ଭୁବନେଶ୍ୱର,୧୧ା୨(ବ୍ୟୁରୋ): ଆସନ୍ତା ୨୦୨୨-୨୩ ଆର୍ଥିକ ବର୍ଷ ପାଇଁ ଅର୍ଥ ବିଭାଗ ପକ୍ଷରୁ ବଜେଟ ପ୍ରସ୍ତୁତି ଆରମ୍ଭ ହୋଇଛି। ଏହା ପୂର୍ବରୁ ସମସ୍ତ ବିଭାଗ ଚଳିତ ଆର୍ଥିକ ବର୍ଷର ନିର୍ଦ୍ଧାରିତ ସମୟ ମଧ୍ୟରେ ନିଜ ନିଜର ବଜେଟ ଅର୍ଥ ଖର୍ଚ୍ଚ କରିବା ସହ ଅବ୍ୟବହୃତ ପାଣ୍ଠି ଫେରାଇବାକୁ ଅର୍ଥ ବିଭାଗ ପକ୍ଷରୁ ସମୟସୀମା ଧାର୍ଯ୍ୟ କରାଯାଇଥିଲା। ପାଣ୍ଠି ବିନିଯୋଗ ପାଇଁ ୨୦୨୨ ଜାନୁୟାରୀ ୧୫ ଧାର୍ଯ୍ୟ କରାଯାଇଥିବା ବେଳେ ବଳକା ପାଣ୍ଠି ଟ୍ରେଜେରିକୁ ଫେରାଇବା ପାଇଁ ଫେବୃୟାରୀ ୨୮ ଧାର୍ଯ୍ୟ କରାଯାଇଥିଲା। ଏ ନେଇ ବିଭାଗ ପକ୍ଷରୁ ସର୍କୁଲାର ଜାରି କରାଯାଇଥିଲା। ସେହିପରି ବଳକା ଅର୍ଥ ଫେରାଇବାକୁ ଜାନୁୟାରୀ ୩୧ ନିର୍ଘଣ୍ଟ କରାଯାଇଥିଲା। ତେବେ ଧାର୍ଯ୍ୟ ସମୟ ଶେଷ ହୋଇ ଆସୁଥିବାରୁ ବିଭାଗଗୁଡ଼ିକ ପାଣ୍ଠି ବିନିଯୋଗ ଏବଂ ଫେରସ୍ତ ନେଇ ସମସ୍ୟାରେ ପଡ଼ିଥିଲେ। ଏପରି କି ଚଳିତ ଆର୍ଥିକ ବର୍ଷର ଶେଷ ୩ ମାସରେ ସମସ୍ତ ବଜେଟ ଅର୍ଥ ଖର୍ଚ୍ଚ କରିବା ନେଇ ବିଭାଗଗୁଡ଼ିକ ସମସ୍ତ ବଳ ଖଟାଇଛନ୍ତି । ଏଥିଯୋଗୁ ଟ୍ରେଜେରିରେ ସମସ୍ୟା ସୃଷ୍ଟି ହେଉଛି। ଏହାକୁ ଦୃଷ୍ଟିରେ ରଖି ଅର୍ଥ ବିଭାଗ ପାଣ୍ଠି ବିନିଯୋଗ ଓ ଫେରସ୍ତ ପାଇଁ ଏକ ସଂଶୋଧିତ ଗାଇଡ୍ଲାଇନ ଜାରି କରିଛି। ବିଭାଗଗୁଡ଼ିକ ଜାନୁୟାରୀ ୧୫ ପରିବର୍ତ୍ତେ ବିଭିନ୍ନ ଯୋଜନା ପାଇଁ ଫେବୃୟାରୀ ୨୮ ଯାଏ କାର୍ଯ୍ୟାଦେଶ ଦେଇପାରିବେ। ସେହିପରି ବଳକା ଅର୍ଥ ଫେରାଇବା ପାଇଁ ବିଭାଗଗୁଡିକୁ ଜାନୁୟାରୀ ୩୧ ପରିବର୍ତ୍ତେ ଫେବୃୟାରୀ ୧୮ ଯାଏ ସମୟ ଦିଆଯାଇଛି। ଏଥିସହିତ ବିଭିନ୍ନ ଜରୁରିକାଳୀନ ପାଣ୍ଠି, ଯନ୍ତ୍ରପାତି କ୍ରୟ, ସବ୍ସିଡି ଏବଂ ଋଣ ଆଦି ପାଇଁ ବିଲ୍ ଦାଖଲ ସମୟ ମାର୍ଚ୍ଚ ୯ ଯାଏ ଧାର୍ଯ୍ୟ କରାଯାଇଛି। ତେବେ ବଜେଟ ଅର୍ଥ କୌଣସି ପ୍ରକାର ସିଭିଲ ଡିପୋଜିଟ ପାଇଁ ଉପଯୋଗ କରାଯାଇ ପାରିବ ନାହିଁ ବୋଲି ଅର୍ଥ ବିଭାଗ ସ୍ପଷ୍ଟ କରିଛି। ଯଦି କୌଣସି ଡିଡିଓ କିମ୍ବା କଣ୍ଟ୍ରୋଲିଂ ଅଫିସର ବିନା ଅନୁମୋଦନରେ ବେଆଇନ ଭାବେ ଅର୍ଥ ପ୍ରଦାନ କରିବେ ସେଥିପାଇଁ ସେମାନେ ଉତ୍ତରଦାୟୀ ରହିବେ। ଏପରି କି ବେଆଇନ କାରବାର ପାଇଁ ଟ୍ରେଜେରି ଓ ସବ୍ଟ୍ରେଜେରି ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅର୍ଥ ବିଭାଗ ପକ୍ଷରୁ କଡ଼ା ଚେତାବନୀ ଦିଆଯାଇଛି। ମାର୍ଚ୍ଚ ୩୧ରେ ଇଣ୍ଟିଗ୍ରେଟେଡ ଫାଇନାନ୍ସ ମ୍ୟାନେଜମେଣ୍ଟ ସିଷ୍ଟମ୍(ଆଇଏଫ୍ଏମ୍ଏସ୍) ସ୍ବତଃସ୍ଫୂର୍ତ୍ତ ଭାବେ ବନ୍ଦ ହୋଇଯିବ। ତେବେ କେନ୍ଦ୍ର ପ୍ରବର୍ତ୍ତିତ କିମ୍ବା କେନ୍ଦ୍ରୀୟ ଯୋଜନାରେ ଯୋଗାଇ ଦିଆଯାଇଥିବା ଅର୍ଥ ନ ଫେରାଇବାକୁ ବିଭାଗ ପକ୍ଷରୁ ପରାମର୍ଶ ଦିଆଯାଇଛି। ଯଦି କେନ୍ଦ୍ରୀୟ ଅନୁଦାନ ପାଇବାରେ ବିଳମ୍ବ ହେବ ତେବେ ସମ୍ପୃକ୍ତ ବିଭାଗ ଖର୍ଚ୍ଚ ପାଇଁ ତୁରନ୍ତ ଅର୍ଥ ବିଭାଗରୁ ଧାର୍ଯ୍ୟ ସମୟ ବୃଦ୍ଧି କରିବାକୁ କୁହାଯାଇଛି। ଯଦି ଯୋଜନା କାର୍ଯ୍ୟକାରୀ କରୁଥିବା ସଂସ୍ଥାକୁ ଅନୁଦାନ ପ୍ରଦାନ କରାଯାଇଛି ତେବେ ତାହା ନିର୍ଦ୍ଧାରିତ ବିଷୟ ପାଇଁ ବ୍ୟାଙ୍କ ଆକାଉଣ୍ଟରେ ଜମା ନ କରି ଖର୍ଚ୍ଚ କରିବାକୁ ପରାମର୍ଶ ଦିଆଯାଇଛି। ସଂଶୋଧିତ ଗାଇଡ୍ଲାଇନକୁ କଡ଼ାକଡ଼ି ଅନୁସରଣ କରିବାକୁ ବିଭାଗଗୁଡ଼ିକୁ ପରାମର୍ଶ ଦିଆଯାଇଛି ।
