ବୁଗୁଡ଼ା,୨୮।୪(ଡି.ଏନ.ଏ.): ଯାତ୍ରୀମାନଙ୍କୁ ସ୍ବଚ୍ଛ ଓ ଶୀତଳ ଜଳ ଯୋଗାଇଦେବା ଉଦ୍ଦେଶ୍ୟରେ ମାତ୍ର ୪ ମାସ ତଳେ ବୁଗୁଡ଼ା ନୂଆଁ ବସଷ୍ଟାଣ୍ଡ ପରିସରରେ ସ୍ଥାପନ କରାଯାଇଥିବା ୱାଟର ଫିଲଟର ଅକାମି ହୋଇପଡିଛି। ଫଳରେ ବିଭିନ୍ନ ସ୍ଥାନକୁ ଯାତ୍ରା କରିବା ପାଇଁ ବସକୁ ଅପେକ୍ଷା କରୁଥିବା ଶହ ଶହ ଯାତ୍ରୀଙ୍କ ସମେତ ବସଷ୍ଟାଣ୍ଡ ପରିସରରେ ବ୍ୟବସାୟ କରୁଥିବା ଦୋକାନୀମାନେ ପାଣି ପାଇଁ ଡହଳ ବିକଳ ହେଉଛନ୍ତି। ମାତ୍ର କିଛି ମାସ ତଳେ ଏନଏସି ତରଫରୁ ଲକ୍ଷାଧିକ ଟଙ୍କା ବ୍ୟୟରେ ସ୍ଥାପନ କରାଯାଇଥିବା ଏହି ଯନ୍ତ୍ର କିଛି ଦିନପରେ ଖରାପ ହୋଇଗଲା। ଅଭିଯୋଗ ପରେ ଏହାକୁ କର୍ତ୍ତୃପକ୍ଷ ମରାମତି କରିବାରୁ ଅଳ୍ପ କେତେ ଦିନ ଚାଲିବା ପରେ ଏବେ ୧୫ ଦିନ ହେଲା ପୁଣି ଖରାପ ହୋଇ ଯାଇଛି। ଅଭିଯୋଗ କଲେ ମଧ୍ୟ କେହି ହେଲେ ଶୁଣୁ ନଥିବା ନେଇ ବସଷ୍ଟାଣ୍ଡର ବ୍ୟବସାୟୀମାନେ ଅଭିଯୋଗ କରିଛନ୍ତି। ପ୍ରବଳ ଉତ୍ତାପରେ ଲୋକେ ଆଉଟୁ ପାଉଟୁ ହେଉଥିବା ବେଳେ ପିଇବା ପାଇଁ ପାଣି ଟୋପେ ମିଳୁ ନଥିବାରୁ ଯାତ୍ରୀମାନେ ଅସନ୍ତୋଷ ପ୍ରକାଶ କରିଛନ୍ତି। ବୁଗୁଡ଼ା ଏନଏସି କର୍ତ୍ତୃପକ୍ଷ ତୁରନ୍ତ ଏ ଦିଗରେ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି।
