ଡେରାବିଶ,୧୫ା୩(ସ୍ବ.ପ୍ର.):ପ୍ରସିଦ୍ଧ ଓଳକଣା ମେଳଣ ଗୁରୁବାର ଅନୁଷ୍ଠିତ ହେବ। ହେଲେ ଏ ବର୍ଷ ବିମାନ ଶୋଭାଯାତ୍ରାରେ ଡିଜେ ବାଜିବ ନାହିଁ। ଲକ୍ଷାଧିକ ଜନସମାଗମ ହେବା ସମ୍ଭାବନାକୁ ଦୃଷ୍ଟିରେ ରଖି ରବିବାର ସନ୍ଧ୍ୟାରେ ପ୍ରଶାସନିକ ପ୍ରସ୍ତୁତି ବୈଠକ ମେଳଣ ପଡ଼ିଆରେ ହୋଇଯାଇଛି। ମେଳଣ ପଡ଼ିଆଟି ଉଭୟ କେନ୍ଦ୍ରାପଡ଼ା ଓ କଟକ ଜିଲାର କେନ୍ଦ୍ରସ୍ଥଳରେ ଅବସ୍ଥିତ ହୋଇଥିବାରୁ ଉଭୟ ଜିଲା ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି। ବୈଠକରେ ଓଳାଶୁଣି ଗୁମ୍ଫା ମହନ୍ତ ଡ. ନାମାନନ୍ଦ ଦାସ ଅଧ୍ୟକ୍ଷତା କରିଥିଲେ। ଏଥିରେ ମାହାଙ୍ଗା ତହସିଲଦାର ଉମାକାନ୍ତ ବିଶ୍ୱାଳ, ମାହାଙ୍ଗ ଥାନା ଅଧିକାରୀ ନିହାର ରଞ୍ଜନ ମହାନ୍ତି, ଡେରାବିଶ ଥାନା ଅଧିକାରୀ ଜ୍ୟୋତି ପ୍ରକାଶ ସ୍ବାଇଁ, ଠାକୁରବାଡ଼ି ସେବକ ପ୍ରତିନିଧି ମକର ଚନ୍ଦ୍ର ପ୍ରଧାନ, ବିଜୟ କୁମାର ମଲ୍ଲିକ, ଅଧିକାରୀ ସୁଧାକର ଦାସ, ପ୍ରବୋଧ ପ୍ରଧାନ, ରତିକାନ୍ତ ସାମଲ, କ୍ଷୀରୋଦ ଚନ୍ଦ୍ର ବିହାରୀ, ରମାକାନ୍ତ ଦାସ, ଦୁର୍ଯ୍ୟୋଧନ ମଲ୍ଲିକ, ରାଜେନ୍ଦ୍ର କୁମାର ସାହୁ, ବଟକୃଷ୍ଣ ସାମଲଙ୍କ ସମେତ ବହୁ ଠାକୁରବାଡ଼ି ସେବକ ପ୍ରତିନିଧି ପ୍ରମୁଖ ଉପସ୍ଥିତ ରହିଥିଲେ। ମେଳଣକୁ ଆସୁଥିବା ବିମାନ ସମ୍ମୁଖ ଶୋଭାଯାତ୍ରାରେ ଉଚ୍ଚ ଶକ୍ତି ସମ୍ପନ୍ନ ଡାକବାଜି (ଡିଜେ) ବ୍ୟବହାରକୁ ବନ୍ଦ ରଖିବାକୁ ପ୍ରଶାସନିକ ଅଧିକାରୀମାନେ ପରାମର୍ଶ ଦେଇଥିଲେ। ବିମାନ ସମ୍ମୁଖରେ ପାରମ୍ପରିକ ବାଦ୍ୟ ସହ ଘଣ୍ଟ, ସଂକୀର୍ତ୍ତନ, ଶୋଭାଯାତ୍ରାରେ ରହିପାରିବ। ନିର୍ଦ୍ଧାରିତ ସମୟରେ ସମସ୍ତ ବିମାନ କିପରି ମେଳଣ ପଡ଼ିଆରେ ପହଞ୍ଚତ୍ବେ ସେଥିପାଇଁ ଉପସ୍ଥିତ ଠାକୁରବାଡ଼ି ସେବକ ପ୍ରତିନିଧି ପ୍ରସ୍ତାବମାନ ରଖିଥିଲେ।
ଓଳକଣା ମେଳଣ ପଡ଼ିଆ ଆଳି ରାଜାଙ୍କ ଦୁଇଟି ବିମାନ ଯଥା, ଗୋଟିଏ ରାଜନଗରରୁ ଅନ୍ୟଟି ଡେରାବିଶ ଆରାଧ୍ୟ ଶ୍ରୀଦଧିବାମନଜୀଉଙ୍କ ମନ୍ଦିରରୁ ଆସିଥାଏ। ଯେଉଁଥିରେ ମା’ ଲକ୍ଷ୍ମୀଙ୍କ ବିଜେ ପ୍ରତିମା ଥାଆନ୍ତି। ମାଟି ନିର୍ମିତ କନକ ବେଦିରେ ଉଭୟ ବିମାନ ଉପବେଶନ କରିଥାନ୍ତି। ମେଳଣ ପଡ଼ିଆକୁ ପ୍ରବେଶ ପାଇଁ ୪ଟି ଦ୍ୱାର ରହିଛି। ପ୍ରଥମେ ଆଳି ରାଜାଙ୍କ ବିମାନ ପଡ଼ିଆ ମଧ୍ୟକୁ ପ୍ରବେଶ କରିବା ପରେ ଅନ୍ୟ ୩ ଦ୍ୱାର ଦେଇ କ୍ରମାନ୍ବୟରେ ବିମାନଗୁଡ଼ିକ ପଡ଼ିଆ ମଧ୍ୟକୁ ପ୍ରବେଶ କରିଥାନ୍ତି। ଶେଷରେ ମାହାଙ୍ଗା ବ୍ଲକରୁ ଭଦ୍ରେଶ୍ୱରଙ୍କ ବିମାନରେ ଶିବଶକ୍ତି ପଡ଼ିଆ ମଧ୍ୟରେ ପହଞ୍ଚତ୍ଥାନ୍ତି। ୧୦୮ ଘଣ୍ଟ ପଟୁଆର ମଧ୍ୟରେ ପଡ଼ିଆ ନିକଟସ୍ଥ ଅରାଖଣ୍ଡଠାରେ ଥିବା ଭକ୍ତ ବିଦୂରଙ୍କ ମନ୍ଦିରକୁ ଆଳତି ଯାଇଥାଏ। ଏଠାକାର ମେଳଣରେ ଭୋଗ ପରମ୍ପରା ସମ୍ପୂର୍ଣ୍ଣ ନିଆରା। ମେଳଣ ପଡ଼ିଆକୁ ଆସୁଥିବା ସମସ୍ତ ବିମାନ ସମ୍ମୁଖରେ ପଡ଼ିଥିବା ଚାଦରରେ ମାନସିକଧାରୀ ଶ୍ରଦ୍ଧାଳୁ ଭୋଗ ଲଗାଇ ଥାଆନ୍ତି। କୌଣସି ବିମାନକୁ ବିଦାକି ଦେବାର ବ୍ୟବସ୍ଥା ନାହିଁ। ହେଲେ ଆସନ୍ତାବର୍ଷ ମେଳଣ ପାଇଁ ଆଳି ରାଜାଙ୍କ ବିମାନ ପକ୍ଷରୁ ପ୍ରତ୍ୟେକ ବିମାନକୁ ଫୁଲ ଓ ଅବିର ଦିଆଯାଇ ବରଣି କରାଯାଇଥାଏ।
