ନୂଆପଡ଼ା ଅଫିସ,୧୯।୯: ଆଦିବାସୀ ଅଧ୍ୟୁଷିତ ନୂଆପଡା ଜିଲାରେ ୮୦ ଭାଗ ଲୋକ କୃଷି ଉପରେ ନିର୍ଭର କରନ୍ତି। ଶିଳ୍ପବିହୀନ ଜିଲାରେ ଲୋକେ କାମ ଅନ୍ବେଷଣରେ ବାହାର ରାଜ୍ୟକୁ ଦଲାଲଙ୍କ ସାହାଯ୍ୟରେ ଯାଇଥାନ୍ତି। ସେଠାରେ ମାଲିକମାନେ ଶ୍ରମିକମାନଙ୍କୁ ନିର୍ଯାତନା ଦେବା ସହ ଟଙ୍କା ନେଣଦେଣକୁ ନେଇ ଶ୍ରମିକମାନଙ୍କୁ ଦଲାଲମାନେ ହଇରାଣ ମଧ୍ୟ କରୁଛନ୍ତି। କେତେବେଳେ ଝିଅ, ବହୁମାନଙ୍କୁ ବନ୍ଧକ ରଖୁଥିବା ବେଳେ କେତେବେଳେ ଶ୍ରମିକମାନେ ନିଖୋଜ ହେଉଥିବା ଅନେକ ନଜରି ରହିଛି। ଏପରି ଏକ ଅଭିଯୋଗ ଆସିଛି ନୂଆପଡା ସଦର ବ୍ଲକ ବେଲଟୁକୁରି ଥାନା ବିଶୋରା ପଞ୍ଚାୟତ ସରଧାପୁର ଗାଁରେ। ଏହି ଗଁାରେ ରହୁନ୍ତି ବେଦନାଥ କେଉଟ (୨୯), ସ୍ତ୍ରୀ ଲଳିତା କେଉଟ (୨୫) ଝିଅ ଦିବ୍ୟା (୯), ପୁଅ ଅନୁଜ (୬) ଓ ସାନ ଝିଅ ସୁଜାତା (୪)। ୨୦୨୧ ଡିସେମ୍ବରରେ ୩୦ ହଜାର ଟଙ୍କା ଅଗ୍ରୀମ ଦେଇ ଆମୋଦି ଗାଁର ଶ୍ରମିକ ଦଲାଲ ସନ୍ତୋଷ ଅଗ୍ରୱାଲ ବେଦନାଥଙ୍କ ପରିବାରକୁ ଉତ୍ତରପ୍ରଦେଶ ସୁଲତାନପୁର ଜିଲା ଆକବରପୁର ଥାନା ଅଞ୍ଜନାନିପୁର ଗ୍ରାମର ଅଖିଲେଶ ବର୍ମାଙ୍କ ମୋଡର୍ନ ଇଟାଭାଟିକୁ କାମ କରିବାକୁ ନେଇଥିଲେ। ୨ ମାସ କାମ କରିବା ପରେ ବେଦନାଥ କେଉଁଆଡେ ଚାଲିଗଲେ, ଆଉ କୌଣସି ଖବର ମିଳିଲା ନାହିଁ। ସେଠାରେ କିଛି ଦିନ ଅପେକ୍ଷା କରି ସାଙ୍ଗରେ ଝିଅପୁଅକୁ ଧରି ସ୍ତ୍ରୀ ଲଳିତା ଗାଁକୁ ଫେରିଲେ। ଗାଁକୁ ଆସି ବେଲଟୁକୁରି ଥାନାରେ ସ୍ବାମୀ ବେଦନାଥଙ୍କୁ ଖୋଜି ଆଣିବା ପାଇଁ ଅଭିଯୋଗ କରିଥିଲେ। ୭ ମାସ ବିତିଯାଇଥିଲେ ମଧ୍ୟ ପୋଲିସ ଖୋଜି ବାହାର କରି ପାରିଲା ନାହିଁ। ଜିଲାପାଳ, ଜିଲା ଶ୍ରମ ଅଧିକାରୀ ପାଖରେ ମଧ୍ୟ ଅଭିଯୋଗ କଲି କୌଣସି ସୁଫଳ ମିଳିଲା ନାହିଁ। ଶେଷରେ ନିରାଶ ହୋଇ ପରିବାର ତାଙ୍କ ଆସିବା ବାଟକୁ ଚାହିଁ ବସିଛୁ ବୋଲି ଲଳିତା କୋହଭରା କଣ୍ଠରେ କହିଥିଲେ। ବେଲଟୁକୁରି ଥାନା ଅଧିକାରୀ କ୍ଷୀରୋଦ ବାଗଙ୍କୁ ପଚାରିବାରୁ ଆମ ପାଖକୁ ନିଖୋଜ ଏକ କେସ ଆସିଛି। ଏକ ମାମଲା ରୁଜୁ କରି ତଦନ୍ତ ଜାରି ରହିଛି। ଅତିରିକ୍ତ ଶ୍ରମ ଅଧିକାରୀ ଦିବ୍ୟ ଶଙ୍କର ଧରୁଆଙ୍କୁ ପଚାରିବାରୁ ବେଦନାଥଙ୍କ ସ୍ତ୍ରୀ ଲିଖିତ ଭାବେ ଅଭିଯୋଗ କରିଛନ୍ତି। ଏହାର ତଦନ୍ତ ପାଇଁ ମଧ୍ୟ ଆମେ ତାର ଘରକୁ ଯାଇଥିଲୁ। ପୋଲିସରେ କେସ ହୋଇଛି, ପୋଲିସ ବୁଝିବ। ଆମେ ଲଳିତାଙ୍କ ଲେବର କାର୍ଡ କରିବା ବ୍ୟବସ୍ଥା କରୁଛୁ ବୋଲି କହିଛନ୍ତି।
