ପାଟନା,୬।୧୨: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଉଗ୍ର ରୂପ ଦେଖିବାକୁ ମିଳିଛି। ମୁଖ୍ୟ ଶାସନ ସଚିବ ଅମିର ସୁଭାନୀ ଫୋନ କଲ ନ ଉଠାଇବାରୁ ନୀତୀଶ ତାଙ୍କ ଉପରେ ବର୍ଷିଛନ୍ତି। ମୁଖ୍ୟମନ୍ତ୍ରୀ ସୋମବାର ଜନତା ଦରବାରରେ ଲୋକଙ୍କ ସମସ୍ୟା ଶୁଣୁଥିଲେ। ଏହି ସମୟରେ ଭାଗଲପୁରର ଜଣେ ଅଭିଯୋଗକାରୀ ଜମି ବିବାଦକୁ ନେଇ ତାଙ୍କୁ ହତ୍ୟା ଧମକ ଦେଉଥିବା ଅଭିଯୋଗ କରିଥିଲେ। ଏହା ଶୁଣି ନୀତୀଶ ସେଠାରେ ଉପସ୍ଥିତ ଥିବା ଅଧିକାରୀମାନଙ୍କୁ ମୁଖ୍ୟ ଶାସନ ସଚିବଙ୍କ ସହ କଥାବାର୍ତ୍ତା କରିବାକୁ କହିଥିଲେ। ପ୍ରଥମେ ମୁଖ୍ୟ ଶାସନ ସଚିବଙ୍କ ଫୋନ ଲାଗୁ ନ ଥିଲା, ତା’ପରେ ଫୋନ ଲାଗିବାରୁ ସେ ଉଠାଇବାରେ ବିଳମ୍ବ କରିଥିଲେ। ଏହା ଦେଖି ନୀତୀଶ ରାଗିଯାଇଥିଲେ।
ପରେ ଅମିର ସୁଭାନୀ ଫୋନ ପାଇବା ମାତ୍ରେ ମୁଖ୍ୟମନ୍ତ୍ରୀ ରାଗି ଯାଇ କହିଥିଲେ, ଏତେ ବିଳମ୍ବରେ ଫୋନ ଉଠାଉଛ, କଣ ଚାଲିଛି? ତୁମର ଅଧିକାରୀ ଭୁଲ୍ କରୁଛନ୍ତି, ପଦକ୍ଷେପ ନିଅ। ଜଣେ ବ୍ୟକ୍ତି ଭାଗଲପୁରରୁ ଆସିଛନ୍ତି, ତାଙ୍କ ଜମିକୁ କବ୍ଜା କରାଯାଇଛି। ଯଥାଶୀଘ୍ର ତାଙ୍କ ସମସ୍ୟାର ସମାଧାନ କର।
ମୁଖ୍ୟମନ୍ତ୍ରୀଙ୍କ ଜନତା ଦରବାର ଦିନ ରାଜ୍ୟର ସମସ୍ତ ବିଭାଗୀୟ ଅଧିକାରୀଙ୍କୁ ସଜାଗ ରଖାଯାଇଛି। ଏହା ସତ୍ତ୍ୱେ କିଛି ଅଧିକାରୀ ଫୋନ ଉଠାଇବାରେ ବିଳମ୍ବ କରିଥିଲେ। ଏପରି ପରିସ୍ଥିତିରେ ମୁଖ୍ୟ ଶାସନ ସଚିବଙ୍କ କଲ ଉଠାଇବାରେ ବିଳମ୍ବ କରିବାରୁ ମୁଖ୍ୟମନ୍ତ୍ରୀ ବହୁତ ରାଗି ଯାଇଥିଲେ।
