କେନ୍ଦ୍ରାପଡ଼ା ଅଫିସ, ୨ା୮:ଶ୍ରାବଣ ମାସରେ ଶିବଙ୍କୁ ଜଳାଭିଷେକ କରିବାକୁ ସାରା ଦେଶରେ ଶ୍ରଦ୍ଧାଳୁ କାନ୍ଧରେ ଭାର ରଖୁଛନ୍ତି। ଚଳିତବର୍ଷ କେନ୍ଦ୍ରାପଡ଼ା ଜିଲାର ୬ ଦୃଷ୍ଟିବାଧିତ ଯୁବକ ଏଥିରେ ସାମିଲ ହୋଇଛନ୍ତି। ସେମାନେ ହେଲେ ଦିଲୀପ କୁମାର ବରାଳ, ନିକୁଞ୍ଜ ବିହାରୀ ଜେନା, ସନ୍ତୋଷ କୁମାର ନାୟକ, ଅମର କୁମାର ମଲ୍ଲିକ, ପ୍ରକାଶ କୁମାର ଖଟୁଆ ଓ ଗୋଲଖ ଚନ୍ଦ୍ର ନାୟକ। ଏହି ଯୁବକମାନେ ସହରର ଚଟିପୋଲଠାରେ ଗୋବରୀ ନଦୀରୁ ପାଣି ଭାର ଉଠାଇ ଦୁଇ କିଲୋମିଟର ଦୂର କଜଳାସ୍ଥିତ ବିଲେଶ୍ୱର ମହାଦେବଙ୍କୁ ଜଳାଭିଷେକ କରିଛନ୍ତି। ଏ ସମ୍ପର୍କରେ ଦିଲୀପ କୁହନ୍ତି, ଆଖିରେ ଈଶ୍ୱରଙ୍କ ସୃଷ୍ଟିକୁ ଦେଖି ପାରୁନାହୁଁ। ତେବେ ଈଶ୍ୱରଙ୍କ ସଦା ସର୍ବଦା ଅନୁଭବ କରୁଛୁ। ଈଶ୍ୱର ଆମକୁ ଦୀର୍ଘ ଜୀବନ ଦେଇଥିବାରୁ ସର୍ବଦା କୃତଜ୍ଞତା ପ୍ରକାଶ କରୁଛୁ। ଶ୍ରାବଣ ମାସରେ ଶିବଙ୍କୁ ଜଳାଭିଷେକ ପାଇଁ ସମସ୍ତେ ପାଣି ଭାର ନେଉଥିବା ଶିଣିଛୁ। ଏଥିପାଇଁ ଇଚ୍ଛା ଥିଲେ ମଧ୍ୟ ମନର ଭାବନାକୁ ସର୍ବଦା ଚାପି ରଖିଛୁ। ଶ୍ରୀଜଗନ୍ନାଥ ଚାରିଟେବୁଲ ଟ୍ରଷ୍ଟ ପକ୍ଷରୁ ଏ ନେଇ ପ୍ରସ୍ତାବ ଆସିବା ପରେ ଆମ ପ୍ରତି ଈଶ୍ୱରଙ୍କ କୃପା ହୋଇଛି ବୋଲି ଅନୁଭବ କରିଛୁ। ଜଳାଭିଷେକ ପରେ ଯେଉଁ ଖୁସି ମିଳିଛି, ତାହା ପ୍ରକାଶ ପାଇଁ ଭାଷା ଖୋଜି ପାଉନାହୁଁ। ପ୍ରଥମ ଥର ପାଇଁ ଏପରି ସହଯୋଗ ଦେଇଥିବାରୁ ଟ୍ରଷ୍ଟକୁ ଧନ୍ୟବାଦ ଦେଉଛୁ ବୋଲି ଦିଲୀପ କହିଛନ୍ତି। ଏମାନଙ୍କୁ ସହଯୋଗ କରିଥିବା ଟ୍ରଷ୍ଟର ସଭାପତି ଦମନ କୁମାର ମହାନ୍ତି କହିଛନ୍ତି, ଦୃଷ୍ଟିବାଧିତ ବ୍ୟକ୍ତିଙ୍କ ପାଇଁ କାଉଡି ଭାର ଆୟୋଜନ କରି ଟ୍ରଷ୍ଟ ସଦସ୍ୟମାନେ ବହୁ ଆନନ୍ଦିତ ଅଛନ୍ତି। ହିନ୍ଦୁ ସଂସ୍କୃତିରେ ଶ୍ରାବଣ ମାସରେ ଜଳାଭିଷେକ କରିବାକୁ ବହୁ ଉତ୍ସୁକତା ପ୍ରକାଶ ପାଇଥାଏ। ତେବେ ଦୃଷ୍ଟିବାଧିତମାନେ ଏଥିପାଇଁ ଆଗ୍ରହ ଥିବା ସତ୍ତ୍ୱେ ଚୁପ ରହିଥାନ୍ତି। ଏ ନେଇ ଟ୍ରଷ୍ଟ ପକ୍ଷରୁ ଆଲୋଚନା ପରେ ଶ୍ରଦ୍ଧାଳୁଙ୍କ ସହିତ ଯୋଗାଯୋଗ କରାଯାଇଥିଲା। ସମସ୍ତ ଆୟୋଜନକୁ ଟ୍ରଷ୍ଟ ସଦସ୍ୟ ସୂର୍ଯ୍ୟକାନ୍ତ ପରିଡା, ବିଭୁପ୍ରସାଦ ସାହୁ, ଶାନ୍ତନୁ ମଲ୍ଲିକ, ହରିହର ନାୟକ, ବିନୋଦ ପଣ୍ଡା, ଗୌତମ ସାହୁ ଓ ରଘୁନାଥ ତ୍ରିପାଠୀ ପରିଚାଳନା କରିଥିଲେ।
