ଇନ୍ଦୋର, ୭।୯: ନିକଟରେ ଝାଡ଼ଖଣ୍ଡର ଜଣେ ବ୍ୟକ୍ତି ନିଜ ଗର୍ଭବତୀ ସ୍ତ୍ରୀର ପରୀକ୍ଷା ପାଇଁ ସ୍କୁଟିରେ ୧୨୦୦ କିମି ଯାତ୍ରା କରି ସାରା ଦେଶରେ ଖବରର ଶିରୋନାମାରେ ରହିଥିଲେ। ଏହି ବ୍ୟକ୍ତିଜଣଙ୍କ ହେଲେ ଝାଡ଼ଖଣ୍ଡ ଗୋଡା ଜିଲାର ବାସିନ୍ଦା ଧନଞ୍ଜୟ। ତାଙ୍କ ସ୍ତ୍ରୀ ସୋନିଙ୍କ ସେପ୍ଟେମ୍ବର ୧୧ରେ ଡିପ୍ଲୋମା ଇନ୍ ଏଜୁକେଶନ ପରୀକ୍ଷା ମଧ୍ୟପ୍ରଦେଶ ଗ୍ବାଲିୟରରେ ଥିଲା। ଫଳରେ ସ୍ତ୍ରୀଙ୍କୁ ପରୀକ୍ଷା ଦେବାରୁ ବଞ୍ଚିତ ନ କରିବା ପାଇଁ ଧନଞ୍ଜୟ ୧୨୦୦ କିଲୋମିଟର ସ୍କୁଟି ଚଳାଇ ଝାଡ଼ଖଣ୍ଡରୁ ଗ୍ବାଲିୟରରେ ପହଞ୍ଚିଥିଲେ।
ସ୍ତ୍ରୀଙ୍କୁ ଧରି ଧନଞ୍ଜୟ ଏତେବାଟ ସ୍କୁଟିରେ ଆସିବାକୁ ଚାହୁଁ ନ ଥିଲେ। କିନ୍ତୁ ଘରର ଆର୍ଥିକ ପରିସ୍ଥିତି ସ୍ବଚ୍ଛଳ ନ ଥିବାରୁ ବ୍ୟକ୍ତିଗତ ଭାବେ ଗାଡ଼ି ଭଡ଼ା କରି ଗ୍ବାଲିୟର ଯାଇପାରି ନ ଥିଲେ। ସେହିଭଳି ସ୍ତ୍ରୀଙ୍କୁ ମଧ୍ୟ ପରୀକ୍ଷାରୁ ବଞ୍ଚିତ କରିବାକୁ ସେ ଚାହୁଁ ନ ଥିଲେ। ଏହି କାରଣରୁ ନିଜର ଦୃଢ଼ ଇଚ୍ଛାଶକ୍ତି ବଳରେ ଧନଞ୍ଜୟ ସ୍କୁଟିରେ ସ୍ତ୍ରୀଙ୍କୁ ବସାଇ ଗ୍ବାଲିୟର ପହଞ୍ଚିଥିଲେ।
ପରୀକ୍ଷା ପରେ ଏବେ ଘରକୁ ଯିବା ଲାଗି ଏହି ଦମ୍ପତ୍ତିଙ୍କୁ ଆଉ ଚିନ୍ତା କରିବାକୁ ପଡ଼ିବ ନାହିଁ। କାହିଁକି ନା ତାଙ୍କୁ ଗ୍ବାଲିୟରରୁ ଝାଡ଼ଖଣ୍ଡ ପର୍ଯ୍ୟନ୍ତ ବିମାନରେ ଯାତ୍ରା କରିବା ଲାଗି ଟିକେଟ୍ ମିଳିଯାଇଛି। ଗଣମାଧ୍ୟମରେ ଏହି ଦମ୍ପତ୍ତିଙ୍କ ଖବର ଜାଣିବା ପରେ ଜଣେ ଉଦ୍ୟୋଗପତି ଉଭୟ ଧନଞ୍ଜୟ ଓ ସୋନିଙ୍କ ପ୍ରତ୍ୟାବର୍ତ୍ତନ ଲାଗି ବିମାନ ଟିକେଟ୍ ଆୟୋଜନ କରିଛନ୍ତି। ଗ୍ବାଲିୟରରୁ ରାଞ୍ଚିକୁ ସିଧା ବିମାନ ଚଳାଚଳ ସୁବିଧା ନାହିଁ। ତେଣୁ ଉଭୟଙ୍କୁ ପ୍ରଥମେ ହାଇଦ୍ରାବାଦ ଓ ପରେ ସେଠାରୁ ରାଞ୍ଚି ଅଭିମୁଖେ ଯିବା ପାଇଁ ଟିକେଟ୍ ହୋଇଛି। ସେହିଭଳି ତାଙ୍କ ସ୍କୁଟିକୁ ମଧ୍ୟ ପଠାଇବା ଲାଗି ବନ୍ଦୋବସ୍ତ କରାଯାଇଥିବା ଜଣାପଡ଼ିଛି।
