ନୂଆଦିଲ୍ଲୀ, ୧୫।୯: ଚଳିତ ଆର୍ଥତ୍କ ବର୍ଷରେ କେନ୍ଦ୍ର ସରକାର ଅତିରିକ୍ତ ୨.୩୫ ଲକ୍ଷ କୋଟି ଟଙ୍କା ଖର୍ଚ୍ଚ କରିବେ। ଏହା ମଧ୍ୟରେ ପ୍ରାଥମିକ ପର୍ଯ୍ୟାୟରେ କୋଭିଡ୍-୧୯ ଜନିତ ଖର୍ଚ୍ଚ ତୁଲାଇବା ଲାଗି ୧.୬୬ ଲକ୍ଷ କୋଟି ଟଙ୍କା ସାମିଲ ରହିଛି। ଅର୍ଥମନ୍ତ୍ରୀ ନିର୍ମଳା ସୀତାରାମନ ସୋମବାର ପ୍ରଥମ ପର୍ଯ୍ୟାୟ ଅତିରିକ୍ତ ପୁଞ୍ଜି ବ୍ୟୟ ପ୍ରସ୍ତାବକୁ ଉପସ୍ଥାପନ କରିଛନ୍ତି। ଏଥିଲାଗି ସଂସଦର ମଞ୍ଜୁରୀ ଲୋଡ଼ାଯାଇଛି। କରୋନା ମହାମାରୀ ଯୋଗୁ ରାଜ୍ୟଗୁଡ଼ିକରେ ଟିକସ ସଂଗ୍ରହ କମିଛି। ଏଭଳି ସ୍ଥିତିରେ ରାଜ୍ୟଗୁଡ଼ିକୁ ୪୬,୬୦୨ କୋଟି ଟଙ୍କା ପ୍ରଦାନ କରାଯିବା ନେଇ ଯୋଜନା ରଖାଯାଇଛି। ସେହିଭଳି ସବ୍ସିଡି ଖାଦ୍ୟ ସାମଗ୍ରୀ ଯୋଗାଣ ଲାଗି ୧୦ ହଜାର କୋଟି ଟଙ୍କା ଆବଶ୍ୟକ ପଡୁଛି।
ଯୋଜନା ମୁତାବକ, ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା ବାବଦକୁ ୪୦ ହଜାର କୋଟି ଟଙ୍କା ପ୍ରଦାନ କରାଯିବ। ସେହିଭଳି ପ୍ରଧାନମନ୍ତ୍ରୀ ଜନଧନ ଯୋଜନା ଏବଂ ଜାତୀୟ ସାମାଜିକ ସୁରକ୍ଷା କାର୍ଯ୍ୟକ୍ରମରେ ବ୍ୟାଙ୍କ ଖାତାରେ ସିଧାସଳଖ ଅର୍ଥ ପଠାଇବା ଲାଗି ୩୩,୭୭୨.୪୮ କୋଟି ଟଙ୍କା ସାମିଲ ରହିଛି। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ଜନଧନ ଖାତା ଏବଂ ବାର୍ଦ୍ଧକ୍ୟ ଭତ୍ତା ବାବଦକୁ ୩୩,୭୭୧.୪୮ କୋଟି ଟଙ୍କା ପଠାଯାଇଛି। ଦେଶର ସ୍ବାସ୍ଥ୍ୟ ଭିତ୍ତିଭୂମି ଉନ୍ନତ କରିବା ଲାଗି ୧୪,୨୩୧ କୋଟି ଟଙ୍କା ଖର୍ଚ୍ଚ ସାମିଲ ରହିଛି। ଏହା ମଧ୍ୟରେ ମହାମାରୀ ନିୟନ୍ତ୍ରଣ ଲାଗି ଅତିରିକ୍ତ ଖର୍ଚ୍ଚ ବାବଦକୁ ୫୯୧୫.୪୯ କୋଟି ଏବଂ ଇଣ୍ଡିଆନ କାଉନସିଲ ଅଫ୍ ମେଡିକାଲ ରିସର୍ଚ୍ଚ(ଆଇସିଏମ୍ଆର୍)କୁ ୨୪୭୫ କୋଟି ଟଙ୍କା ପ୍ରଦାନର ପ୍ରସ୍ତାବ ରହିଛି। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ଶ୍ରମ ମନ୍ତ୍ରଣାଳୟ ଗ୍ରାଣ୍ଟ ଇନ୍ ଏଡ୍ ଜେନେରାଲ ଭାବେ ସରକାର ୪୮୬୦ କୋଟି ଟଙ୍କା ଲୋଡିଛନ୍ତି। ସେହିଭଳି ଭାରତୀୟ କ୍ଷୁଦ୍ର ଶିଳ୍ପ ଉନ୍ନତୀକରଣ ବ୍ୟାଙ୍କ(ସିଡ୍ବୀ)ର ସବ୍ସିଡି ଲାଗି ୧୨୩୨ କୋଟି ଅର୍ଥ ଲାଗି ମଞ୍ଜୁରୀ ଲୋଡ଼ାଯାଇଛି। ନ୍ୟାଶନାଲ କ୍ରେଡିଟ ଗ୍ୟାରେଣ୍ଟି ଟ୍ରଷ୍ଟି କମ୍ପାନୀ ଲିମିଟେଡ୍ (ଏନ୍ସିଜିଟିସି)ର ଗ୍ୟାରେଣ୍ଟି ଏମର୍ଜେନ୍ସି କ୍ରେଡିଟ ଲାଇନ(ଜିଇସିଏଲ୍) ସୁବିଧା ଲାଗି ୪ ହଜାର କୋଟି ଭଳି ପ୍ରସ୍ତାବ ଏଥିରେ ସାମିଲ ରହିଛି।
