ରଘୁନାଥପୁର,୨୨।୪: (ଡି.ଏନ୍.ଏ.) ରଘୁନାଥପୁର ବ୍ଲକ ରେଢୁଆ ପଞ୍ଚାୟତ ନୂଆଗଡ଼ସ୍ଥିତ କୃଷିଭିତ୍ତିକ ସଂସ୍ଥା ଲାଲ(ଲିଭ ଆଣ୍ଡ ଲେଟ ଲିଭ)ର ସମ୍ପାଦକ କ୍ଷେତ୍ରମୋହନ ବେହେରାଙ୍କ ସହଯୋଗରେ ଅଞ୍ଚଳର ୭ ଜଣ ଚାଷୀଙ୍କ ଦ୍ୱାରା ୭ ପ୍ରକାର ଧାନବିହନ ଉଦ୍ଭାବନ କରାଯାଇଛି। ଏହାକୁ ସରକାରୀ ମାନ୍ୟତା ମଧ୍ୟ ମିଳିଛି। ଏହି ଧାନ ବିହନ ଉପରେ ଚାଷୀମାନେ ଆସ୍ଥା ପ୍ରକଟ କରିଛନ୍ତି ବୋଲି ବେହେରା କହିଛନ୍ତି। ସମ୍ପାଦକ ବେହେରାଙ୍କ ଦ୍ୱାରା ଉଦ୍ଭାବନ କରାଯାଇଥିବା ଲାଲ କୁବେର ଅବଧି ୧୩୫ ଦିନ, କାଦମ୍ବିନୀ ବେହେରାଙ୍କ ଲାଲ ବାସ୍ନା ଅବଧି ୧୨୫,ଅବନୀ ବେହେରାଙ୍କ ଲାଲ ସ୍ପେଶାଲ ୧୩ ଅବଧି ୧୩୦ରୁ ୧୩୫ ଦିନ, ସୁଧିରଞ୍ଜନ ବାରିକଙ୍କ ଲାଲମଣି ଅବଧି ୧୪୫ ଦିନ, କୃଷ୍ଣଚନ୍ଦ୍ର ସ୍ବାଇଁଙ୍କ ଲାଲପରି ଅବଧି ୧୪୫ ଦିନ,ବିଜୟ କୁମାର ପାତ୍ରଙ୍କ ଲାଲ ସ୍ପେଶାଲ ଅବଧି ୧୪୫ ଦିନ ଓ ଅଶୋକ କୁମାର ବାରିକଙ୍କ ରତ୍ନମେଣ୍ଟି ଅବଧି ୧୪୫ ଦିନିଆ ଅଧିକ ଅମଳକ୍ଷମ ବୋଲି ଲାଲ୍ସଂସ୍ଥା ପକ୍ଷରୁ କୁହାଯାଇଛି। ଏସବୁ ଧାନବିହନ ଚାଷୀଙ୍କ ପ୍ରିୟଭାଜନ ହୋଇପାରିଛି। ଏସବୁ ବିହନ ଦେଶୀ ପ୍ରଜାତିର ହୋଇଥିବାବେଳେ ଏଗୁଡିକ ରୋଗପୋକ ସହଣୀ ଓ ବୁଡି ମରୁଡିକୁ ଅନେକ ମାତ୍ରାରେ ସହ୍ୟ କରିପାରିବ ବୋଲି ସମ୍ପାଦକ ବେହେରା ପ୍ରକାଶ କରିଛନ୍ତି। ଲାଲ୍ ସଂସ୍ଥା ସହଯୋଗରେ ଗୋରେଖନାଥ କୃଷକ ମହାସଂଘ ପକ୍ଷରୁ ରାଜ୍ୟର ୧୫ଟି ଜିଲା ଏବଂ ଛତିଶଗଡ଼ର କିଛି ସ୍ଥାନରେ ଚାଷୀ ଏହି ଧାନକୁ ଚାଷ କରି ଉନ୍ନତ ଅମଳକ୍ଷମ ହୋଇପାରିଛନ୍ତି। ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ପ୍ଲାଣ୍ଟ ଭେରାଇଟି ବିଭାଗ ପକ୍ଷରୁ ଲାଲ ଧାନ କିସମ ଗୁଡିକ ସରକାରୀ ମାନ୍ୟତା ପାଇବା ପୂର୍ବରୁ ଦେଶର ବିଭିନ୍ନ ଗବେଷଣାଗାରରେ ୧୨ ବର୍ଷ ଧରି ଏହାକୁ ପରୀକ୍ଷା ନିରୀକ୍ଷା କରାଯାଇଥିଲା। ଏହାପରେ ଉଦ୍ଭାବନକାରୀ ୭ ଚାଷୀଙ୍କୁ ଟ୍ରୁ ବି ସାର୍ଟିଫିକେଟ ପ୍ରଦାନ କରାଯାଇଛି।
