍କରେ ଜାଣି ପାରି ଅନ୍ୟ ପ୍ରକୋଷ୍ଠରେ ଶୋଇଥିବା ପରିବାର ସଦସ୍ୟ ପ୍ରାଣ ବିକଳରେ ଗୋଟିଏ କୋଠରିକୁ ଆସି ଭିତରପଟୁ କବାଟ କିଳି ଦେଇଥିଲେ। ପ୍ରାୟ ଅଧଘଣ୍ଟା ଧରି ହିଂସ୍ର ହାତୀଟି ଘରର ଆସବାବପତ୍ର ଭଙ୍ଗାରୁଜା କରିଥିଲା। ଏଥିରେ ଡାଇନିଂ ହଲ୍‌ରେ ଥିବା ମୂଲ୍ୟବାନ ଆସବାବପତ୍ର ସମେତ ଅନେକ ଜରୁରୀ ସାମଗ୍ରୀ ନଷ୍ଟ ହୋଇଯାଇଛି। ହାତୀ ଏକ ଚାଉଳ ବସ୍ତା ଶୁଣ୍ଢରେ ବୋହିନେଇ ଜଙ୍ଗଲ ଆଡ଼କୁ ପଳାଇଥିଲା। ହାତୀ ଯିବା ପରେ ଭୟଭୀତ ପରିବାର ଲୋକେ ପଦାକୁ ଆସି ବନ ବିଭାଗକୁ ସୂଚନା ଦେଇଥିଲେ। ତେବେ ମଙ୍ଗଳବାର ରାତି ୭ଟା ସୁଦ୍ଧା କୌଣସି କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ନ ଥିବା ପ୍ରଦୀପ କହିଛନ୍ତି। ଅଭିଯୋଗ ସମ୍ପର୍କରେ ଡିହଡୋଳ ଫରେଷ୍ଟର ସୁରେନ୍ଦ୍ର କୁମାର ନାୟକ କୁହନ୍ତି, ସେ ଏକ ଜରୁରୀ କାର୍ଯ୍ୟରେ ଯୋଗଦେବାକୁ ବାହାରକୁ ଆସିଛନ୍ତି। ତୁରନ୍ତ ଘଟଣାର ତଦନ୍ତ କରି ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଛନ୍ତି।